Wap ma lusik Lvomo 1 qap 28 nyi ri, ming wapdoq ming asuya bang 2023 zan lvomo 1 qap mai 3 qap gu le amu rvazui zuppong eq amu pongzui zuppong pong agvo.

　　Ming wapdoq shuji Wangning zuppong zhe bolom lui dang le dai ra, ming wapdoq fushuji、ming-up zau Wang Yibvo zuppong zhvungzui lui amu zvang dai hun ra.

　　Sikung mau Dang wapdoq asuya nvikbo Jangshan、Sunjeq、Hong Liyun、Gvaumui、Zhau Dvungmui、Zhen Hungyun、Zhen Yunggong、Xeqlin、Funghau、Dung Qiran、Pung Wunhai、Yangyen、Loq Hungyi bve Sikung zuppong wap mai chom pongwu agvo.

　　Mau wapdoq fushuji、mau-up zau Wuigang gi Sikung ma e gungtai gvut lui muzo shitjvo ra.

　　Zuppong ma dai gvo ri, kizan lvomo 1 qap mai 3 qap gu, minggom ma e midung muzo pongzui e zhaq ge ra, minggom atoq a-o bang adui gvut zhoqdvo zhung ze ma ngunpun gvat muzo、zhimu zui qo ma ngunpun gvat muzo、mingbyu ngunpun gvat muzo、sutmu ngvenwang muzo、midung muzo zuisai qo bve amu lawan zuizhat doq ra le. Dang wapdoq asuya ma e zhe gvo su nvikbo uhi she lui sutmu ngvenwang qo wumgvat shui zuisai, musik panzui qo chang、mili migum qo chang、coqcoq ringzhat qo chang lui zuisai e lo ra le, ming wapdoq ming asuya mai pyaitoq e 3 zan henzui qo chang, bvunwang sutgan ringzhat qo、maujvo sutgan qo、zhakmu sutgan qo chang lui ge e zhimu、ge e sutho seng shui hang ra le. Sutgan zui zhatdoq qo ma uhi she ajvu zuitoq ra le. Maumyi chung qo、mili sanseng qo、myidat dvoq qo、modo qo bve ma amu zuibyi amaq kam ra le, amu lo zuisai nyi zhang miyvang wangzhe lui wuiyak mu piran byi ra le. zhiwo kangmo rungwap kangmo bang, sutho mu ngvenwang qo zvang lagvam mai sai ponglam zuisai, midung muzo zuisai qo ma zhepgve ra wum-o sai gvattoq, zhimu oyuq zhe wo zuige ngvu qingzui lvum mu pongzui le gvut zhimu zhe wo zuige e ming gvut zuisai qo ma ajvu sik zuitoq ra le ga.

　　2023 zan lvomo 1 qap mai 3 qap ri, Sikung mau mai asik pongzui ra hen dvo e zhimu gi 10 lvum, xi kau ma ngun dvung koi atoq gu tuqhang ra zhimu gi 7 lvum ngvut ra, banshoq ma tuqhang ra ngun gi 14 dvung 9 xing mun koi, zangom le muzo ma tuqhang ra hen dvo e ngun gi 7 dvung 2 xing mun koi ngvut ra. Kizan asik pongzui ra muzo xi bve 2022 zan lvomo 10 qap mai 12 qap ri pongzui e amu eq wui ra、zangom ma tuqhang ra ga hendvo e ngun gi 5 dvung koi zhatdoq ra.

　　(Puqsu Mangshang Langdving)