Chyinghkai Nu a jasu nsen

Ningsin hpe jahprang dat sai

Ngai hka nhtung gun hpai let

Lago gaman hte 

Hkaro gata na hka htung de 

Hka nnan ja mat wa sai

Hka htung dai

Madui hka seng hpring nga 

Shani shagu san tsom ai hka lui jat

Shi go bum ga na myit mada lam langai re

Shaning nnan shani

San seng ai myit masin ni

Nye a nhtung gata de

Hpring hpring bang ton da sai

Dui la ai hka dai ni

Nhtung hku lui pru wa ai shaloi

Laning mi tup na wunli yong go

Lu la na chyalu sha re 

NU GO GATNYENG TAI NNA PYEN MAT WA

(1)

Nu hpe hpai na shani

Gatnyeng wanong mi

Gara ko nna pyen sa ai re n chye

Nu a nhtung e “Ung... Ung...” nga pyen n sim

Dagok e nu n sha ma ai

Salum hte seng ai tsi palin

Sumpum mi go

Gatnyeng e shinggrup ai gata hta

Nu hte rau azim sha yup nga ai

Gatnyeng ni go hpa n ra ai zon

Madu hkrai pyen pru pyen shang rai

Kyin bu nga ma ai

Masha a si hka yon hkyen mung 

N mu lom ya

Shanhte n chye ai

Hkrung nga ta ai gasha jan

Shanhte na langai tai nna

Tinang ganu hte gade no gahte mayu

(2)

Nu go gatnyeng tai nna pyen mat wa ai re

Shi gara hku rai tim 

Wa a ga madat nna

Dagok na tsi hte ahtang ni hpe 

Kyet la ai hkum hte 

Htot la ai hta n-ga

Wa a jahtum na myiprui si mung

La mat wa sai

Bai htingra ta, htingra ta na nampan

Simai sun namsi hpun ni mung

Gaga nta ga de htot kau sai

Dai nta grupyin go hka shi hte hkauna rai

Yisun hkauna hta hkai ton ai go

Wa sha ra ai namsi namso simai hte 

Wa a gabu hpa rai nga ai

Hka hta n-goi la-tum mahkrai hkrai ton

Wa nta ting na nga wanong dun nna 

Lawan wan shi hte 

Sa hkrum la na 

Shi re majo

Matsat ning ting hpang hkrat ai wa 

Hkrung nga yang 

Myit hpung kro mat 

BUGA NA NBUNG

Buga na nbung

Bum pungding e bung wa bung sa

Buga na mahkon mangui gut shabra

Gabye n ma ai hkumpup hkumpa mung no nga

Buga na nbung

Bum pungding e bung wa bung sa

Chyinghkai nu a shangu nta gut satsang 

Galoi mung nsam n lai ai matsun mung no

Buga na nbung 

Bum pungding e bung chyu bung

Nu a marung gut mago

Chyinghkai nu a wunyo myiman e

Lagrat gut shakap

Gale ai：Nhkum Bok

   《Wunpong》hkumhpa laika go 1981 ning shata 8 pro 1 ya shani shalat hpang ai re. Laika shapro lakmat nambat 53-1028/I, shi go ya yang Miwa mung hta Jinghpo ni a tara shang ai hkumhpa hparat laika buk langai rai to nga ai, laning mi mali lang shapro nna, lado mi hta galang lang shapro ga ai, daining du yang 133 lang shapro lai wa sai.

  《Wunpong》hkumhpa laika buk hta: Sumrai, ga shagop, kumyai, mabyin masa, htunghking ningli, labau lara, maumui mausa, machye machyang, shiga, sumla, datbung re laika ngau ni bang ga ai.

Hkringdat: Sakhkung mungdo Mangshi Yungham gat lam 14-41,   

《Wunpong》ka shinggyin hpung mangshi

芒市勇罕街14-41号 

Laika ngau shagun jo hkringdat: 784655328@qq.com

Chyenan: 0692-2121820

Mu madu:Hpaudo Bok Tong