AGA SHE NAT AI

　　Maru Gong

　　Masha shada da sakse sakgan n mu ai, majoi tak nna pagon para matsa mawa ga tsun jang, teng sha byin chye wa nga ai.

　　Lawu de mu yu ai hte na yu ai lam ni hpe masam maram yu ga.

　　Marip No Din jan go, lahpot mi hta shanhte nta ko dingbai dingna nau hkrum ai majo, akyu ra mayu nna hka mahkrai langai hkrai na matu, hpun mu ton nna, nta nhtang wa ai shaloi, shat grai kosi mat sai, madu jan hpe shat sa ton jo rit ngu tsun u ai, madu jan go madu wa gade sa ai re n chye ai majo, jan lo sayang she pru wa ai hpe n kam yu nna, madu wa hpe ya du hkra hkra lasa si lam tam hkom ai go, mo mo, sha jahtum la u nga matsa mawa ga hte shat ton jo u ai.

　　Madu wa mung, e lo, sha jahtum la na re, nga nna shat sha ngut ai hte manang so la nna, mahkrai hkrai na hpun sa kran ai nga yang, dai hpun ndung ko mara nga ai hpunshatsam aga jong sha madu wa a bo ko di hkrat bun nna, si hkrum mat sai.

　　Nmau Noi jan madu wa shan gap ai de hkan sa na ngu jang, wo hkan sa su, lasa si mayu yang go, wo daini na shan tai nna gap kau mu ga ngu hkan matsa angun dat nu ai da. Gaja wa shan jom wang ai ko manang ni e shi hpe wadu zon yu shadu kau nna, shan hkap ai ni e gap sat kau hkrum sai.

　　Nhkum Tu jan go, madu wa da-ma nta de gasha hpe sa jahkrum ngu sa wa jang, madu wa hpe shum sa ngu yang, sa na nga ai go, sa su, sa nna shum nhtang wa sa! Sa si mat su! Ngu matsa shabon dat nu ai. Gaja sha da-ma nta du jang, gan machyi si wa nna, nga tsi htu ai Miwa la wa e nga tsi brup hte htu sat kau sai.

　　Maru Gam jan shani shana madu wa hte chyu ga-lo, lamu e, aga e, ndai Maru Gam hpe sa achye sat u lo! Nga nna hkrai matsa u ai da. Lani mi na nhtoi nbung laru ru wa ra ai, shanhte nta npan ko mu e lahkong brang, maulam hkinri ko nna shat gok ko lup, shat shadu dung nga ai jan n-ga kran, ya ko nna n tsun sana lo! Karai e! Mara ro ya rit lo nga jahtau timung, shat gok ko nna yupra gata hku, najon hte gala ai zon rai, sun ko na shaman hpra ko lup achye jung ya sai.

　　Shing rai lagu lu lagu sha, mara shut dum ai ni go mu ngoi agung wa jang grai hkrit gari maja nga ma ai.