Ngo haunyi myin ri yvupjing jing gvilvang, muzo ma wum gonyi le toq la bo shi dvo be, yuqge myiwe chom bvongzui zhang adat moi ga gi ngvut le abe. Yuqge zo ngvut mi ngvut, myiwe zo bve hi ma myoqdong agvam dubyvam ngvu ngo wam dai le. Dum dai zhang, yvang xi jiro za zhongkum mai toq lo su lvang zui e nga toq jamji kimyvo ajo ngvut ra. Myintang noja yopuq bui qing zhe zhang, lazup za ma maumo dvunggun wo jo lo be, nganvik zumkau wo din wang zhe ri la⁃ gung e dveq le yuiyui be. Yvang soqshe le wanggang gi luplup gvut, kop zhang ma kop, bu zhang ma bu, myiwe zo bve diqa zongsam myoqhi dve ma le byvaqshit dvo lui, nga myit lang dvap lo nyo ra. Ngo gi yvang no toq ra ri wam mu me⁃ bu lo tai byvam aq ngvu zhang, yvang wuiwui za gvut:“Do ma lung mu gvo lo lui bui alvap mau abat wu ri angvut, Zaizo zo⁃ myi haumyvo anvuinvam. sira, nang ki gungyui.”ga ra. We, ngo mu xi ri za unung shi lo ro. Yvang gi“sira、sira”ga nyi mu, nvut chui le ngo ri lazo byvam ri lvang kisu gvut zo e achang se ra dut ro. Yi, ngo yvang ri hai du ra gi awo dum myitpyit, hau rungsing byugoi mo eq yvang be, ngo yvang ri hai du aq ga gi adum mvoq dvo. Yaya myiwe zowui eq hui zhang byvikbyvik lanan le su ri wa, zomyi zo layuq nvang lui dum putzhut gvat e wa, kayung yut, ka byvi kap wu ra dvi! Myin ri, nganvik dai ding dvo qing roq ma, yvang yvup zhang ma zhe e be. Nyi wo xi⁃ gi hikun le logidat zhimu zhong ma zhongwap ma sai yu e ngvut ra. Yvupwap gi tan eq la⁃ wap zo jvo yu mu, godvu gi zeking bve dvo gvut, dangdai ri lvang langtang dvu shoq zhaq lam ra. Mikon go zhang ri ge gvut le, zhvutzhvut shum zhvoi san byvam lui, myibo mo ri dvap dvo, zhakgvam ri lalvum zvung dvo gvut, wu zhang lago sai mon wu be ngvut ra. “Kisu, sira?”Mabvan dang toq lo mu, dangdai lawan wan za ga le myi gvat be. “Haizhung kisu?”ngo yvang hai ri ga e ase mu dvau myi gvat be. Myiwe zowui nyi⁃ zhang ma alvum man lui ri dvaumyi te nan⁃ nan za ga nyo ra. “Mikon go mvai.”yvang qiloq eq myva gvut dai san be. “Kau qidvu zhang ma qidvu, loqhe zhang ma loqhe”ngo wanggang ngangngvang gvut:“Asu e, nang‘Sira’a wo gvut ge mu, ngo ri awo mvoq ge zhang, ngo ri ki zvuq o” ngvu zhaqwa mo su ngvu dai gvat mvau be. “Hausu dang ki dai mvai, nang gi ka qo ma ri nga sira ngvut le.”yvang dai izhvang zhakgvam po myving gvat zhang, qigvam eq ra nvo za ga ngon dik e Zaizo tungking 《Zumgo mikon》no ma zhvizhvi ga shoq, layvum kau e bying zang dvo be. “Aga! Ngon dik be.”ngo hai lvang amyit⁃ bun e jvi dvang gvat lui, qiloq myva gvut go dang lo be. “Ora, ora……”ngo go izhvang ra izhvang gvut nyi be. Zaizo byumyvu gi dang dat dai eq mikon dat kon, qo dat so eq mikon dat go mu ming ma hu e byumyvu yvang be. Mikon te mying toq lo eq, sing ma dui lo be. Dai gvat zhang, “Bumzhvung ngonqam”ma xisu ijvoq agang nanjvan le. (5)