O...

　　Kucung kuzan le o

　　Cung eq zantai lo e nyi le o

　　Lvo eq qaptai lo e myin le o

　　Ulung cunggong nyi lut lo be o

　　Labyi zantum nyi byi lo be o

　　Anvik zancau ri gi lvuibyvam be o

　　Kuzan zansik ri gi dvonyu lve o

　　Lalung mun mai myilik hing wang lo aq o

　　Labyi bying mai mangmyen ngun wang lo aq o

　　Atung chin wang lo aq

　　Awui ut wang lo aq

　　Ngunho ngun ong aq

　　Hingho hing ong aq

　　Ze ho ze wo aq

　　Koq ho koq wo aq

　　Paqzhvi doq ri paqzhvi ongdang aq

　　Zau gvut ri zau dut aq

　　Po gvut ri po dut aq

　　Ge e zhvung dvonyu lve o

　　Lvo e ce dvonyu lve o

　　Cangwup ri zhup nyi be ra o

　　Cangbyo ri ngap nyi be ra o

　　Kucung kuzan mai gi kunlum utzhvip nyi

　　be ra o

　　Kunyi buige mai gi loqjo ze zhvip nyi be ra o

　　Racun adui ze wo nyi be ra o

　　Ra jik awui koq wo nyi be ra o

　　Lalung mun doq ri wunwan nyi be ra o

　　Labyi bying jo ri rumseng nyi be ra o

　　Ulung yuilam ri anyi hui lo ra

　　Yangding nolam ri anyi hui lo ra

　　Zhvumpyu mausoq ri anyi dip lo ra

　　Zvonoq myisoq ri anyi dip lo ra

　　Cammyvi ri anyi hui lo ra

　　Ujang ri anyi hui lo ra

　　Kuzan mai gi nyingon wangzan nyi be ra o...

　　O...

　　Azhvi awvoi e

　　Anu awa e

　　(Anyi byuq lo e gvobang wui ri za mying lage lang le)

　　Kunyi buige nyi le o

　　Kumyin sunlik tung le o

　　Ulung cunggong nyi lut be o

　　Labyi zantum nyi byi be o

　　Lvo eq qaptai nyi le o

　　Cung eq zantai myin le o

　　Lvonuq num lui qaptai be o

　　Cungnuq num lui zantai be o

　　Zaubui umtung sopo mo e

　　Wangnvam qitang somyvi mo e

　　Umtung pojui mo e

　　Qitang myvijui mo e

　　Nolo ungyang cun lo dving dvo be

　　Waqdung nvamce sho lo dving dvo be

　　Guqnyang sumcang wing dving dvo be

　　Ulung maunyang wing dving dvo be

　　Sangko chizhup wing dving dvo be

　　Sangnang manzhup o dving dvo be

　　Babva ekoi shicham dving dvo be

　　Ngunshang hingshang mvau nyve dvo be

　　Kucung zan mai gi layui anyi dip lo ra

　　Maulo zan mai gi lano anyi dip lo ra

　　Zhvumpyu mausoq anyi dip lo ra

　　Zvonoq myisoq anyi dip lo ra

　　Mauwum myibyang soq anyi dip lo ra

　　Myiwum zhangbyang soq anyi dip lo ra o

　　Kucung zan mai gi ge e zhvung dvonyu be

　　Kunyi bui mai gi lvo e ce dvonyu be

　　Byuze ngaq nyi ra zhvung dvonyu be

　　Wayuq do nyi ra ce dvonyu be o

　　Zaumu sumbum luq ra zhvung dvonyu lve

　　Utmu sumzhang bying ra ce dvonyu lve

　　Zausang kun ong nau ri

　　Loqsang ze wo nau ri

　　Zauzung dvang ging nau ri ngvu

　　Pono dvang ging nau ri ngvu

　　Zun dung lo le mau ngvop nau ri ngvu

　　Lo myi hing le wing pyit nau ri ngvu

　　Dangdai dang ong byi aq o

　　Ludai lu ong byi aq o

　　Myilik hingho hing ong byi aq o

　　Mangmyen ngunho ngun wo byi aq o

　　Lalung mun mai myilik hing wang lo aq

　　Labyi bying mai mangmyen ngun wang lo aq

　　Atung chin wang lo aq

　　Awui ut wang lo aq

　　Aho ze wang lo aq o

　　Sungung yvupmoq ngon nyi be ra

　　Nyiqui zhoqwo ngon nyi be ra

　　Woqpo shangzum toq nyi be ra

　　Nolo quizum yap nyi be ra

　　Lalung mundoq qo wunwan be ra

　　Labyi bying jo qo rumseng be ra

　　Paqzhvi zhongdoq paqzhvi ong be ra

　　Laili laigva zhongdoq zhong ong be ra

　　Laili zhongdoq cangpoq nge wo be ra

　　Laigva zhongdoq shipui tan zvung be ra

　　Amvoq dvungpyo be nyi be ra o

　　Asui shamlvo toq nyi be ra o

　　Azhvi awvoi e anu awa e

　　Cung eq zantai be

　　Myvijui po so e

　　Lvo eq qap tai be

　　Azing ze dvingdvo be o

　　Gau-an ze dvingdvo be o

　　Nang anyi duq ma nyi lo moq o

　　Nang ayap duq ma yap lo moq o

　　Nolo ungyang cun yu aq o

　　Waqdung nvamce cun yu aq o

　　Ulung maunyang wing yu aq koi

　　Sangko sangnang chizhup wing yu aq koi o

　　Zo ungwaq yu yo gveq koi o

　　Shuq qungqo yu yo gveq koi o

　　Umtung so po mo ri shuq aq koi

　　Qitang so myvi mo ri shuq aq koi

　　Rayvum byu wui ri nyingon wangzan lo be ra o

　　(Rung Lako)