Gvasu Doqshi Yongtang

       Mabvan byu xigi ngo ladung hui byi zhang, lalam zutwang lo nyo ri mvai, zhong⁃ mo mai toq lo bang gi dangmyvang zhvat dai zhung abe dvi. “Ngo gi byumyvu tungking mikon zhvau dviq shi kun go wu be, byvatsik ma haizhung rambik go, myithui go……hai ri ase”ngo xisu ngvu dang eq tuqting bat gvat be. “Ngo zhvau ngvu be, haimu lui zanwut 28zan zhe shoq yin nyi e gi, mowui eq myiwe ho hang byi ra ri lang nyi ri nvung.”Yvang ngo ri myoqzun eq lada wu gvat mai, nga yvuppyang ma zung mu, aqak mo dong dang⁃ zhvin dum zhvin lo be:“‘Bumzhvung ngon⁃ qam’ga gi xisu byunyi byuyap laili qo age ra jo lo loq. Muzui zhisai za se e waqngan wa, adat go zhang ngo mvoq le. Arup luq?”ga, dunzik lui lanang byven lo ri mvai. Mau eq gun be! Yvang za zhvirang wo zhang,“sira”ga lvang dvomyi be ngvut ra. Myvipo sangqang“Wa tungjvi guqtung guq amup, myiwe dangdai dang adut”la ga le wa, yuqge toq ma doqyap lo e su ga e gi:“Adut! Lo gi zhichi ri za azut byi, yuqge gi myiwe ri za abvai po. Gozhang go, o gi o ri juq ra.” ngvu lui, ding za dvoqyap gvat be. “O! Zho be, waqngan su yvang dut be.” ga, yvang ri pyang mai yap dvoq izhvang, loq⁃ mo cham dvuwaq gvat zhang, ngahi ma dang⁃ wang lo ra ngo zhvitsu su yvang dut lo be. Haumyin, ngo puqlo zoze yvupjing jing be. Mabvan gi wuila la gvut, zhvitdap paudvap se, rip myit mu dum rip gvut e laisam nga imyit unuq kau ma bying zang dvo be. Yvang gi haison haimyit mu, hai gvut ra ga le lu, ngo lamyin maubo lachum lvang awo chum dut be. Tang napjvo, ngo zhaq noq mai zhang dvoq mu, lapoq qam ma zhe le be. Yozum ma kokkak ga mying nyo ra, o dvi? Yvupsu le bang ri nga zum ma adat zhe le gvi kai. “Hi, hi hi…”wuite eq gvut myiwe zo la⁃ yuq toq lo mu:“Sira, wangzan!”ga gvat be. Acha, Mabvan dum ngvut lang be, “Nang kisu mu ximyvo noq le lapoq qam ma zhe le e?”ngvu ngo maumau za ga mu myi gvat e.“Anoq loq mvai, Zaizo myiwe gi woqdvun kun mai guq dvoq tung le, nang ase dvi? Buitoq shoq yvup dvo ri gi hoq shi bi ra.” ga. Nvut dap zo gi dai, sho dap zo gi she, wo kangmo yvang tungzam ang le zhvat. Yvang anyi nap zhe le kun gi taptuk Zaizo zomyi zo, kinyi gi xima rung zhimu byu su yvang dut be. Yvang xima muzui king chung gvat zhang, jvangjvang roprop za gvut reng dik be. Byu za shop zhang, hai wutbu chung gvilvang, byu imyit wo lang nva ra su dut shoq zhvoi shi dvo be. Muzui kingze qom yu zving ge dvo be. Asut asat gisot ginot nvunnvun gu yozum zhvutzhvut za gvut qom shum seng mu, azing zeking bve shuqshuq za gvut qom dvo zhvoi dvo zhang, yvang xi yozum ma zumsing su yvang du be. Saitung toq ma, anyi nap yvang eq qutqut ga lu ngvo lo mebu bve ri, kinap gi zhvoizhvoi sansan rara za gvut nvap zvang dvo be ngvut ra. Ngo yu wu gvat zhang, jo be bujvin ban qup dvap dvo, zheq dvo jo bve ban po dvo be ngvut ra. Ngonnam shom waiwai, xigi byahom shom lu? Angvut mu myiwe zo e homshom lu? Ngo adat gamkoq se yu loq. （4）