Hpan Ja Maran Ko Shong

　　Baren lamu lun

　　Numro pu wa pu, kaidu si wa si an ai yi-nam gaang na lana de mi, Kasan bum lago, Laseng bum abo na Nhkre mare e, mare bo na Layang Gam jan Bumnoi Ji, ma shangai machyi nna yup gok e madai hte hum rong nga ai ten e, nbung laru awu nga bung dingsa ai ko, amu mung lamu pyi ga ayai mat na zon nga hkra ngoi gadu, myi pyi n mai hpo hkra tu gala ai myihprap go, Nhkre mare ntsa hkan ashoi rai galam hkom nga ai ko, marang mung galang ta nhtung na ntsin ru jahkon bun ai zon, shangu nta ntsa hkan bukbak she shara hkra htu adit bun nga ai, mare bo de amu “Htemhtam!” Ngoi gadu ai hte, bum lago ko nna asin amun re samui gumdin go, ri lahko gabai dat ai zon rai hkon pru wa nhtom, ri rit ai zon gumdin gumhko rai manai gaboi let lamu ganghkau de poi lung mat wa ai shaloi, Layang nta ni hkawot punra ko sa pru tsap let, lamu de hkron lung mat wa ai samui chyang hkan yu let, Layang dingla go:

　　“Baren lamu lun sai lo! Baren lamu lun sai lo!” Nga hkan jahtau mau tsap nga yang, mi yat sha samui chyang gaboi pru wa ai bum ko hpun gaba shunshun rai shamu wa ai bai mu dat masai, shaloi Layang Gam gajong gaja hte:

　　“Hto she yu yu mu lo, baren hku gyi gaput yu wa ra ai lo! Mahkoi hprong yan ra kun lo!” Nga maron ai ga sim nsim re hte, dai bunghku mahka hku na bum chyen mi bai gyi ginlut yu wa ra ai, dai bum chyen mi go Hka chyang hka mayan de hpun kawa namlo namlap, lunghton lungma, hkumpup jahku gayau gaya ashun ashan rai lui gaput mat wa sai.

　　N-gup mahka let sharut gyi ru mat wa ai yu mau ai Layang jan go: “Hto she yu yu mu lo, baren pru wa ai ahku hku nga ai lo! Yahte numro pu grai pu an ai re wa, daina de chyau ma hkra lom mat wa na sai. Ningwa hpe ma-ni ko nna kaidu no wa dan, ka- hpru galo dut sha na re ngu yang me, ya ya sha anga nga, daina de chyau me kaidu hpra mung lom mat wa na sai.” Nga tsun nga nu ai, shannu wa ni masum yu nga dangam, bum lago ko na bum chyen mi tom rai gyi ru mat wa ai hpang, sharut n-gam ko, kawa nhtung do dumhpyot ton ai zon hku dum pong rai malong mat sai, dai bum hku ko nna lui gumhton pru wa ai hka npun go, ntsin n htung gadong mat wa ai zon rai, hka lui gumhton pru wa nna, Layang nta ni a chya- hpung maga hku lui ai hka la gasha ko nshu nshang lui abro mat wa sai, hka galang ta lui gumhton pru wa ai rai nna, mare ting na wuhkyi wa hkyi, nga hkyi, hpunlo hpunlap, maza mala ma hkra hkan wo gatsot nang mat wa sai.

　　Mu nau ngoi gadu nna, u wa ni npu de kagat bang mat wa, gui mung wau na pyi n wam, nta madu ni a lago makau hkan wa garet tsap mat masai.

　　Baren lamu lun nsen hte sharut gyi ngoi gadu ai nsen sim mat wa ai hpang, La- yang nta ni go nhku de ma ngak hkrap ai nsen bai na jang she, ganam Layang Gam jan ma shangai dat sai rai nga ai ngu, shannu wa ni nlang nhku de bai htim shang wa masai. Layang jan gajong let galang ta gasha yan a yup gok de hkre hkre shang wa nna, shi a hpang ko chyochyo hkan nang ai gasha hpe gayin ganong kau dat let: “Jaugong ni shinggyim gok de n shang ma ai!” Nga, shi hkrai sha ngaishu e adui du sai lo, nga shang wa nu ai.

　　Layang dingla shanwa dodap ko hpunjum galo dinghkrum la nna dung nga ma ai, loi hkring re hte, gawa dingla tsun ai, “La gasha rai jang go Rum Jong ngu na re, num gasha rai jang go Ja Ro ngu na re, daini byin ai lamyik kumla go htom hpang de n hpa byin wa na lam anhte n chye ai, dai majo ma mying shamying nna, hpang de na ni maumui hkai ai shaloi na sakse tai lu u ga.” Nga tsun kau ai hpang she, myit mi alom rai hko chyang hkodin matu galo matsut sha- ngang la nna, wan kra dung nga nu ai. Gasha go “Mai na re, wa.” Sha nga nna, yup gok de na ma chyangai ja maji hkrap ai nsen hpe madat let, la gasha rai ang sai, nsen nde ja ai ngu tak nga nu ai.

　　“Abau gun ai mi rai sai lo!” Layang jan gok de nna tsun dat u ai. Shaloi Layang yanwa go shada da mada hkat la ai htom, “Layang Ja Ro ngu sai ga re.” Nga galang ta tsun shapro dat ma ai.

　　Tsomra na ai hpang she, gumgai jan pru wa nna, shakum hkumba makau na kawa kumhtong hta la rai, htingnat ntsin n htung na hka ru bang la in ta shin kau nhtom, dodap npan dun lago nhpang e sa dung let tsun ai: “Ma Gam hkanwa e, dai rapding sumbrung na shan sho la in lau htu mu, hka pru pru na re, ma jahtong go sanit ya ngu na shani htu sha na re, ma mying go Mam Htu ngu gan shamying se ai lo.”

　　“Ja Ro ngu ga ngu sai.” Madu wa tsun dan nu ai.

　　“Rai sa rai sa, grai pyo re sai.” Madu jan grai na ra mat nu ai.

　　(Shata 5 nhtoi 18 ya na do)

　　Sanit ya du ai jahpot, Layang Gam Hkachyang hkaro de shan sa hkui u yang, kam mi arong rai, shannga langai lu gap la nu ai. Shing rai, mare masha ni yong hpe so la nna, ma hka pru pru sha ai shaloi, shannga shan hpe alom apot rai woi shadu sha rai, hka pru pru sha masai. Hka pru pru sha ai jahpot, Bumnoi Ji shinggan de ma pon pru wa ai shaloi, mare masha ni yong mayong go kara hte myimun she matut hkra rai tu ai Layang Ja Ro hpe gahti galai pon yu nna, ma ndai go gaba jang kara grai lo nna, gam grai rong na re nga jom tsun hpu nga ma ai. Mare masha ni shakon ya magang, Layang Gam grai na gabu let, gasha hpe hta pon ashun chyai chyai re ko, gasha go masa nna, shani shana gawa e hta pon na sha la, shana tup tup gawa a lata e pon shayu shayup na sha masa mat sai.

　　“Ma Ji, ganu she nga ai wa, ma nde de hkrap yang n chye shayu la ai, ngai hpe go ndai hku ma sha pon nna n yup nsha rai nga shangun na hku son nni?” Lana mi na yuptung hta, Bumnoi Ji ma chyu rot shachyu u ai, ma go chyu de n yong ai sha, kaga de malan nga let, ja maji hkrap to nga sai.

　　“Mo, nang she bai pon yu u.” Madu jan go yupra e nhkrem hku galeng nga nna, hkrap nga ai ma hpe yu let, nhpa hkrap ai kun, gaji dui hpe ntsin no ru jahko shangun na nhten nga san u ai.

　　“Ma ndai shana du jang wa hkrap hkrap re, nhpa di na rai yang lawan sa di yu masu lo, ngai myit htum si wa re ni ai.” Bumnoi Ji ma pon ashun let, pot pot ngu tsun dat nna, ma hpe Layang Gam a sinda e pon mara dat ya jang, ngap rai n hkrap mat sai. Shaloi Layang Gam hkra ta hte ma hta pon ton, pai ta yupku e madi ton rai yat sha rot wa nna, ma hpe lahpyen e galo pon bang la nna dung nga jang, gasha go ya sha grai hkrap yu ai zon nrai ai sha, lamu shamying hte yup mat wa nu ai.

　　“Ngai n chye shayu la ai nrai, nang she pon shaman ton nna mi, ya go na ta ndung ko sha pyo dum sai rai nga ai, ngai no yup la na.” Bumnoi Ji galang ta yupra e son sha yup mat nu ai.

　　“Ntsin mung n ru jahko ra sai, wa a lata marit ai she rai nga ai.” Layang Gam grai rai dum ai hku ma pon nna, hpotde woi la-gang langai no sa gap na ngu son let, gasha hpe yat sha galeng dat nu ai. Raitim n mai byin sai, yupku e hkra re hte, ma dai go lama mi hte achyo dat ai zon nga hkra bai kyek hkrap dat nna, ya sha yup malap mat wa ai madu jan hpe bai gajong dat nu ai.

　　“Nhpa di nu ta?” Madu jan ngoi rai rot dung nna san u ai.

　　“Nhpa wa chye di na, shayup dat yu ai, yupku e hkra re hte bai un si wa nga ai n mu nni!” Madu wa ma hpe galang ta bai hta pon la jang hkrap ngap rai mat sai. Shaloi madu jan mani sum rai, myit mi amu rai bai yup mat nu ai.

　　Layang Gam shana shagu ma shayu nna yup n mu sha n mu, jahpot jau jau n lu rot, jaugong gong hkom na ten pyi n lu mat sai, jahpot rot ten she Ja Ro hpe yupku e mai shayup yup rai, ma laning chyen mi sha no rai yang, Layang Gam a hkum na shan joi masum daram yom mat hkra lasi lamun mat nu ai.

　　Ginhtong htong wa sai, lani mi La-mo nta ni a mam mu ga sa ai shani, Hpojum Ong yan Lunghpra No sengmo de lungseng sa htu na lam jahta ai na dat nu ai.

　　“Hkau yan, nan sengmo sa jang ngai mung sa na, nan hkrai hkum rai mat wa yo.” Layang Gam grai na masa let tsun u ai.

　　“Nang mahkoi n mai sa nhten, ningsha Ja Ro na ta ndung ko sha yup ai nga, nang ton kau da lu na kun?” Hpojum Ong mam si gawa bo sha let san u ai.

　　“Ma mi go ganu lu, gaji gawoi lu ai she re, ngai n nga jang go n hkrap sai, ngai hkrai woi jang ngai hpe grai abai la ai, dai- ning tup ngai shan hkui sha na ten pyi n lu mat sai n mu ma ni?” Layang Gam myit mi a- htum nga tsun u ai.

　　“Ngaini jan hte no bong yu u lo, loi hkring anhkau e hkalau mat wa ai re nga na. Nan go dinghku nnan sha no de wa ai, shada da lagat jahku zon magyep no kap ai, rai n mai hka na re.” Lunghpra No mani let tsun u ai.

　　“Nan du ai ko ngai mung du na, teng sha ngai hpe woi sa marit, la masum myit hkrum yang panglai pyi htok kau lu ai da, anhte masum sa ga.” Layang Gam myit grai lom wa nu ai. Shi a myit hta, gasha hpe lawan wan jahka kau ra sai, grau man jang grau yak na re ngu myit let tsun atet nga nu ai. (Bai matut hti ga)