Nhkum Doi La

　　Shu langai mi go nshung ta ga gata e shang up rong mat ai majo mungkan ga ntsa na mabyin masa lam ma hkra hpe atsai awai malap kau nu ai.

　　Ginhtong htong nna myi bai hpo mada dat yu yang she hpunlo hpunlap matsun ni prut wum wa, hka shi ni sho sho nga lui nga ai hpe na lu nu ai. Shaloi, Shu dai go hka shi langai de gumtsat gahtan sa wa u ai.

　　Shingrai Maubyin pau gasha ni go Shu hpe mu nna Shu hpang de hpung yot sa wa ma ai. Maubyin pau gasha langai mi go,“Hpu ba Shu e, hkam ja nga ni?” ngu hkap sha chyan u ai, shaloi Shu dai go grai n ko ai myit hte,“E, nbya hkalung nanhte ngai hpe hpu ba ngu hkum sa shaga dam, dai nanhte a hkum hpe wa she asoi yu mu, hkum do mi go Shu, do mi go Nga zon san, Nga zon go rai, Shu zon mung bai rai, gade mung n jau jau re mi!”ngu tsun u ai. Shaloi Maubyin pau gasha langai go,“Aga, grai gumrong a hka i!”nga grai n dong n yot ai myit hte ga shakra dat u ai.

　　Shaloi Shu go,“E, nbya hkalung ni, nanhte madu yu mu, la ni hpun ai palong go tsit tsom ai palong mi she rai, nye a kan mung ahpro atu sha rai gade she tsom la nga ai, ngai go ka manot mung chye ai, gumhton gahtan mung chye ai, shingtai tsumpra mung chye rim ai, nanhte ngai hte hkum sa shingjong dam!” ngu bai shakong dat nu ai.

　　Shaloi Maubyin pau gasha ni go,“Nang mung anhte zon san ai ko nna gaba wa ai she rai nit dai!”nga ashu let madu a hkum hpe malap kau ai Shu dai hpe hpa aye n la ai shong lam de bai hpung yot mat wa masai.

　　Shanhte a myit hta go,“Hpa wa rai dum ai kun! Anhte gaba jang shi hta grau hkik grau kung na rai nga ga ai!”nga ai hkrai rai nga ma ai.