1. Kungzi maiwang zhat yan alum ming，myinkon gvam migva yoq chang qo eq nvikngap myitshop qo myitrot ra.

　　2. Daxangdang xi zhiwo bang ga gvo ri：“Kungzi kikkam dik rvo! Yvang paqzhvi gvung dik mu, yvang ri zhvungzhvuq kaqo mai za age dai qeon”ga. Kungzi dang xi wojo mai，yvang e zhongzo bve ri daijvo e gi：“Ngo zhvungzhvuq zhimu kaqo zhe dat gvung ra dvi?Lvengkang(lvenggvon) qo lvu?Angvut mu gi laibik qo lvu?Ngo lvengkang qo gat le nan ngvu ba gveq” ga.

　　3. Kungzi ga ri：“Zhi bvanchoq eq sai e pau muqjvup zvung ri, paushuq misat dvo qo ma ang le. Akui pyang banshoq bang jvup e gi seqing bvannoq mvuqjvup zhvat，xigvum gokun le myvo a langsa，banshoq bang gvut e qo ngo zhaq myitrot le. Zauwui kokam ri e toqshit zhang, wapmo qitang mai hi e bvai agvo，xiri paushuq ma ang le. Akui pyang banshoq bang wapmo umtung ma chom bvai e xigi lunrong rong e la dut alo. Banshoq bang gvut e aqum ga gvilvang，ngo gi wapmo qitang mai bvai shang ngvu le” ga.

　　4. Kungzi ashop laijvang 4qo lai byvam be：1qo haidu hai akat myit sungam; 2qo lai ra zhang ma alai agvut; 3qo yvumsing myit dvo mai alai agvut; 4qo yvumsing hi bau za amyit.

　　5. Kungzi ri Kongmau bang eq lvom qum dvo gvo kun, Kungzi dai e gi: “Zhuwenwang shi byuq tang, Zhuchau byvat ma e paushuq laili mu-ngui bve banshoq ngo zhvat ban se dvo be wa?Girai yvang pau- shuq laili xibve zhom byvam nau le laga ri, ngo adat myang mvoqse yu；Girai yvang paushuq laili xibve azhom nau byvam zhang, Kongmau bang yvangmoq ngo ri kasu adat gvut gvo kai”ga.

　　6. Kokam yvum gon zau Taizai Zigung ri myi e gi:“Kungfuzi gi sedat wa ngvut be kai ma?Yvang haimu lui xi myvo ban dat se le lva?”ga. Zigung dvudai e gi: “Xigi girai yvang ri sedat wa gvut nvang mu，hairi yvang ri zhvat qom mvoqse byi mu ngvut ra”ga. Kungzi dang xi wojo mai dai e gi：“Taizai ngo ri kasu dat se ra lvu?Zoshang kun le ngo jamji jo byu za dut mu, jamji jo zhimu ban wo mvoqse yu e. Paqzhvi byu laga ri zhimu xi myvo kama dat se ra lvu?Adat se be”ga.

　　7. Kungzi e zhongzo Zilau ga ri: “Kungzi dai wu e dang, ngo ram dvo kun zau a myang gvut mu sheq, zhimu xi myvo la myang mvoqse yu e”ga.

　　8. Kungzi ga ri：“Ngo paqzhvi bo ra dvi?Dvup yvang abo o. Yvummau byu layuq ngo ri myi e qo, ngo lazvui ri ase gu e, lashut e myiwu wu gvut wo myise yu mai, yvang ri dum daijvo e” ga.

　　9. Kungzi ga ri：“Shangbang ngvoqseng alo lo，Hongho lang ma e Muzhvurung lvo ri atoq shit lo, nga byvat tang ra dut be o！”ga.

　　10. Kungzi gi shipum wut su ri tunghui, a ngvut zhang zaubu wut su eq myoqzhit su ri tunghui zhang, yvang toq dviq ri ngvut gvi- lvang, tep za lvom yaplvai gvat ra. Haubang nam mai solai e kun ri, cek za solai byuq ra.

　　11. Yenhui nvikbyoq dang dai e gi isu ga：“Sira dai e paqzhvi eq paushuq gi，ngo maungvang ngvang shoq byuwu dvo zhang，zhe wu zhe gvomyvang lo byuq e su ga；Ngo qik shinoq wikchoq wu gvilvang, zhe wik choq zhang zhe awo wikchoq e su ga. Wu dvo ri hima zhoq dvo e su dut be ngvu zhang, lazup zhang nungtang qo lo zhoq dvo e su dum dut. Sira yvang ngo ri lagvam gvam mai dat mvoqjvo ra，labau laigva buk ma e paqzhvi ngo ri mvoq byi, pyinli paushuq yung mai ngo dai lo dang eq gvut lo qo qauzing byi gvut lui，nga paqzhvi mvoq qo wo dvono gvat ra ri adut. Nga wum-o lvang ban chung tum shoq changkat zhang, nga hima myvang dik ze le yaplvom dvo e suga, changqit lo nau gvilvang kasu gvut yvang adat wo changqit lo dyvo e”ga.

　　12. Kungzi no dvo kun，Zilu eq zhongzo layuq ri Kungzi e igvun sing zau gvut nvang mu，lupdu king monhen nvang be. Kungzi no lazvui ge lo mai dai e gi：“Zhungyuq nving zhaq myang mai xisu ngvut angvut gvut lo be. Ngo igvun zau awo e myang dvo ri，igvun zau wo su ri gvut byvong nvang mvau，ngo ori mvau ra?Girai ri mvau ra luq?Ngo igvun zau wu dvo e ma shi lo no, nga zhongzo nungmoq ximyvo bang wu dvo gvo e ma shi myoq chum lo nau ra，isu gvut ri zhe age gvo lvu?Nungmoq gi, ngo ri suwun mang yvum e paushuq yu mu amyang yvum zhang, ori ale waq myvup gvut qoyam ma dulveq dvo gvo ra luq?”ga.

　　13. Zigung myi e gi：“Xima yungdik e lungseng lazhap zhoq dvo ra, sidek kau ma gvat dvo ra lvu?Angvut mu gi paudap ze se e wuiloq byu ho mu ung byi gvat ra lvu?” ga. Kungzi dvudai e gi：“Ung byvam be，ung byvam be！Ngo paudap zereng se su ri lang dvo le” ga.

　　(9bun aban shi, tangda dum wucoq aq)

　　Puqsu Pauqi Mudvom

　　Sumla soi su Muchin