Lvomo 11 qap 3 nyi ri, Mangshi Santaishan mauwa Jengo hozoshe ma nguingon dik agvo, xi ma shi zhe myozui e Jengo shigam qin qinglvum muzo、hozoshe ma bolom bang amyat gam muzo、Jengo shi ri gai e zoze zogvun muzo bve pongzui agvo.

     Santaishan mauwa ma, shi zhe myo zui e Jengo shigam qin muzo lazan ladam pong⁃ zui agvo, kizan qin qinglvum e muzo ma nguingon wo zhe myo、pongzui mu zhe kum⁃ zup ra, shi zhe myozui e Jengo shigam qin qinglvum、Jengo shitan koq qinglvum e mai lai lui hozoshe ma bolom bang ngun ka yuq kamyvo tuqhang e mai amyat ri gam lvum agvo, cemun koi myang gam yu bang ri bo、2、 3 hing koi myang gam yu bang ri bo, yuq kangmo myoqdong ma gibu wo ri za lamyang dvo alo. Jengo shi ri zoze ri zhaq ngvam ngvam za gvut gaizo agvo, Deq-ang zangsun gai sira bve nayi 2 qing gvo chomgai gvo⁃ zhang, Jengo woqsho、Jengo saq、Jengo shi⁃ wing bve numnang wui hi ma le dvamtoq bum be, banshoq bang lago yvang chomzo zha ngon gvun bigvo. Xi 2、3 zan, Santaishan mauwa bang mauwa zuiring dvoq qo ma wum coqcoq gvat⁃ toq gvolui，Auzhu-jengo zhaq myo shoq wo ho ge bum bigvo. Kinyi buinyi, mauwa gom ma e Auzhu-jengo yo lampyang 4 mun 6 hing mu myit zhe be, shi zui be yo gi mun mu gvo bo ra, xi mai wo ho e ngun gi 2300 munkoi. Santaishan mauwa Dang wapdoq asuya mai shui zuisai a-o ma, Auzhu-jengo saibyvong muzo、yvumsing zhiwo sutho seng mai byvong saitoq e ze qo nyang ma wo wang be, datbyvung mai ungtoq muzo ri wo zuisai e lo be, Jengo yo lalong momo gvut wo ho, yvumsing zhiwo mai saitoq e ze dizik wo lvoq⁃ toq lui adviqdviq za Jengo shigam xi Deq-ang mingbyu wui e ngungam hinggam dut dvo be. Xi 2、3 zan, Jengo shiho mingbyu wui zhimu mvoqbvan、Jengo ho zhimu paqzhvi muzui pung bang zhimu paqzhvi dvun⁃ shit gvut lui Jengo shiho muzo dingman za gvut wozui zhatdoq agvo, xi mai lai lui mau⁃ wa Dang wapdoq asuya bang Jengo zhimu zuiring qo ma wum-o gvattoq mu azhung zhung e Jengo zoze wo byvongsai toq bum be, “Deq-ang Jengo ”ga e dizik long ri wo dung bigvo, kizan kau ma wo byvong saitoq ung ra dut ra. Santaishan mauwa mudve zau Li Zhunxing dai ri：A-o gvam ma ngamoq Jengo muzo zuisai qo ma wum-o sai gvattoq lui Jengo sutho seng ri tuq girum, Jengo wuiyu qo ma mingbyu wui e gewang ri migum byi gvut mauwa zuiring dvoq muzo ma gedik e zuisai zhimu tuktoq byi ra ngvut le ga. (Puqsu Mangshang Langdving)