1. Yen-yven(Yenhui; Ziyven) Kungzi ri:“Kisu gvut zhang sheq myitshop e ge ngvu ra lvu?”ga myi zhang, Kungzi dvudai e gi:“Yvumsing gung yvumsing wo gonzik, haigvut haimu lo ri paushuq qo chang mu wo gvut e lo zhang myitshop e ngvut be. Hairi isu zhvat laban wo gvut lo ri gvum, maumvuq o myidam toq ma myitshop bang zhvat dut bira. Byu myitshop su gvut ri banshoq yvumsing yvang zhvat gvut ra dut le, gobang ori dat wo lum ra lvu?” ga. Yen-yven:“Sira nang mai myitshop mu gvut qo dvunshit wu laq ma” ga zhang, Kungzi dum dai e gi:“Paushuq ma aang e ze kawu, paushuq ma aang e ze kijo, paushuq ma aang e ze kidai, paushuq ma aang e ze ki gvut” ga. Yen-yven jo gibu mu dum dai e gi:“Ngo go gvilvang, sira nang dai e dang xima chang mu gvut e lo bira”ga.

　　2. Zhunggung(Ran-yung) Kungzi ri:“Kisu gvut zhang sheq myitshop e ge ngvu ra lvu?”ga myi zhang, Kungzi dvudai e gi:“Welam ka muban toq lving wun ri, paudap bing dve eq lazhung za ngvut le; Mingbyu wui ri duinvang zhang gi girai sang ri ajvu dung e ja, yvumsing mai paushuq yu ge shit ra dut le. Yvumsing a-o nau e ze, subve ri ki dvik byi; Zauwap wang ri zauwui eq anvik noq ra su gvut zhe, zaunyi mau zhe lo ri zhiwo zau eq alvom nviknoq wo gvut zhe ra dut le” ga. Zhunggung jo gibu mu dai e gi:“Ngo go gvilvang, sira nang dai e su gvut e lo bira”ga.

　　3. Sima-nyu Kungzi ri:“Kisu gvut zhang sheq myitshop e ge ngvu ra lvu?”ga myi zhang, Kungzi dvudai e gi:“Myitshop su dangdai ri yvo mu dai le”ga. Sima-nyu jo mau lui myi e gi:“Dangdai ri yvo mu dai zhang myitshop e ge ngvu be dvi?”ga. Kungzi dum dvudai e gi：“Gvut zhang zhaq gvut wui le wa, dangdai e kun haimu ayvo ra dvi?”ga.

　　4. Sima-nyu Kungzi ri:“Waqngan layuq kisu gvut ra lvu?”ga myi zhang, Kungzi dvudai e gi:“Waqngan gi asing nan, ajuq wam”ga. Sima-nyu:“Asing nan, ajuq wam zhang, waq ngan wo dut be dvi?”ga dum myi zhang, Kungzi dum daijvo e gi:“Yvumsing hoqjuq zhiwo abo zhang, hairi dat singnan、juqwam ra lvu?”ga.

　　5. Sima-nyu myit uqi mu:“Subve gi nvikdvang wo agvo, ngo gi ngo bau nvikdvang ri awo o”ga dai zhang, Zixa daijvo e gi:“Ngo wo jo ri, shi eq byun gi myinkon, sut eq myung gi maumyvu kung ga, waqngan nving zui ra dut e mu lago zui, shutshai yui alvoq toq, byu ri kungga paudvap, paushuq misat dvo qo ma ang za chang gvut nyi zhang, maumvuq o ma nyi e byu banshoq yvumsing nvikdvang zhvat dut bira. Waqngan laga su nving nvikdvang awo ngvu myit uqi no amu be”ga.

　　6. Zizhvang Kungzi ri:“Kisu gvut zhang sheq zen e ge ngvu ra lvu?”ga myi zhang, Kungzi dvudai e gi:“Myigung ma izhvam zhvum wang e ja yinyin za mai zhvap gvat lo e dang dat jose, azhum zhveqzhveq yamcheq lo e su ga gumdvak dvak dai e dang ri dat jose zhang, zen e ge ngvu be. Zhvapgvat dang eq gumdvak dang mai nang ri awo lvoqpyoq zhang gi, nang ri wewu myoqzhang dat nyvau su layuq wo dut be”ga.

　　7. Zigung Kungzi ri “Mingdan gonkang ge qo” myi zhang, Kungzi daijvo e gi:“Guqzo cang bying, jeking wum luq, mingbyu wui zau ri lumzhing”ga. Zigung:“Xi 3zhung ma lazhung ayu byvam adut laga ri, kalvum yu byvam ra lvu?”ga myi zhang, Kungzi dai e gi:“Jeking yubyvam aq”ga. Zigung:“Myit dvo e xi 2zhung ma lazhung adum yubyvam adut laga ri, kazhung yubyvam ra lvu?”ga dum myi zhang, Kungzi dum dai e gi:“Guqzo yubyvam aq, byu nving anvam byvat mai dat shi le, mingbyu wui zau ri alum zhing mu be mai gi, mingdan ri adat wo zhoq dvo lo”ga.

　　8. Jizichen dai ri:“Waqngan gi nvikngap myitshop zhang ge be, atoq ma paushuq yu shit mvau e haubve hai lazhvum abo?”ga. Zigung dai e gi:“Joha ri mvai, sira nang wa waqngan dang isu ga dat dai e gvilvang. Dang nving daitoq be mai, myang 4du eq kat gvi- lvang awo katdvau yu lo be. Myitshop bvunwang gi laili paqzhvi, laili paqzhvi ri myitshop bvunwang ja, banshoq lazhung za aqak dik e ze la ngvut le. Lo shogvuq ma e shomau wuq byvam zhang, shomau wuq byvam e kui eq bainam shogvuq ja dat dut byuq le o”ga. (Aban shi tangda wu coq aq)

　　Puqsu Pauqi Mudvom

　　Sumla soisu Muchen