Nganvung Zaizo amyvu gi, anvam byvat mai myiqom ri gi zhaq yvang zhvitdap pau- dvap qe-on gvungdvon lo bang ngvut le, hau mizho yvumsik wo gvut nyi ri yvumsik myiwang ga e tungking lalvum bo le.Yvumsik myiwang nyi mai gi, wapdoq myiqom myi gi agon age shi nvang age zhom nvang lo, byu za nyi dvo zhang gi, anum yvang lalum la-nye gvut myiqom myi mut dvo le.

　　O...

　　Kunyi buige zhang le o

　　Kumyin sunlik tung le o

　　Geding xi e wui ma o

　　Soding xi e yo ma o

　　Zaubui zum lo zau hi wang be

　　Wangnvam chung lo wa hi wang be

　　Zaushuq gom hi wang ba o

　　Poshuq gom hi wang ba o

　　Zauzo ban hi wang ba

　　Zaushuq ze hi wang ba

　　Zvonoq jvo hi wang ba

　　Zvonoq au hi wang ba

　　Do sumbvuq wang lo ba ngvu

　　Gui sumlvum wang lo ba ngvu

　　Kungtoq cau wang lo ba ngvu

　　Lvamdoq shang wang lo ba ngvu

　　Shamzau tu-nong wang lo be

　　Lvamzau linong wang lo be

　　Byu gapung zhvung wang lo be o

　　Wa tanggun moq wang lo be o

　　Mut lo ashum myi wang lo be o

　　Jvui lo azhom myi wang lo be o

　　Numnum byuze myi ngvut le

　　Shityang wado myi ngvut le

　　Coq bungum ging lo myi o

　　Gvat chinban bying lo myi o

　　Sumzai byuze ngaq lo myi o

　　Sumbun wadoq ngaq lo myi o

　　Shi mo bulun aze myi o

　　Shi mo zityam aze myi o

　　Myilun myizu aze myi o

　　Zaubui wapdoq lum lo myi o

　　Wangnvam gepung lum lo myi o

　　O...

　　Kunyi kumyin mai gi o

　　Catmo u jvui nyi be ra o

　　Yomo u jvui nyi be ra o

　　Waqdve u jvui nyi be ra o

　　Chochi u jvui nyi be ra o

　　Byuzo nyiwing nyi be ra o

　　Wazo nyizan nyi be ra o

　　Geding xi e wui gi o

　　Soding xi e yo gi o

　　Ulung yuilam ahui nyi lo ra o

　　Yangding nolam ahui nyi lo ra o

　　Zhvumpyu mausoq adip nyi lo ra o

　　Zvonoq myisoq adip nyi lo ra o

　　Myilik hingho hong wo nyi be ra o

　　Mangmyen ngunho ngun wo nyi be ra o

　　Gaubvo dvingbying nyi be ra o

　　Gaunang tanbying nyi be ra o

　　Racun adui nyi lo ra o

　　Rajik awui nyi lo ra o

　　Cangpoq nge nyi wo be ra o

　　Shipui tan nyi zvung be ra o

　　Nyingon wangzan nyi be ra o

　　Nyingon yapkap nyi be ra o

　　(Rung Lako)