Sumlut Ton

　　Ga malai go, aten na na lang shagrin hkrat ai, gadun tok ai, shing nrai ga hko gadun rai nga ai.

　　Ga malai ngu ai go, htom hpang prat na gashu gasha ni a matu, jiwoi jiwa ni ko nna jo da ai, sali wunli hte bung ai, manu dan ai matsun maroi mungga rai nga ai.

　　Ga malai go ga yan gadun tim lachyum hpe chye na hkap na la ai ni a matu, lachyum grai sung ai, akyu rong manu dan ai,shadum jahprang ai lam matsun madun ai, n-gun a- tsam jo ai mungga myu mi mung rai nga ai. Ga shadon myit yang mang ai, galo yang dang ai ngu ai ga malai mung, anhte galo ra ai bungli ongdang hkra galo lu na matu n-gun jo shadum jahprang ai ga rai nga ai.

　　Ndai ga malai go, bungli langai mi hpe galo na matu yo shada ton ai raitim, dai bungli hpe garai n galo hpang ai shaloi myit sumru yu yang, yak ai lam pu ba jamjau na re ai lam ni hpe mu mada ai majo, dai bungli hpe galo na matu n gui ai myit hkrit tsang ai myit, n kam galo ai myit ni a majo ung ang ai lam ni hpe ngu mayu ai rai nga ai. Myit dat yu yang, grai yak dum ai, byin lu na n shadu ai myit rong chye nga ga ai. Rai tim tinang a myit hpe dodan nna galo sa wa yang, teng teng ngut kre lu ai hte ong dang na re. Tinang a atsam, nyan hpaji hpe tup hkrak kam ra ai, ung ang ai myit n kam ai myit ni nmai rong ai, ngu ai rai nga ai.

　　Ga shadon langai bai yu ga. Nta langai galo mayu ai ngu ga. Shong ningnan e dai nta hpe galo na matu myit dat yu ai shaloi,myit hta chyip chyip mak mak nga na re. N-gui ai myit rong na re. Hpun, kawa, ngau ni jinghkum la na matu nachying lit li dum nga na re. Rai tim myit hpe dodan nna, ladat sho la n htom, lu ai aten hpe manu shadan let, lani hte lani galo shakut mat wa na hte jinghku jingyu ni, mano manang hpe mung garum hpyi, rai galo wa yang, gade n na ai ten hta atsom ong dang ngut kre la lu na sha rai nga ai.

　　Dai majo ndai zon byin ai lam hpe lakap nhtom, moi na jiwoi jiwa ni go, myit byang mang ai, galo yang dang ai, ngu ai ga malai hpe anhte gashu gasha ni sharin hkaja la nhtom hkan sa wa shajang na matu, shalat shpro da ya mani ai rai.