2023 zan lvomo 1 qap 8 nyi napjvo nayi 8 qing ri, Ruili myuq Zhegau zhiwo mingdan kummo dong bangmo ma, asik jvepjvep e wuxinhungqi dongkon dvoq gvat e mai, Ruili mingdan kummo dong dum ponggvat begvo.

　　Ruili maujvo toqwang muzhep jedap zhanzhang, maujvo kummo dong kangmo ma e bilik je bve ri kumpong aming qo gvat eq, Ruili maujvo toqwang mingdan kummo dong laha yvang pong gvat begvo, maujvo toqwang bang rara za gvut chom yapzap gvilui maujvo toqwang qo ma zhepwu nvang agvo.

　　Zhegau gi nganvung mingdan mauyam ponglam mu zuisai tang ma, mingdan zvang ma nambat sanghi fa maujvo sutho zhiwo gvut dongbyi zhang ngvut le, mingdan ma e sanghi fa midung pongring zhvam zhiwo la- lvum ngvut le、Zhunggo(Yunnan)yvumsing gvam e su sutho zhiwo kau ma e midung zhiwo lalvum ngvut le, Zhunggo eq Myenming chompye chomzui chomchung e Ruili eq Muzhe maujvo laidap e midung sutho zhiwo ri ngvut le.

　　Zvutmun notang muzo asik latung wang lo tang ma, Ruili myuq bang azhung zhung e paqzhvi toq lui Zhegau zoshuq nyiyap qo dum wo dvoq lo muzo、sutho seng zhimu dum pongzui muzo zuisai e lo gvo e ngvut le. Akui u, Zhegau zhiwo kau ma ga mingdan sutze dvam-ung muzo dum pongzui lo be, lungseng ung gaizhang 5 lvum ri zansik hi ma dum pong begvo, lungseng ung muzo dum pongzui qo ma azhung zhung e gewang bo tungzam paqzhvi ri zhaq toqzui begvo ngvut ra.

　　Ruili mingdan kummo dong gi mingdan lazvang maujvo toqwang mingdan kummo dong ngvut le, Zhunggo eq Myenming wuiloq gvutzo lvum qo ma zhe gvo e myigung qo ma e maujvo toqwang kummo dong ngvut le, mingdan jiro toqwang qokat、Zhunggo eq Myenming gaiwang lvum qokat、azing ze toqwang qokat xi 3 kat ri aqum e dong gonzui e kummo dong ngvut le, byu toqwang qo、moqtoq eq modo zhipzo toqwang qo、azing ze lang modo mo toqwang qo ma zhepwu e wunmu wun dvo le. Zhak mai lvom zhepwu qo 16 kat, byu eq lvom zhepwu qo 44 kat, zelang modo ri zhepwu qo 22 kat tong dvo le, la-u za ma 82 yuq ri wo zheplvai le, layuq ri zheplvai ri nayi 14 myau za o le, Zhunggo eq Myenming maujvo toqwang qo ma toqwang byu zhe myo e mingdan maujvo kummo dong ngvut le, maujvo toqwang kummo dong xilvum gi, Myenming Muzhe eq coqlvum dvo le, xi mai toqwang e sutze gi yvumkau igvun kingze、zhakze、miyu le nyiyap qo ma chung ze、noijvot、shicham、 yomu ze bve qing zhung yvang bo le.

　　Myang myise ri, maujvo toqwang kum dum pong tang ma, maujvo toqwang byu e jenkangma o no ara, nayi 48 qing kau ma e heson gvut ri yinxin dut e xi za o le, maujvo toqwang e zelang modo gi, noq mai Haigvon rungwap ma modo gvon su eq modo qanglu shitjvo lui akang dung dvo e mai ge toqwang be ga.

　　(Puqsu Mangshang Langdving)