Wap ma lusik Lvomo 2 qap 15 nyi napjvo ri, Sikung Sam Zaizo amyvu yvumsing upkang mau Zhunggo mingbyu upkang dvira bongban wapdoq nambat 13 cik suwun wap nambat 2 da zuppong Mangshi ma kikdik shoq ponghi gvat bigvo.

　　Zhunggung Sikung mau wapdoq shuji、Ruili mingdan zvang pongring zhvam zhiwo Dang gungwui shuji、Gonwuihui zhuren Jangshan, mau wapdoq fushuji、mau-up zau Wuigang, mau wapdoq fushuji、mau wapdoq kojvo rung rung-up Sunje, mau mingbyu gungtai wapdoq zhuren Li Zhenhon bve zuppong ma zhe gvungdvon gvilui zuppong zhvung ma le zhe zung agvo.

　　Zuppong ma e muwun ningbo gi Hong Liyun、Zhau Haiwui、Yang Shizhvong、Lichon、Yangxin、Yangyen、Hoqin、Liqi bve ngvut ra. Mau upkang dvira bongban wapdoq ma e suwun wui ri zuppong zhvung ma le zhe zung agvo.

　　Zuppong muwun ningbo Zhau Haiwui gi zuppong zhvungzui ra.

　　Napjvo nayi 9 qing ri, zuppong mo ponghi gvat kun, banshoq bang dvoqyap lui 《Zhungfa mingbyu muhum mingdan mikon》chom kon agvo.

　　Xi dam zuppong zhe bolom ra suwun wui gi 276 yuq, wo zhe bolom bang gi 259 yuq, dvira misat gvegan ma ang ra.

　　Jangshan gi Zhunggung Sikung mau wapdoq ma e gungtai gvut lui zuppong mo pong e ri gvungdvon ra, maugom zvang kangmo upkang dvira bongban wapdoq eq upkang dvira bongban suwun wui, maugom sutgan muzo zuisai qo ma gvattoq e ajvu ri zhaqyvang dai qeon ra, maugom zvang kangmo upkang dvira bongban wapdoq eq upkang dvira bongban suwun wui, Xi Jinpyin byvatsik Zhunggo zongsam bo e shehui zhuyi myit misa mai dvunshit dvo qo chang, Dang e 20 da zuppong zhvum banban mvoqchang e lo lui, Sikung ganzvang myvang e muzo qi- gvam mo wozui tot qo ma paqzhvi wum-o gvattoq ra ri lumzhing le ga.

　　Jangshan dai ri, Dang eq shuion qo banban chang, “2 lvum doqdan”qo imyit adui chang、“2 lvum migum muzo”wo shoq gvut zhe ra le. Mingbyu yvumsing gvut qo ri zuisai muqo banshoq ma chung wang lo, mingbyu upkang dvira bongban muzo gi mingbyu wui midvu chom bongban le ngvu e zuisai qo chang, amu bongban wapdoq ma e ajvu langtoq lui mingbyu wui eq loq lago coq e lo, chom pyetoq lvum e tungzam paqzhvi chom zuisai gvut ra le. Byvatsik ma shigut shizhaq qo chang lui aqo qo ma e rapra wum-o langzving mu Sikung ganzvang myvang e muzo qigvam mo zuitot qo ma wum-o chom gvattoq ra le. Upkang dvira bongban wapdoq ma e suwun pung eq rungwap ganbu bve e pungmu saizui ging, amu zuisai laijvang ge wun, paqzhvi pyetoq ganzvang lvoqmyvang, mingzo danzo ri uhi she ge shit gvut byvatsik upkang dvira bongban wapdoq suwun wui e wupsam sik dvamtoq shit ra le ga.

　　Jangshan dumdai ri, upkang dvira bongban wapdoq ma e muzo gi maugom midung muzo kau ma e lawam ngvut le, mau wapdoq mau asuya eq zvang kangmo rungwap kangmo bang, maugom zvang kangmo upkang dvira bongban wapdoq ma e wunzui muzo ri wumbo wum eq nvikqik ra le ga.

　　Hong Liyun gi Sikung mau upkang dvira bongban wapdoq nambat 13 cik suwun wap zhvungzui suwun pung ma e gungtai gvut lui, zuppong mo ma amu le shitjvo ra. Shitjvo muzo ma dai dvo ri, lazan mai xi gu, mau upkang dvira bongban wapdoq nambat 13 cik suwun wui, Xi Jinpyin byvatsik Zhunggo zongsam bo e shehui zhuyi myit misa ri kanvam ri dvunshit qo gvut dvo, Dang e 20 da zuppong zhvum kojvo mvoqchang qo ri zan gom le dvira upkang wunmu gvut dvo ra le, myithui muzo eq mingbyu yvumsing gvut qo ri aqak gvut zuisai, upkang dvira bongban wapdoq ma e ajvu langtoq ge, upkang dvira bongban mu wunzui ge、mingbyu wui eq zhepwu nyi qo ri kam yu、muzo zuisai wang lo ra paqzhvi botoq chung, aqo qo ma e wum-o langzving, “14 da 5 zan henzui muzo”, zvutmun notang muzo, myungko qut mu wozui ong dvo e ongshi saizui ging qo eq mauwa ringdvoq mu bve midung muzo wumgvat zuisai wang lo lui, mau gom sutgan muzo eq haimu atoq e dingman muzo ma paqzhvi wum-o sik gvattoq ra le ga.

　　(4long ma lo wucoq aq)