Nga e yvummau gi Mangshi Jangdung mau bumzo lawa ma ngvut le.Xima gi, cung⁃ zan laizo sisi za ga, sikzo mvanzo nyui zhvoi dvo ra; Xima gi, munmu lapoq yo zhoq, Yin⁃ pa myau zhoq, Doqshan lang chemo zhoq, hing dik zhvoi dik e Lungjang lang zhoq…… kuqlai ponglam lo e mai, nga e yvummau ma gi liklai zhaq yvang gvo byuq be.

     20shozan tung 70zan byvat, ngamoq yvummau ma mingzo danzo lung e yvum gi banshoq nyvupnyvup gu e zaiyvum zhvat, zanwui zai sai mau ra dut mu ashau yvang yak e ngvut le, mauwo yoq dum zhe zhang, wilam ma maumo wo, yvumkau ma gi mauyui yui, lago za awo son zhe zhang lvang yvumkau ma dat lengbat le dut mu, nyi angon dik.

     Haukun le e zaiyvum ma, singjvi ngvoq bve anum sut lo sut agvo, ngamoq zoshang wui gi wa zumtang eq yvumgoq toq doq e mu, ngvoq-u e doq yu, ngvoqsut e taumyva gvut zhvat gvut e, myangyu e ngvoq-u gi chunchun gu loqmo cham i za bo ra; Lada da gi shomau lvang adap shi e ngvoqzo ri myang yu ra, ngvoqzo hau myoq lvang awo pong shi, haumu pyinzum zo bve eq laha ngvoqzo ri yvumzo sai byi mu, zhvizhvin e bvauzvo, angvut zhang bauzo e zhvupzvo gvut mu, ngvoqzo gvo lo zhang gi dum nvang gvat gvat gvut zhaq lvu gvun e. 20shozan tung 90zan byvat zhe e mai gi ngamoq wa ma zaiyvum azhoq lo, banshoq gi wayvum zhvonyvum zhvat wo sai bum be, wayvum zhvonyvum hau nyuinyui za sik⁃ bvung kau ma zhoq bum ra, yvumlvum coq⁃ coq rara za, lamyoq wu gvat ri zhvoi le ashau. Dang e 18da zuppong mo pong lo e mai, wabyu wui e igvun ri lanyi eq lanyi zhe ri zhe ge lo be, haumu yvum sai ri gi shamdvoq byvilat eq sai mu, zhegvo zheging e yvummo wo sai lung bum lui, yvum ma denshi wu gvun, lapoq shuq gvun, yvumkang yvummo nguingon igvun wo zhe be. Gokun, wabyu wui Mangshi ma 5nyi lagai e wang ri qoso mu e le zhvat, gai lada e ri nayi 10qing myit yvang o ra.Wabyu wui gai e ra napsun ri nayi 3qing mai yvupdvo dvo mu, zhvikzhvik lai e gaize dum wun chung lui myihu tun gvut gai chom e e ngvut la.Gai e qo gi kedoq kejo myo, qo dum zhvap, haumu wabyu wui anum num so lengbat e ri bo le.1959zan ri, Mangshi Fungpyin mai Jangdung zhe e modo qo chom du be, hau byvat ri gi qodu zhvak ri awo, banban gi mingbyu wui kopmo eq zhvat du, siklong eq sai e myizve dunze eq dun byvam, hai ri loq eq goqsang eq waq lui za sai e ngvut le.Qo hau wo durot ra midvu ga mu, mingzo danzo banshoq bang buibu gi mau su yui, bom myichi bvuq myving te、shamkop kai myving te、shamdvoq zucun te bve mying-um dvo be……Mingzo danzo banshoq bang chom shigut e mizho, hingpyang 30gungli bo e mo⁃ do qo wo durot be, qorot e haunyi, wabyu wui zing-ut chapcheng bat lui gibu gira yvang chom qi-on gvun gvo e ngvut le.Modo qo hau wo sairot e mai, Jangdung mai Mangshi lo ri myanglveng zhi gvolvang nayi 4qing za la ra alo.20shozan tung 90zan byvat zhe zhang, Jangdung xang Dangwui asuya mai wum-o gvat mu, Jangdung mai Xengang zhe e luq qo dum wo sairot dvo be, haumu Mangshi lo gvolvang nayi 1.5qing za la ra alo.2017zan zhe zhang, lam dik e gatdira qomo dum wo sai be, Jangdung mai Mangshi lo ri gi nayi 1qing so zhang wo zhe be. Wo mizving dvo ri, ngo dviq ashi kun myo su yvum bang gi qilveng hai awo, akui gi modo zo、modo mo、tolaji、moqtoq bve yvum⁃ kang yvummo zhaq wo bum be, layvum yvum bang zhe modo bve isum cham yvang wo wui dvo be, haumu wabyu wui ka e ka lo ri re ashau yvang yo be. Ngo dviqzvang zhong doq ashi kun, ngamoq doq e zhong gi wase eq jvap dvo e yvumzheq zo za ngvut mu, maupong zhang gi bumlai hik, mauwo zhang gi wilam ma mau⁃ mo wo, zhongkau ma mauzo wo dut mu, ngamoq e laigva buk ri anum num zang bat dveq le zhvat dut lo e. Akui, Dang e tungzam dvira ge e mizho, kinyi le zhongzo bve gi zhvoi dik ge dik e yvumkau ma yvang zhong myang doq, denshi dennau ga e ri zhongkau ma myang chung be.Akui zhongmoq paqzhvi zhe gvunggat lo e mizho, 2021zan Jangdung ma 3yuq zhongzo gi yanjusheng wo bi kauwang bigvo, 100yuq myit zhongzo gi zho⁃ wo kangmo ma dvanmyvang zhongmo ma wo bi kau wang bum bigvo ngvut ra. Haumu, nga e yvummau ma zhongmvoq zhimu zui qo ri zhe ri zhe gvunggat lo be.

  20shozan tung 80zan byvat ri, ngamoq wapung ma gi loq eq lving bat le zhung zhvinvan lalvum za zhoq e, zhvinvan bat e ri re zhaq yak e.Akui byvatsik ma, yuqkang yuq⁃ mo loqbat zhvinvan wo, yvumkang yvummo denshi、dennau wo, yvumkau ma den byixang、 den fanbau、den ciluq bve zhakze ri wo wui bum be, lai lui wangloq datbyvung ma ze-ung zewui, wuixin mai ngun ge toq geyu, numnang wui eq ri myoqmyang myoq dang ge nyo lvum gvun be……

    Nganvung Zhunggo mingdan kaqo ri zhe ri zhe gvunggat lo e mizho, logidat paqzhvi zhe ri zhe ringzhat lo be byvat ma, nga e yvummau ri zhe ri zhe ge zhe nyingon lo ra ri ngo lumzhing dvo ra! (Ling Ruhau)