Jahpot Nnau Brang Nan ni a nta ko manap shat sha la rai, Nnau ga a sinpro maga de modo hte ninghpu she hput rai, lam gade ndam ai hku hkom mat wa saga ai.

             Lam dung lawu lahta hkan apreng preng re byinlang hpun makau e, soyi lap galup ai gaji ji lo ai ntsa nta hpe yu yang, grai gatsi pyo na zon rai nga ai, hkauna pa makau hkan e, hkauna shap galo ai masha ni rong ai ginsum mahtang mi re,hkauna sa galo yang jan marang gan gyi hkringsa ai shara mahtang mi re, ginsum zon re nta grai nga ta sai, ya hte yu hkom lai wa ai kon maram lu ai, ndai ginra hta nga shanu ai masha ni ja gumhpro gade lu tim, dum nta hpe grai jahtap jahtuk let galo shakya rong ai htinggo nlo ai.

              Daini go bumlang shagong mung mu mada sai, marai lahkong pyi ahpum npot na zon re kadung hpun gaba ni hta ahkye hkye re kadung pu pu tsom nga ai.Lam dung lahta de hpun kran ai masha lahkong hpe mu mada dat ai hte, ta dingsi let gintan dat ga ai, shan a makau ko loi lasi lasi re magui langai mung tsap nga ai, ganing nga tim, magui hte hpun garot shangun ai yan re ngu myit la ai, maling mala gata hku modo hte galik gale ganyi ganga rai loi hkom ai htom, modo ninghpu maling ko wa chya mat sai, yu hkom na matu chyinghka hpong di lago hpe ga de jahkrat dat ai hte, hpuk nga ai ninghpu go lahto du hkra lim lung wa ra ai, hkra maga de san tsom gyigo let lui hkrat wa ai hkanu langai gasho nga ai, gatsi bungli hpyi hpyi nga bung ahpyi nga ai, sumprang hte nga gap ai ni.

 Nga mano ai ni hka hpunla ja ai shara hkan, hka kau hkan, le ko lahkong mi, wo ko masum mi rai htingko let nga hkui nga ma ai, anhte yen hkrai wa jang, gaya nna kun, nga hkui brang kau mi, hka hprohpra she shara hkra hprong mat wa masai, yungui shayi ni go san tsom ai hkanu hpe mu ai hte san tsem mahku sho let shapyo bang wa masai, nu num kau go madu yu sharong ra ai lungja gasha hpe hta ma ai, zaibru jang zinglong hku loi bai matut hkom ai hpang, won lahkong masum hkring nga la ai hka kau ko modo bai jahkring dat sai.

                   Myau ga sa ai lam hta hkanu gaba langai no din nga ai, hkanu ndai go Miwa mung Dibyet bum kon lui yu hkrat wa ai Diyun hka ngu ai re, hka san tsom ai lam go pat hte bung nga ai, hka gata de nlung gade lo hpum to nga ai hpe mu ai, nga gade lo ai hkom ai mung asan sha mu lu ai, lagyi gatsi pyo la ai, wora hkran hka kau hkan buhpun palong gashin gamun ai masha ni nga nga ma ni, akrin akru re ma ni hkinggau tso tso kon hka de gumhton bang let hka gasup ai ma ni garu hte chyi lo, grupyin yo nlo to si nga ai ten hta, manang ni won de lup lup rai, won jon mat wa sai, Myau ga sa na matu hka won no htot jon ra nga ai.Masha hkrai sha jon ai bo rai sam ai ngu yang, modo du hkra won jon na hku bai rai to nga sai, won lahkong hpe matut ton ai ko hpungpe mara ton in, modo got bang rai, modo htu shalai ai hpe n mu yu ai ngai go, yu tsang, yu mau let olo to nga ni ai.

Hpunpyen hte galo ai won jon let san tsom ai Diyun hkanu ntsa e tsot lai wa ai yang, gade pyo ai ngu go laika si hte sha dang ka shapro nrai nga ai, hka nam bungshi sisi nga bung ahpyi, tsit lali tsom ai Bung yau bum hte Mali kong bum, Je nam bum ni shinggrup da, grau tsan ai shara de wan numshi gaup da nna, bum ni dan ndan rai nga ai,anhte go sumla gata e soi da ai sumla zon she rai nga saga ai.    

     Diyun hka rap, lungdin lungrak kong lai, hka kau ko ginsum langai gap da ai, won htu shalai ai masha ni a hkringsa shara rai jo ai ngu tak la ai, zaibru jang zinlong hta mahko si hpun ahpra tu jong nga ai, loi hkom ai hte hka kau ntsa ko soyi lap hte gap da ai kawa pinra langai mu mada ai, gadai a shat seng rai kun ngu myit let hkom nga ni ai, nye shong ko hkom nga ai Jau Lat tsun jang she chye ai, dai go Myau ga na ni anhte hpe nseng woi seng chyai na matu la nga ai re nga, aga! Pyo pyo go Jinghpo ni zon rai pyo mu nga ai ga hpe dum dat jang, teng na zon mung she rai nga ai, hka kau ko pyo chyai pinra sa gap da na bai myit dum da, bungsoi soi let pyo chyai na shara gaja nan rai nga ai.Langai hpang langai rai hka kau na ginsum de jahkying hkrat wa saga ai,manau ko chye hkat la ai Myau ga na tsi sara Nhkum LatGam ni gabu gara hte bai hkap tau la ai hkrum sai, yong du hkum ai hte Myau ga na hpunau ni anhte hpe Hka hku dubat langai hpra hpra du ko hkap gumhpyau gali kumhpa ya ai hte, ngai a myit shingran go, Dibyet amyu ni sumtsan manam ni hpe hkap tau la shaloi mung dubat hkap kumhpa ai hpe dum dat ni ai, dubat grai tsom ai, du lum ai hta n-ga, krowang sindung du hkra num nga saga ai.

   Shachyan shaga ngut ai htom, Myau buga na myu sha ni anhte hpe hkungga lara hte htunghking ningli shat lik bai gun jo ma ai, sara ma Maiji Bok kon anhte hpung a gong malai hku nna, Sakhkung mungdo kon gun sa wa ai nlo nla re dinghkru hpa-lap lahkong hte tsora myit htang nu ai, shat lik hpya sha ya na matu ahko ahkang madun ai shaloi, “Mok, ndai go gui la ni a re.” Nga shat lik langai la ni hpe hpai ap ya let, lagoi hpo ko gumhpro matet bang ai lahpo matep mung sa ap ma ai, akam e sha anhte hpung na la ni Jinghpo ga n chye ai Miwa la ni hkrai rai nna she rai sai, lama Jinghpo ga chye madat ai she rai yang go, manang hpe me gui la nga ai go ngu nhtu nhkru sho garu hkat mayu na wa nrai i, dai go Hka hku ga manong rai nga ai, la gaja ni ngu shagrau ai re hpe mung chye la saga ai. Moi Hka hku ga magui grai rem ai, magui go n-gun ja ai, marai rong ai dusat re majo, masha hpe shakon shagrau mayu ai shaloi magui hte shabung shapre let gui ngu tsun shalen mat wa ai kon, daini na gui la byin wa ai re nga, du yu, na yu, mu yu, madu nan hkum hkrum madung ahkyak ai go ndai ko rai sai.

    Hka kau ko Myau ga na hpunau ni lajang da ai htunghking malu masha jom sha la rai, Mare de Pasi Htu Ing a nta de wa gan shang dung da ga ngu bai hka bra na hkyem saga ai, yong hpe shakran shagu, ashuk nga hkrap ai nsen chyu na ai ngai go, ladi hkri wa ai hte sumrom myiprui ndang sharang na tsang rai, shada man chyo yu na nwan, Jiwoi mungdan de wa marit lu yo, la nga na, bai hkrum ga oi sha ngu let langai hte langai hpe shakram kau da saga ai. Ndai lang Umbon pyisa ga du yang, shara mi ko du, shara mi ko jom hkrap hkrap re zon sha anon kau da ni ai. Ya sha myiprui si hte bya rai no hkrap npyet nga ai nu num ni go, lam makau ko magui got ai shabrang langai lai wa ai hte, myiprui si sha gatsut ari kau rai, hkrap nsen manong hkrai nga ai jahtau nsen hte magui got ai brangla hpang de bai ni hkrat wa masai.

   Pasi Htu Ing a htingnu hta hpa-lap, ngachyu hpa-lap, muk ni bai wa sha chyai ga ai. Ngachyu hpa-lap grai mu dum kau da sai, nta madu jan tsun dan ai, shi go lam galo ai, hpun hpaga galo ai, lamu ga hkying lam hku lu ai, num gasha masum mung num wa ram sai, Miwa ga de na da-ma tam mayu ai nga ga bungsan shakra u ai. Rot mu lo, suthte gale mayu ai Wunpong brang la ni e, mau nga na ten n rai sai. 

   Moi go Myau ga hpe Bung yau ga she nga ma ai da, hka kau ko nga ai majo, nbung grai bung ra ai shara rai nna, Bung yau ngu shamying ai re nga, teng sha dai shani ginsum gata ko dung jahta chyai ai ten hta raitim, bungli gatsi grai bung ahpyi to nga ai, Bung yau mare ko lai wa sai nambat lahkong mungkan majan ten hta, sumtsan majan rot ai Miwa hpro hpyen ni hte maigan munghpong hpyen ni a hpyendap dabang jahkrat da ai shara langai re nga, maten daini du hkra hpunnu hpungam kau mi hta bom chyen, pala si ni hpring chyat to ai sakse mu lu ai, Myau ga go Lido lam hte mung ni to nga ai, Luito lam (Lido) go Yinnan mungdo gaba Hkunmyin kon Munghpom Myen mung ko du yang deng 1146.1 galu nna, Umbon pyisa ga deng 64 du hkra no galo matut da ai nga, Luito modo lam mying lu wa ai lam hpe Myau ga na ni hkap shachyan da ma ai, maigan hpyenla ni hpe hka sharap na matu, hpun kran nhtom won do, li do galo rai, lu wa ai Lido shingteng amying re nga ai. Nhtang wa ai ten hta nsin sin mat nna Lido lam hpe atsom nlu yu da in mung myit grai n mu nga sai, raitim, bai gatut na hpe myit mada da ai oi.

    《Wunpong》hkumhpa laika go 1981 ning shata 8 pro 1 ya shani shalat hpang ai re. Laika shapro lakmat nambat 53-1028/I, shi go ya yang Miwa mung hta Jinghpo ni a tara shang ai hkumhpa hparat laika buk langai rai to nga ai, laning mi mali lang shapro nna, lado mi hta galang lang shapro ga ai, daining du yang 134 lang shapro lai wa sai.

 《Wunpong》hkumhpa laika buk hta: Sumrai, ga shagop, kum yai, mabyin masa, htunghking ningli, labau lara, maumui mausa, machye machyang, shiga, sumla, datbung re laika ngau ni bang ga ai.

  Laika ngau shagun jo hkringdat: 784655328@qq.com

  Hkringdat: Sakhkung mungdo Mangshi Yungham gat lam 14-41,   

          《Wunpong》ka shinggyin hpung

  Chyenan: 0692-2121820

  Mu madu:Hpaudo Bok Tong

  Zazek nambai:678400

地址：芒市勇罕街14-41号

      德宏州文联《文蚌》编辑部