E daihpot ninghkong e

　　Ndai mali zinghkra nhtoi gaja

　　Nhtoi nnan gaja ten hta

　　Ndai ja li la ja tsen ma ni a

　　Mado ginra ninghtan nta hta e

　　Ndai Ja Li Lanau hte Gatsen Roi Ji a

　　Mabu e nga singkong e pra ai

　　Ja tsen Ko Shong go ( Lahpai Ja Koi)

　　Ndai Mali Lagong hte (Jasham Hpung

　　Wang)

　　Akam hpuwang wa na-chying wa rum

　　Shawang amyit wa na-shang wa hkrum sai

　　nga in

　　Mali Lagong Ko

　　Mayat shing-yan wa wa na nga yang

　　Maya shingyan wa sa na pra yang

　　Dinghkun mayu ni go

　　Gabu hkanum na-chying wa lu

　　Shawang amyit na-shang wa su in

　　Gahpu ganau e shanum

　　Makyin jinghku e jahkum in

　　Mayat maya lahkum sharing ya

　　Gumja gumhpra tingnyang shading ya

　　Sharung aja shanum ya

　　Shakau hpaga jahkum ya

　　Shayi sut hteng shanum ya

　　Shadang agan hteng jahkum ya

　　Nli naili hteng shanum ya

　　Mahkang sumkung hteng jahkum ya

　　Tsali asut hteng shanum ya

　　Yangseng hpaga hteng jahkum ya

　　Asut shingnoi mung bon ya

　　Shayi jo rilan mung lanon ya sai

　　Shingrai

　　Daini Ja Tsen Ko Shong go

　　Dinghkun mayu ni ya ai

　　Sharung aja dai lun

　　Shakau hpaga dai gun in

　　Nnan shana njang

　　Dami ginding wa dap

　　Dama ginding wa hkap in

　　Mali Lagong hte

　　To-mung rau dun rau lung

　　Laron gintong rau dung in

　　Mayat maya lahkum rau lung

　　Gumja gumhpra tingnyang rau dung in

　　Kagu gamoi hte shawang amyit wa rum

　　Ganau gana hte mado ninghtan ga wa hkrum

　　Makyin jinghku e chye hkungga

　　Mano manang e chye la-ra rai in

　　Kagu gamoi e mung lahku

　　Ganu gawa e mung lanu rai in

　　Nan na mado dinghku shangang

　　Ningpan sai hkong shakang in

　　Shayi asut lamun gumrin lu

　　Shadang agan latsa gumhkyin su

　　Npan zinlong mung hpring

　　Nbang zinlong mung ing

　　Lamun sut gumrin lu in wa nga

　　Latsa agan gumhkyin lu in wa pra

　　Ja tsen Ko Shong hte

　　Mali Lagong go

　　Hkato tomung zon rau ganon

　　Wurat yan wutsang zon rau gapyon in

　　Hkanum maji rau sha ji

　　Ningsan htutsong rau sha hkri in

　　Mayat maya gumja gumhpra rai in

　　Gashu lamun mayat

　　Gasha latsa shaprat in

　　Shayi maga malong mayat

　　Shadang maga malong shaprat

　　Akrong lailik chyang ai shangai

　　Hpaji jan mau gup ai zinghkai

　　Waji labau manat

　　Wawoi htunghking ntat

　　Galu wunli wa wang

　　Gaba zinghka wa shang

　　Chyaulung wunmong langai rau lang

　　Chyauhpa magam rau dang in

　　Nga sa mangan wa nga

　　Pra sa nten wa ja in

　　Sumhpan lamun lakai in wa nga

　　Wudan awa galai in wa pra masit lo...