Hikun dvaugvop gi wui ma anyi myigung toq ma nyi e su, tang ma sheq wui⁃ lang ma nyi byuq lo e ngvut le ga. Byu eq duize dang ge nyo hui lvum ashi byvat le lanyi ri, byupo layuq yvum lo qolat ma dvaugvop ladu ri lo myang mu, yvum qo zhang zhvupwaq chung be ga.

         Yvum zhe zhang, layvum bang gibu gira gvut dvaugvop ri chom zhuiwu gvun dvo lui, kasu gvut satzo ra qo dai wang lvum lo bigvo ga, akun zhang yvumsing po gi dvaugvop ri kopnung eq zhviq gvut batsat shang ga zhang, dvaugvop gi son juq mu：“E, kopnung eq wa gi ki batsat gvo, kopnung eq batsat zhang ban byimyva byvam bi ra, nungmoq nga sho amyang zo loq.”ngvu dai mvau be ga. Hauzhang yvumsing myvi dum dai e gi： “Akun zhang gi yvang e lingzing lang toq yu mu sham eq zansat shang.”ga dum dai zhang, dvaugvop gi：“E, wacang zowui e, nungmoq nga e lingzing mai wa sat ra ngvutzhang gi ngo lingzing kam dvo byi gvo le, sham lvang adat zuq.”ngvu dum dai mvau be ga. Byu xiyvum bang dvaugvop e dang ri jo zhing mu, dvaugvop ri lingzing mai asat lo gvo. Tang⁃ ma, yvumsing myvi gi xisu ngvu dum son toq lo be ga：“Nganvung byu lvang gi wui ma wo nopshi le, dvaugvop ri re wui ma du nvopsat wu shang.”ga zhang, dvaugvop gi haq jo gibu lui：“Ngo ri wui ma kilvung sat gvo o!”ngvu dai jin mvau be ga, asu hauyvum bang gi wo jo gun ri agvut, dvaugvop ri qudai zheq ma gvat chung mu wuimo lang shut yangyang waq e mu, qudai nvut ma gi gingging myvik zing dvo mu wuikau shut e qo lvung dvo bigvo ga. Zvomra myang ma, yvangmoq gi dvaugvop shi bi ra kai ga qudai mai langtoq gvat wu zhang, qudai agvom dut dvo lang be ga, dvaugvop gi qudai chuq mai ngat tong toq lo mu wuikau shut pang haq wang byuq be ga.         Haumu, akui zhe dvaugvop gi byu ri juq mu myigung toq awam toq lo loq, wuikau ma zhang nyi byuq be ga. （Pauyam Mudvau）