Ngola Bum

　　Ma e,

　　Laika gaja lo lo hti u.

　　Laika hti masha gaja langai go myit su du gaba gaja langai byin wa lu ai hpe dum u.

　　Ma e,

　　Laika hpe hti shakrai ai hku n rai ai sha, longlam hpe chye na hkon hkrang hkra hti matsing u.

　　Ma e,

　　Ra ai arung arai hpe pyi n mari lang hkra gumhpro hpe maji maku rai hkum mahkong et,

　　Raitim gumhpro hpe “Dumhpro” hkum shatai kau.

　　Ma e,

　　Makau grupyin a ase asong shatan ninghkan hpe ahkyak hkum da,

　　Gaja nan Ma a lam hpe Karai Kasang hta lai nna, gadai n chye ya ai hpe dum u.

　　Ma e,

　　Tinang myit lom ai bungli hpe lata galo u,

　　Myit n lom n htuk manu dum ai bungli hpe jahkring kau u.

　　Ma e,

　　Masha yong yong hpe hkum gaya agam,

　　Agam ai myit go shara shagu hta akyu n jo nga ai hpe dum u.

　　Ma e,

　　Myit mada ai lam hte masha hpe hkum garum,

　　Shanhte ko na lu la na akyu hpe mung hkum ala.

　　Ma e,

　　Galo na bungli lam shagu hta shut na hpe chyu hkum myit tsang, shut ai lam ko na hpaji la u,

　　Masha yong go shut chye ai hkrai re hpe dum u.

　　Ma e,

　　Masha langai ngai hte ga tsun shaga ai ten, hkam la ai lam n bung, ga bo n hkrum rai yang, ningdang kalang n galo ai sha, shi tsun ai lam hpe azim sha madat ya u.

　　Ma e,

　　Hkumhkrang bong ring galu gaba hkamja na matu ginsup ya u,

　　Hkum gong shingyan hkamja tsomhtap ai la ni myiman pa ai re hpe dum u.

　　Ma e,

　　Ga-li ga-lo rai yang, tinang maga na shong lata hkum du,

　　Hkam sharang lu ai lam go la gaja langai a kasi re dum u.

　　Ma e,

　　Bu hkom ( Hkrun lam) hkom u,

　　Hkrun lam hkom yang ahkyak ai lam ni hpe sumla matsing sumhting gayat mazing da u,

　　Htom hpang de na matu myit n-gun tsi tai na ra ai.

　　Ma e,

　　Dinghku de na rai yang num gaja hkum hkan maram,

　　Nang la gaja byin hkra shong shakut u,

　　Shaloi dinghku num gaja tai na jan nang ko sa wa na ra ai.

　　Ma e,

　　Na prat ngui pyo simsa ongdang lu na matu,

　　Ngangkang ai bandung ton nna,

　　Ngangkang ai makam kri rong u lu yo.