Gvasu Doqshi Yongtang

《Zumgo mikon》xi za wo jo zhang, myimyvup myvup dvo myiqom dum duq lo e ja, shocin i ja za e tungking mikon bve gi, lik⁃ dik zhang imyit kau mai congtoq bum lo lui, hoqjuq ga gi kihe mauyam kam zhe ban pang dang be lvang ase loq. Minggvan ngazhvat ngvu ra su ga shoq nviklvum gvo le, ngon ga za lase alo. Asu mu, ngo 2loq eq shamhing waq mu zhe go zhe ngon lo be. Mabvan gi layam ma ducuq dvo su gvut, nvutha mu mauyap lui wu moqzuq dvo be. “Ayu, hau gi haimu mauzing zuq、jonnon yuq mau shuqyap dvo be lvu dvi? Nyveqnu bau su pomyvi eq za ri aging lo lva?”ngvu ngo yvang ri dai yon gvat be. Yvang gi myoqdong dvundvun ne ri, nvut ngatzing mu“Sa, ro!”ga eq, zhetgva dung zo lang toq lui, zvangzvang nyvom nyvom za gvut chang go wang lo be. “Ngozhvau dai be, sira gi ka qo ma ri sira ngvut le ngvu be. Kamyvo se gat gu dum zau ngvop mvau ashi. Angvut dvi?”ga go izhvang ngo ri go dum zvuq be. “E, kira le, zhoqang zo za gi udvong eq age sho, byvatsik mikon go zhang nga myoq⁃ dong sum bi ra gilvu o，haukun zhang ngo nang ri sira gvut bi ra dyvo.” “Hausu gvut no dvi? Xi zhaq ge gu anve eq hi lo qo zhoq be angvut dvi?”nganvik go izhvang ming izhvang ngonmoq chom zuq lo nyo be. Zhakgvam ma《Zumgo mikon》eq“ora” te azim zvik loq. Haukun, likdik ma rungsing gi natwup su gvut kumdong ma le zhe yap gvat be: “Wai, nungnvik zhvau lanvum zo su gvut zhaq ra agvo mvai, ngo ri re asang jvo gvo e, nungnvik bau mikon go qam pong gvo gi.”ga, jvuq nvo za ga mu dum bigo wang lo be dyvok. M! Akui zhvau lomzo be, kihot helut mai le kauwu bang baubau za lo, midvan lap ma ruru rara ga banshoq bang zhvunzhvap temwang bum lo lui, go le, ra le gvut chom ngon ye nyi bigvo. Yvangmoq gi yvumsing gung gi mangzo lvu、zoshang lvu、maukung ma lvu、myigung ma ngvut le lvu lvang ase loq gvo ngvut ra. Ngo mikon lago mvoq nau su sheq, yvangmoq e zumshe su la gvut byvam byi be ngvut ra. Laitang ma, Banshoq bang eq ngo ri ge dik be ga chom qe-on gvo e atoq go, laili zumyap mu qo sai lvoqngon ra dong, myitte dang myomyo chom ming toq lo agvo. Banshoq bang chom sangdung gvo eq la⁃ zhung za, lapoq rung Dang pungzo mai doq⁃ dan toq gvo gi: Rambik pungzhvung mai uhi she mu chomzing lui go mvoq wu su Mabvan sira shui mvoq aq ga bigvo. Haumai, laili myinzat go king zvomra myin pong lo nyi bigvo, ngo gi mu bo ri ngvu lamyin lvang abi e wu. Laban 6myin ma, rungsing wa ngawap ma wang le mu:“Muibup dvum nang xima hai gvut nyi dvo le? Subve nang ri paudvap myit shit be mvai, nang gi haisuq ri asam, azo lashap shi su gvut labyvat chipau pau ra ngvu le luq? Dvoq mu rau e bi ngon gvun aq.”ga le kat qut gvat be. Zha e! Myit han zhang wuibvup nye gi awo zo ga. Numnang lvang anvikqik shi ma nang bi myit nvikqik shi dvi. Numnang lvang lamu jin shi lo e nang amyang dvi ngvu, ngo imyit ma angon gvilvang yvangtang bi dvoqso be. Yvangmoq ngongvun king gi jai ye nyi agvo, ngo za sheq sanghi rambik mikon go mvoq e byusik dut be ngvut ra. “Sira, rau le lo aq, nganvik daiding lvum dvo wa, Zaizo gi dangdai dang son le, nang sheq mikon za adat go ri yuqge ason ga e mvai.”Ngo lvang hai huhang ri ase shi ma, Mabvan kunmo qo gvat be:“Loq yu gvat aq, datshin ma bang go su gvut chom go goq.”ga, numnang hoq ra ri aga, nga loqbvai loq ma zuizing lui, nga loqyo loq eq gi yvang pidum ma bvozing ra dong ga, haumai yvang loqyo loq gi nga goqsan ma gve dvo gvut,《Shingshing nyui e wuilang zo》ga e mikon te chang mu, dum zut dum wang, lving e lving lo,“1,2,.3. 1,2,3”ga shui go sat jo lo be. （6）