Ngo gi sanghi mai zumgo、 dvinggo hau bve dat go le mu, rambik go mvoq se lazvui lawan ngvut gvilvang, ngo go le qo ma waqngan ngaq shit mvau lui, ha shi lo ra. Ka, wu aq ma, myoq⁃ myang dvangqang ma myiwe zo eq bvolvum dvo mu go ri hoq toq shi be. Yvang zhvau zhe go zhe zvang, zhe go zhe gvupdap, ngon zingzuq shi lo be, ngo gi zhe go zhe mo, chuitung dvum su ga lagung e nye lo nyo le, qigvam lvang rau awo tot nyo loq.

     Nganvik mikon go qi wo ra lvum e mai, dai mong ri zvung lvum lo be. “Nang myinwui laigva buk eq zum e mai, gohu hai dat gvut mvau ashi?” “Laigva buk mai lai lui, laigva buk zhvat. Ngo laigva ngau qom zving mu, 《Ulung lapoq ho paqzhi》ngvu e laigva labuk gva toq ra hen dvo le. O! Kimyin eq lamyin ma ngonking ri le bi wang be a ngvut dvi?” “Ngvut ra, zhaq ge be. Ngo nang ri ka⁃ dong wo girum ra? Ngauzving su, mu de……?” “Aga, zhaq ge be, ngo lvang byu ra dvo le ma, nganvik bvong goq dvi……” “E e, haimu qigvam no be, loq gingging bvo aq ma, ngo nang ri myvi lvut byvam ra juq ri dvi? O ara, xisu jai be.” Hautang mai, ngo yvang ri lazup ma wo dum myitbun bun, awo gang ra su ga gung ma bun lo be. Yvang ri lapoq sai zhang ma a e nvang ri zhaq ge ra wa, agang alan zum nyi nau ra. Asu e, yvangmvoq e gi lapoq sai zhimu yvang ngvut le mu lui, kisu adat gvut loq. Yvoyvo mai, nga myit laqo wo doqdan toq be. Kizan gu ma mu 1—2 lvum wo zui ong shoq ngvu dvo le: 1, Mingman laigva wo gva bvan shoq; 2, Yvumtu mu qo wo gvut dut shoq……Mau e! Xi tang ma lvum gi zomyi jam yvupsu qo a ngvut dvi? Muzui zhisai qo ma zum lo chang dut mu, zhvitmyit ri yvangbau ung mai zvu toq lo nyo be. Oyuq ngo ri muibup dvum zomyi adat jam ga dai shi gvi ra, o ri yvo mai igvun gvut e langvut le. Mabvan eq myang hui mai sheq, nga byuze qo nyingon yapkap, muzui zhisai wum-o zhe bo lo be. Lacung lazan shirang nvomyvik chom zuisai shigut jvop zhang, zangbung hom lapoq zhvamlik yo ri zhaq wo zui toq ra byu myang dvo be; Laigva ri wo lvoq bvan lo be, qo kangmo loqzo so le yangyang yvang be. Yvumtu igvun qo gi, rau wo zhvoqnyoq zo be zangsun gvut gvilvang, shichang dang lakun ri aming toq lvum wu, adai poq toq gvilvang imyit gi lakat za be. Ngo amu lason yo gvat zhang Mabvan eq qang za ming lvum mu, woq lut zo ri lvang alut loq ra dong myit dvo le.

     Xisu e aqak yamyoq ma, rungsing e byu pyai kunmo jo be:“Nungnvik zum gvo e aluq shoi be kai, lapoq sai zhang ma Mabvan sira e gvut ra dut ra, nungnvik sira 2 yuq tangpyang mu gam ri yvum agam ge gvut le gvi lu o. Mabvan napma napjvo mai lapoq sai zhang ma e aq koi dyvo.”ga e mai yvang lving lo mu, nga goqsan ma bat lui:“Hima nang qing⁃ yam lago azui zing e ri ase, tangpyang age lvoq pyun o.”ga.

        Ngo gi yvang dang eq unung langtang ma le bat dvang gvat e su ga mu, hai nvik ajing ung adong shi ma, yvang gi pyang lo  byuq  be.   (7)