Hpan Ja Maran Ko Shong

　　(Shat 5 nhtoi 25 ya na do)

　　“Agu e, nang san yu u, nhpa tsun mayu kun!” Nam yi ko ma nau hkrap mat nna masin nshu nshang nga mat sai Bumnoi Ji n ri si wa nu ai. Shaloi mam dup ga sa ai ni yong go ta na laprang jahkring kau rai tak hkrai tak yu ma ai raitim, ma myit ai lam nhpa re n chye ya, lo madung go nam na jahtung ason ahpyi lamum ni hpe sha lo shadu ai hkrai rai nga ma ai.

　　Hkring mi nrai yang, Ja Ro go Hka chyang hka de na hka rim kon rot lung wa ai n-goi la-tum mu dat u ai, n-goi la-tum de ta ladon nna galang ta ganu a chyusi maret kau dat ya nu ai.

　　“Aka lo, daini na nbya nang go nhpa e wa shalo wa sani? Ya nye chyusi pyi di na daram gawa ya ai!” Nga, maidang ko gayat dat ya nna bai sha-un ton nu ai. Gaji dui maibau hpuntong ko kumgyin ru ru ai mu nna gyinwong sa wong dat yang, gyinkyi langai mu di la nna gashu hpe asong shamai la lu nu ai. Kumgyin lu la rai myit pyo sam ai ngu jang, ganu a lata na laprang bai gashun sai, ganu go ma laprang garai n dang ai ngu n shalang ai hpe, kumgyin gabai ndeng kau nhtom, bai hkrap un to nga sai. Shaloi gaji dui laprang gasha lawan bai gan galo ya nna asong jang she, hkrap ngap mat nu ai. Dai shani na mam dup ga sa masha ni go Ja Ro hpe masin shade ru ai nga gari mat ma masai.

　　SINWA HKA SENG

　　Lahpot mi Bumnoi Ji singga ko nhtung manga ting bo gun rai, sinwa hka de hka ja sa na mo u ai, Ja Ro singga langai dun lang rai ganu a labu matu magra let hkan ganan sai. Ganu go ma hpe jasat ngu yang n chyang, ba ngu yang bai n dang rai, hkum hkan nang sa ngu dat ai hte, Ja Ro adun ko n-ga rang rai myit si myit htum hkrap buklak wa sai. Ganu nhtung singga hpe htingnat ko yu shadun kau nna, gasha hpe dun sharot la nhtom: “Mok mok, gun u! gun u!” ngu jinghpa ladon dat nu ai, Ja Ro rot ngoi rai ganu a lata na jinghpa la nna kara go tsip tsip re bo ko hta mara gun dat sai, nhtung aga de hkrai hpreng ru mat wa jang, bai hkrap un si wa nu ai.

　　“Ama nang e, gayat shara go n nga re, ngai a masin hkum achyo ya lo!” Bumnoi Ji ntsin nhtung galang bai sharot bo la rai, gasha hpe hta pon ton nna mau tsap nga nu ai.

　　Shaloi gaji dui: “Ngaishu go myitsu ai, nang jidui hpang de wa rit, jidui kyedok do ya na, sa sa, an jidui kawa sa kran la saga.” Gaji dui dodap kon shaga dat nu ai. Shaloi Ja Ro hkrap ga-e let gaji dui hpang de adik nga kagat mat wa sai. Dai shaloi she Bumnoi Ji gasha ntsin nhtung gun mayu ai re chye u ai, ma gaba sai rai to hka ja garum lu na wa ngu myit let, myiprui si gatsut kau let nhtung singga sharot gun rai Sinwa hka de rai mat wa nu ai.

　　Layang dangla gashu hpe hta ba la rai, Sinwa hka lam na maling de, maichyu kawa gak gak re kran do wa nhtom, kyedok langai mi, ntsin nhtung langai mi do ya nga ai lapran, ganam jan hka ja wa nu ai.

　　Ja Ro pai ta de kyedok hpai, hkra ta de nhtung mahka ko dun garot rai, htingnat de ganu ko kagat sa wa nna: “Nu, hka ja, hka ja.” Nga tsun let, htingnat makau na singga ko shi a kyedok hte nhtung gasha bo dat nu ai.

　　“Ma e, nu hka ja wa sai, hpotde bai sa ja na re yo, ya go nu da no da na.” Bumnoi Ji go alo alam re kara njo galo jo la let tsun dat nu ai. Shaloi njang Ja Ro hkrap kap rai singga dun nna dodap de gaji dui ko kagat wa nu ai.

　　“Agu, ma dai nau sharu la ai, lama mi she hkan sam nga ai lo, hkrap hkrap ai go mayu pyi ga na daram ram rai nga ai, le le dumsa Uring wa hpe chyaba lawan she no wot shangun yu ga.” Ganam jan shingnga jang, kagu gashu hpe hkap asong ai: “Ngaishu singga gun mayu ai kun?” Ngu dat jang, hkrap ngap rai mat sai. Shaloi gaji dui Ja Ro hpe hta ba la nna: “Ma la-yong n chye jang yak ai lo ngainam, ma re ngu tim, ma langai ngai myit ai lam go lo, n-gup go n lu tsun shapro rai un ai mung nga ai.” Ngu tsun let, shan jidui Sinwa hka lam de madang kawa kran mat wa masai.

　　Bumnoi Ji myit hta: Dingla mung mana mana nga nna mi, ma a la-yong hkan ra ai nga ai go, ngai a la-yong gadai bai hkan ya na rai.

　　Gaji dui madang kawa ramdo re laman mi kran hpai rai, shingma na gashu hpe: “An jidui ni gutgut nhtung do la, singga wa la rai hka sa ja ga i.” Ngu jang, shingma ko na gashu jan: “E... E...” Nga grai gabu hkra htan sai.

　　Layang dingla nta du wa ndot, madang kawa hte ahtot mate te sha lo ai ntsin nhtung manga do hkrot ton nna, garap ko shingnoi wa na ngu shit ton ai pali sho la rai, singga gasha gachyi lo ai gan wa la, kawa lasui hte jinghpa gan hkri shakap ya rai, singga ko nhtung gasha bo bang ya jang she, Ja Ro gabu gara rai gun dat ai re, n chye gun sharot la nna bai hkrap un si wa nu ai. Dai ten hta Bumnoi Ji ndo ya ngaugum gata ko da da dung nga nu ai, nhku de gasha bai hkrap un si wa jang she, shi hkrai sha kro gata e: Dai yu le, hkan ai mi hkan ai re ngu yang n kam ai, hkrap nga u ga! Nga gabu olo si nga nu ai.

　　“Ngainam, ma ndai hka ja mayu ai rai sam nga ai lo, galang no sa woi ja su!” La- yang dingla adun ko hkrap gongleng to nga ai ma hpe n lu asong la nna myit htum let, lakang pot kon ganam jan hpe sa shaga u ai.

　　“Agu, ngai ma a la-yong n hkan ya lu ai lo, ma ra ai hku sha hkan nga yang go, shat hpa sha na re, ngai pyi n rau si nga nngai.” Ganam jan da maka ka kyin in, du pyi n sharot ai htan u ai. Kagu masin na pot nna, nhku e ja maji nga hkrap nga ai ma wa pon la rai, da-lang de sa wa masai. Ja Ro ganu da da ai mu jang hkrap ngap rai, ganu hpang de sit hkrat wa nna: “Ngai ma, ngai ma.” Nga nga ai ko, ganu e nhkap shaga la jang, aga e buk rai bai adit dung hkrap maa si wa nu ai.

　　“Ama ndai go sa-wa nat jon ai she rai sam nga ai lo agu! Ngai n lu hkam si wa re ni ai, shani shana wa hkrap un lu ai go, mare nde lo ai ko, masha ni gasha shi hkun lu ai ni a ma pyi n hkrap ai mi, Ja Ro ndai go kaga lai nan jan ai, ganing re hkrapni hkrapno tsupnyi sumbo wa rai kun, kun nhpa hka ji sa ai ma rai kun!” Bumnoi Ji da maka ko na ka-ni pu maka ka ai aman rai let pot bu nga ai. Shi a kro hta ma hpe da-lim sho la nna, anut dat riri ngu ai hpe, myiman she hkye hkra sharang nga nu ai.

　　Sinwa hka hkaro de lahpo sa htat ai gumgai mali manga mi Layang ni a nta ndo ko du wa mara ai. Gawoi dui go ganam jan ma jahkrap ton rai da da nga ai wa mu nna, masin shin nga ai ja:

　　“Ngainam, ma shade hkrap nga yang wa, nang go utu a munglu n na rai! Ngaishu go n hkrap lo, n hkrap lo, lo lo adui pon la.” Nga let, numgo do ko lahpo lit shayu shanat kau ai hpang, ma sa asong pon la u ai. Gashu jan go aga ko aru ru mat sam sai ngu na zon, pon sharot dat yang ting ting hkang hkang n shamu ai malan kyek hkrap to nga sai.

　　“Nanwoi dui ni chye ai hku asong kumbok hkat mu, ndai daram ru ai ma ngai n lu woi ni ai!” Bumnoi Ji gamoi hpe mung gajet shamak dat rai, shi a ka-ni pu maka lawan n lu ka shakre na ngu aman rai da dung nga u ai.

　　“Adui a gashu Aro shaga madat la ai lo, myitsu ai, ada da na kun?” Gawoi dui ada da na kun ngu dat jang, gashu galang ta rot ngoi rai, gawoi dui a ta ganu ko noi nna hkrap ga-e nga nu ai.

　　“Lo lo, andui ni da na re, da na re.” Gawoi dui nsa gaba sho la let, shi a lahpo singga na chyaba lap grau galu grau pa ai sho la rai, gashu jan hpe hpuntong langai ko na ninghpu gut kau nna shadung ton rai, chyaba lap hpe asoi soi sha di ashin la nhtom, gashu jan hpe langa nga dung hpo mali la nyep ton ya di, pali lapu do la nna da-lim shatai rai, lago hte da-lang shatai shangun rai, chyaba lap hte da da sharin ya nu ai, dai shaloi Ja Ro myit mi alom rai da to nga sai, ganu da ro jang she shi mung tsu wa dum sam nu ai, gawoi dui hpe da ro kau shangun nu ai.

　　Nsin ningrim rim wa ai shaloi, Layang nta ni shat dap ko shat sha nga ma yang, npu de gau bang ton ai nga dumsu ni nyot nbo hto ru pru wa ai, nta shakum hkan adot hkra nna, nta she ashun wa hkra rai sai, La- yang dingla go sharo bai htim re sai ngu: “Lamu ga madu nang lu yo, n gaja ai bungli hkrai hkum sa galo ngu sai lu! Dumhpau sanat gatut sha na lu yo!” Ngu maron let, wanmang na wan numhto sho hpai nna maron pru wa nu ai. Shaloi Ja Ro mung wan numhto gasha hta lang rai gaji dui ko hkan maron nang mat wa sai.

　　“Aro, Aro, ningji dui ko hkum hkan abai, mammam lawan wan wa sha u!” Gawoi dui ja maji hkan shaga nga tim, gashu jan gaji dui ko hkan nang let, “Sharo! Sharo!” nga jahtau nang nga nu ai.

　　Ja Ro gaji dui a shong de lam rai, lakang ko wan numhto hte mong rai yu mat wa nu ai. Gaji dui ganing n chye di, galang ta shong de gahkan lai mat wa nna, aga ko bak re hte gashu hpe gayin mada yu yang, gashu mung goitsat hkyem ai ko galang ta gra di woi la nhtom, gahpa npu e matep lang let, npu de dumsu ni hpe sa yu u yang, dumsu gasha langai a maidang na pu htum ado mi sharo e do sha kau nu ai. Dumsu lago lashan nna si wa ai shaloi, Ja Ro ta ladon let hkrap she hkrap jang, gaji dui mung hkan hkrap nang rai, nhku de shang wa nhtom, shanhte nta lawu na Uring ni hpe shaga la rai, Dumsu jom hpya sha kau masai.

　　“Layang Gam ndai go dingla jang she wa na nga sam ai kun?” Bumnoi Ji madu wa hpe grai marit ai, masum ning jan ting rai mat wa yang, shiga mung n du, shakram zon re sha pyi n shagun rai, u hku a masa si la ai hpa la to nga nu ai. Gamoi jan mung gasha hpe grai tsang let: “Lungseng n lu htu nna she nkyin nga dong, ginhtong htong wa sai re go, she n du pru wa na.” Ngu ganam jan hpe myit shapyo ya u ai.