(Shata 3 nhtoi 14 ya na do)

　　Aru hpaisau ko majong jon

　　Janghtung jangta

　　Mayu mali ni ko shingkrau hton nin nai

　　Sharung aja wa sa

　　Shakau hpaga wa ya yang e

　　Sharung aja mung hkap sharing

　　Shakau hpaga mung hkap shachying ya lu

　　Ganam shinggyim manu hkinchyi

　　Gagu lung ninghkrun wa lung na ra ai

　　Gamoi dung tingnyang wa dung na ra ai

　　Akun maka kap

　　Dinghku maka htap

　　Gamoi la yong mu

　　Gagu akun shingra maka su

　　Ganam shinggyim mung

　　Shabrang kunglung hte e

　　Mayat maya lahkum rau wa ring

　　Gumja gumhpra tingnyang

　　Rau wa chying na ra ai

　　Ganam shinggyim manu hkinchyi

　　Shing yang mayat lu

　　Mayat shing yang su

　　Shakon na-li lu na ra ai

　　Shabrang kunglung hte

　　Hkinnum machyiji yin wa nga na ra ai

　　Ningsan htutsong hkri yin wa pra

　　Hkinnum mada htep

　　Taumung raudung gayep bun wa pra na ra ai

　　Ganam shinggyim

　　Shabrang kunglung yan e

　　Latsa lamun ning

　　Akun maka kap

　　Dinghku maka htap

　　Mado wunmong lang

　　Ninghtan magam dang ngin wa nga

　　Akun maka grung

　　Shingra maka jung ngin wa pra na ra ai

　　Shadang ninggang aye na ra ai

　　Shayi shingwoi ahpye na ra ai

　　Shayi shingwoi sumro

　　Shadang ninggang sumbo na ra ai

　　Lat ningshong shangai

　　Lapran kyingnang ayut ninggum

　　Dinghkai yin pra na ra ai

　　Mayu mali

　　Dimi da-ma ga e

　　Shabrang kunglung hte

　　Mayat maya lahkum wa lung

　　Gumja gumhpra tingnyang wa dung na ra ai

　　Mayat maya ningsu na

　　Hkap ran shangui ya lu

　　Gumja gumhpra ningnon na gasui ya lu

　　Aru hpaisau ga ningsu

　　Ningmun gasa ga

　　Ningnon na hteng yan gumnom ya lu

　　Janghtung jangta ga ningsu

　　Mayu mali dimi dama ga

　　Ningsu ningnon na hteng

　　Yu shangui yan

　　Gasui yin hpyan ya lu

　　Sharung aja ningsu

　　Shakau hpaga ningnon na

　　Shangui yan gasui hpyan ya

　　Reng

　　Wunrot hpungdun yu wom shalat tup

　　Wunbon gungsi tsom tsan shapat grup rai sai

　　Laijum chyahpung gumgun

　　Laika lupdo gumhpai ahpa ya

　　Wunrot hpungdun let

　　Wunbon gungsi kyet yang

　　Wunrot hpungdun pyi lun

　　Wunbon gungsi apa gun na kun

　　Hkringwa e

　　Wunrot hpungdun

　　Pyi lun go moi na chyu madat n nga ai

　　Wunbon gunmgsi pa gun marang

　　Madat ninghpang n da ai

　　Wunrot hpungdun pyi pa go

　　Aru hpaisau ga shu na hte

　　Janghtung jangta ga shu na

　　Mayu mali ga rum

　　Dimi da-ma janghtung jangta

　　Aru hpaisau ga mayon hkrum na hte

　　Apyi run apa gun

　　Lu hkritung mu

　　Sha hkriwang ginshang shu

　　Ganam shinggyim lu na re

　　Dinghkun mayu su na re

　　Laijum chyahpung gumgun

　　Laika lupdo gumhpai ahpa

　　Alu ding yong lun

　　Hpodung non

　　Hpo hpang kron

　　Hpodung guwai lun

　　Hpo hpang makai gun

　　(Ya na lang bai matut hti ga)