(Shata 6 pro 3 ya na do)

　　Mam gun aga sa ai ni yong, mam lit shayu kau rai nhku de hkan shang wa nhtom, pali numhtan hte shanan gyit numhtan la nna wan shachyi lang rai, gok shagu hkan tam kyin nga ma ai. La ni bai rai jang go sharo hpun lung chye ai ngu, nhtu sho manat lang rai hkawot chyinghka, sharem numgo hkan gara yang shara ga-ap ai kun ngu, shara magup hkan yu nga ma ai.

　　Shanhte tsang dik ai lam go, dai shong e sha jaugong la langai madang sa sin nga yang, sharo langai madang gata sa hkom gahkrang to nga nna, jaugong wa madang ntsa kon sanat gap bun dat ai, ahkyak ko n hkra ai majo , hprong mat wa sai. Dai hpang jaugong wa madang kon yu nna nta wa ai lam ko, shi e gap malu dat ai rongba go shong lam de wa hkap nga rai, shi gale pru wa ai hte du ko chyit di gawa chyupchyai sat kau ai lam no tsun garu nga ai ten rai nna, sharo dai hpe go bai n lu gap kau rai, masha yong a myiman n tsom mat ma masai.

　　“Ngainam e, wan lawan wut shagrung dat u, dai garap na pali numhtan sho la nna wan shanan lawan shajup jat u, gok shagu no tam yu ga.” Uring jan nta hkumpyen gunggung nga ngoi ai she na hkra nbang dap de hkan kagat nang nna tsun u ai.

　　“Moi, ma ndai ganing kana she rai yang go ngai mung n pra sana ni ai, gawa Hpakan sengmo sa na shong e, ngai e matsun da ai, ma hpe shani shana tinang hte yep yep rai woi hkom nga ai re, daini mam lawan gun htok la mayu ai ngu yang…” Bumnoi Ji ga pyi n lu tsun shakre nu ai.

　　“E, ngainam, atsom she no tam yu ga, nta ndai grai chyip ai go re.” Uring jan shing nga nna tsun tim, shi mung grai myit lo let, kawa shanan lang rai dap shagu hkan tam, shaga hkrai shaga, nbang dap kon npan dap ko du, dap mi, gok mi pyi n hprai ai sha, shingjut shingno shagu hkan tam yu wa yang, dap kru ko wa du masai. Dap kru ko na shakum madin ko htauman noi ton, chyinghkyi sha jung ton rai nga ai. Bumnoi Ji hkrap let htauman na lachyit paru gang gale dat yang, Ja Ro lachyit nba shingga ai htauman gata ko yup pyo to nga ai. Ja Ro ningnan e go gana ni gade shaga tim dingsa n htan ya ai, gana ni shi hpe tam la na gade la yu tim, gadai mung dai ko n sa ahprun dat jang, yupnga wa sai, htauman gata ko galeng dat ai hte yup pyo mat wa sai. Shaloi she, Bumnoi Ji yanmoi a jahkro ko wa matsut rong nga ai salum go, shi a shara ko bai wa noi nga sai. La ni mung ta na nhtu n-ga ko bang kau rai, nsa gaba sho let mau tsap mat masai.

　　“Goi ye, goi lo, ma ndai ko yup nga ai lo! Yup mat nna she n htan hkro nga ai mu!” Bumnoi Ji gasha hpe mu dat ai hte, ta ko shum ton maron dat nu ai.

　　“Nu koi, nu koi.” Ja Ro dum wa ai hte, no makoi chyai na hku tsun u ai.

　　WAN SHINGRAM

　　Shata jan grai mai tsom ai shana, Bumnoi Ji gasha hpe dun rai nbang punra de shagan sa yu ma ai. Shi gasha hpe sumsing lamu de na grau tu ai wunbu shagan hpe madun let: “Hto yu, hto grau gaba ai shagan go ningsin gintong ngu ai re.” Nga tsun ngut ai hte, lamu de nna wura kawa nhtung hta tsut re wan shanan pyen jinghkyen yu wa ra ai.

　　“Nu nu, hto yu, nhpa re? Nhpa re?” Ja Ro lamu de ta ladon let san u ai.

　　“Htora go wan shingram rai nga ai lo ma e.” Bumnoi Ji Kasan bum mayan de jinghkyen mat wa ai wan shingram hkan yu let, gasha hpe tsun dan nu ai. Hkring re hpang, mare gaang de nna shi hkam baula ngoi wa sai, bau dum shangoi dat ai hpang, ndau wa maron tsun ai: “Wan shingram hkrat sai lo! Ginhtong ta, hkun hkro ten du sai lo, mare masha ni yong wan sadi ga lo! Wan sadi maja ga lo!”

　　Dai hpang shana ko nna, Ja Ro nsin sin wa ai hte ganu hpe nbang de hkrai dun sa nna: “Nu, wan shingram yu, wan shingram yu.” Nga, nhku de pyi n shang wa hkro ai, shanang hkrai shanang tsap nga nga rai u ai.

　　“Ma, le yu, myihtan tu grai lo nga ai.” Ngu dat jang, Ja Ro ta ladon ton “Ra, ra.” bai nga sai. Ganu myit htum let galang ta gra di hta pon la nna: “N mai ra ai, jum hkra jang ta hpyehpye.” Ngu jahkrit dat nu ai. Ganu jahkrit dat ai hte, gasha mung ganu a sinda ko kap rai gop mat sai.

　　Bumnoi Ji shana de nbang gok na mam ru gun rai npan de mam htu sa wa ai shaloi, gasha labu pyi n bu ai bai hkan kagat nang nna: “Nu, ngai ma sa, ngai ma sa!” Nga jang, ganu masin grai pot let, ahkye are rai dun pru wa nu ai. (Bai matut hti ga)