Hpan Ja Maran Ko Shong

　　(Shata 5 nhtoi 20 ya na do)

　　HPAKAN SENGMO

　　Mare ting a mam mu, mam dan dup ngut ai hte rau, Layang Gam ni Hpakan sengmo sa na riri rai sai. Lana mi, shi ma pon let madu jan hpe tsun ai: “Ma Ji, ngai sengmo sa na, nta sha anga nga yang, nang hte yup na ten pyi n mu sai, ma ndai hpe n mai shaman sai, ngai n nga jang loiya mi rai jang she n mai mat na, ngai hkau Ong yan hkau Bok hte so ton sai, ngai lungseng sa htu la nna, annu wa ni ngui pyo dinghku de sha na re, nang hpe mung hkum ting ja si she gumbyau hkra shakya shangun na yo.”

　　“Ganing mung she rai yu ga, nta ko nde de matsan ai, di hka-wan sha pyi n lu lang ai, she sa yu su go e.” Bumnoi Ji hkron sha htan ya nna, shi madu jan a ladi matu ko sa pup dat ya nu ai.

　　Dai hpang jahpot, Layang Gam ma shayup kau nna, madu jan hte myit mi amu in yup la rai, manang la yan hte Hpakan sengmo de rot mat wa masai.

　　Ja Ro gawa a lata kut nna shata lam hkrap ai, gaji yan gawoi mung shana tup tup gahti galai hkan pon shayu lom rai tim, sharu chyu sharu nna, nta ting ma hkrap ai majo n lu yup sha rai, lasi lamun rai mat ma masai, grau nna Bumnoi Ji a kanhpyi go marung de kap mat ai she mu mat sai, ma machyi mat hkra hkrap jin ai hpang, tsomra na jang ganu a chyu tauba masop nna chye yup wa sai.

　　Layang Gam sengmo sa mat wa ai shaning lam du tim, shiga pyi n na mat hkra rai sai. Ndum ndam sha no nga yang Ja Ro masum ning du nna, kagat hkom ai tang tang rai sai, dai re, ma ganau n lu ai majo. Chyu dingyang no chyu nga ai. Ganu go ma chyu jahka ai ngu, chyu si ko kachyu si pyip chya ton yang, gasha hkrap malan let chyu kau, ndi hkama chya nna jahkrit tim, ganu a palong matu hte arut kau nna bai chyu kau, hpa mi chya ton yu tim nnan chyu dat ai chyu mahtoi kau nna bai chyu noi nga nga rai, ganing di nan n lu jahka rai, rami dai hku no shachyu ton nga u ai.

　　HKA CHYANG RIM

　　Nhkre mare sinpro maga go Hka chyang hka lui nna, Matau Tajai hte ni ai, sinna maga de go Lamai bum hte Namdu hka shinggrup ai. Dingda maga de Shaujai pa Ka-du pa rai mat sai. Nbang hka ko wuhkyi wa-hkyi ni lui bang ai rai nna, mare masha ni buhpun palong pyi gadai n kam hkrut ai hka re, ja lu ai hka go mare sinpro maga na Sinwa hka seng hka rai nga ai. Shaujai Tajai ni a shingdu de rai nna, Kasan bum lago e re majo, Nhkre mare ni mare shingdu de nga ang rai, nam na dusat dumyeng matse labye, chyahkyi shannga, wa du wa tsa, tsap gru tsap la, ahkan malat, sharo rongba, n-grau grau chyang, galang langda, woi hkye lagang, hpolum htu, chyahkyon wunong hku ru ai shara re, u numji numchyoi, hkru ji hkru wak, ubyit utsa, uri ugan ni mong gasu ai lam hpe go tsun she ndang nga ai.

　　Ma ganau bai tsan rai, Ja Ro chyu hkrai noi, shat gade hkru hkra jo sai ngu tim, chyu sha n lu chyu la la go hkrap gongleng to nga nga rai nna, Bumnoi Ji e mai dang she mang hkra hkra gahpret ya nna bai shachyu chyu rai, masum ning du hkra, gaba ai ni a ta ndung ko hkrai chyai nga nu ai.

　　Lani mi Layang nta ni Hka chyang rim ntsa na hkarang yi ko mam sa dup ai shani, Bumnoi Ji gasha Ja Ro hpe yihku ntsa e nbat nyep, sumdo jahpun in shayup ton nna mam jahkrat nga yang, shi hkrai sha Hkachyang rim nau ngoi gasho dum mat nu ai. Shi a hkum e htinggrum ton ai sumdo gata kon lamu ntsa de mada dat ai shaloi, sumdo hku ko jan lago htong hkra gabrim tsom nga ai hpe grai yu ra sharong nna, galang ta ngoi rai, sumdo garot let ganu hpe shi yup ai shara ko lawan wa yup u, nga dun wa u ai, ganu go gasha chyu bai chyu mo sam sai ngu, yihku ntsa e dung dat, chyu hpo dat ai shaloi, ganu hpe yihku ntsa e ganong galau ton rai, sumdo jahpun dat u ai. Ganu go ngai pyi mam jahkrat kyin si nga yang me ngu rot mat wa jang, hkrap hkrap ai, jahkro she je na daram hkrap tim, shi myit ai lam gaba ai ni n lu htai ya ai majo, sa-wa shalut sam sai ngu, hka ru hko ai hte, shat simai gan garan makai soi ai hte raitim n zim hkro ai, ganu masin lunlun nga ai n lu sharang si wa nna: “Ma yau ma ka nang go, nhpa nat e shalo ai wa rai sani, hkum hkrap ngu yang mi ya du hkra hkra hkrap nga ai go, le hpo lum htu e sa ba la kau nu ga!” Ngu gajet dat jang, agajong sha ngap mat sai. Raitim ta layung gang garan manai gayup nna no makan ga-e nga nu ai.

　　“Mok, achyu chyu u!” Ganu sabai palong malu la nna, hkum pyi loi jen jen rai hkra ta hte chyusi matep la in gasha a n-gup ko lup di anyin bot dat ya nu ai.

　　“Ama dai mi yat sha sumdo htinggrum gata kon atsom sha pru wa ai she re, nhpa tsun mayu kun re n chye tsun ai rai nhten.” Layang dingla ganam yannu hpe yu nna tsun u ai. Gaji dui shingnga jang, gashu go pai ta e no manat nga ai sumdo matu ari let bai hkrap kap rai sai. (Bai matut hti ga)