(Shata 6 pro 8 ya na do)

　　“Ama nang yo, ndo ya de sharo nga ai ngu yang mi, n chye hkrit ai, nde de jau nna nhpa hkan chyauhkre nang ai rai i? Ngai e hkrai hkan abai, nhpa galo tim yi-ngam n sa hkro nga ai le! Le ningwa lungseng htu ai de hkan nang mat wa su!” Bumnoi Ji lakang ko yu wa ai shaloi, gasha hpe hkra ta hte hta lang pot nga nu ai. Bumnoi Ji gasha hpe htum lap ko shatsap ton nna, htumhku de mam ru bang dat rai, lahtin ganoi du hkra galu ai kara hpe njo ngang ngang jo la rai mam htu sana ngu, gasha jan hpe ga e pon shatsap ton rai, mam htu bang wa nu ai.

　　“Nu, ngai htu na, ngai htu na!” Ja Ro ganu hpang de ta ladon nna tsun ai hpe, ganu aye n la ya u ai, mam htu nga dangam rai yoilu lu bang wa nu ai:

　　“Mam htu manang n lu ai, num sha shingtai ngai wa le, lagon la tim htu ra nga ai yoi, yoi sa lu manang e lu to go, yoi sa lu ngai myit dik hkra...” Nga ai yoilu rai pyi n ngut lu yang, gasha jan lama mi e hkra dat ai zon kyek hkrap pru wa sai. Shaloi sha dumsu gau nna nta du wa ai gaji dui na gajong ai majo, htim pru wa ra ai.

　　“Ngainam, nhpa byin sata?” Kagu gajong gaja nga san dat nu ai. Bumnoi Ji htummun hpe gahpa e shanat ton, gasha hpe dun ton rai: “Ngai htumlap ko shatsap ai pon shayu kau ai n ra kun, mam hkan htu chyingbat mayu kun rai sam nga ai!” Ngu pot let tsun dan u ai.

　　“Hka, ngaishu go an jidui ni sha na mam htu mayu ai nrai i? Duila htummun no do ya de ga.” Gaji dui nta htamung hku dang ton ai hpun bang na hpun dingshan langai sho la rai, htummun gasha do shatsom ya nhtom, ganam jan a ta htum makau ko aga krok gawan kau di, mam loi mi magra bang ya rai htu shangun jang she, hkrap nga ai ngap rai, myit mi alom mam htu let, galang lang ganu hpe rot mada dat, ganu mam htu shakut nna, “Si, si” nga jang, shi mung ta lahkong hte htummun jum ton rai “Shi, shi” nga hkan ngoi nang u ai. Mam htu gum dat jang, akrin nu nu re maidang shari lahkong dong dong rai, magyi hte labop go gaba brau brau rai, lahkap yojan yojan rai dat jang, magyi hte labop mung hkan ashun nang, kara sadok matu go alap rai, nunu rara sha re lago yungnu numhpu ko gabye chyalup ton nna mam htu shakut si nga u ai.

　　Ganu mam htu myit nna shingnoi ko shap bang jang, shi mung aga na shi htu ai mam ninghpu hte gayau gaya di hkan ashap bang, Bumnoi Ji hpa n tsun sai, n-gu gatsap kau na she re ngu, rami ashap bang shangun nu ai. N-gu gatsap na lit go gawoi dui a bungli re.

　　Bumnoi Ji shat gok de wan wut la rai shat shadu bang wa ai shaloi, ma bai hkan abai nang sai. Ma go namsong kok ko ntsin bang la, n-gu magra bang la rai, shi mung shat shadu na nga kyin bang wa sai. “Ma nang yo, n-gu lahpot lama di kau na hkyem nga ndai lu!” Ngu pot let lahkum ko gang shadun ton jang, bai hkrap dung nga sai.

　　“Ngainam, ma nhpa ngu chyu jahkrap ai re? Shi gasup mayu ai gasup shangun u le.” Gamoi shing nga jang, ganam bai tsun ai: “Rai re nga myit dai nanwoi dui ni, ma shaman shagan, ma la-yong sha hkan nna nga mu, ngai lahkam mi htot na pyi yak wa re nga ai.” Ganam jan gamoi hpe shara shara nga jang, gamoi grai n na ra ai rai tim, ma woi malong ai go ganam jan rai nga ai majo, aja wa hta dat go n wam nga nu ai, “Ndai mate sha lo ai ma hpe me, she shaman lo.” Gumgai jan ganam a ga hpe na pot mayu nna, n-gu gatsap ai balam abuk ngu gatsap htaplap dat dat rai, shingrun da, shatin da, hkangui naga da chyahtai de gayau gaya hkon mat wa hkra, sinpot lahtet rai gatsap nga nu ai.

　　Bumnoi Ji shat hkut ton, Ja Ro hpe: “Aro, duinum yan duila hpe shat sha sai ngu su.” Ngu shangun dat sai.

　　“Duinum, duila mammam sha.” Ja Ro go shi a namsong kok na ganu e shadu jahkut ton ya ai shat, nngot bat sha wai wai nga jang, grai gabu let, galang ta namsong kok hta dat ai ngu yang, ta magra gahtet la nna, kyek hkrap si wa jang, wa shat dap ko wa shat shalau nga ai gawoi dui, goi lo goi sha nga galang ta shat dap de htim shang wa nna, udi langai bo chya ya nu ai.

　　Bumnoi Ji namsong kok na shat hpe lohtong ko mala bang nna, ka-ni si nohpu gachyi mi lahkat bang ya rai sha shangun u ai. Ja Ro go grai mu la ai zon, aman rai magra sha dung nga sai. Bumnoi Ji lagum hpo ko shat hte ka-ni si nohpu lawan wan gumjup sha la rai, ndo de da da mat wa sai. Shi go lani mi da n lu da, maka langai sha pyi n lu ka bang yang hkum machyi ai she na wa wa re majo, da da mu hpe gadai wa du e nhtu mara ton ya tim galo ra ai bungli rai nga nu ai. Shi tom re hte gasha jan mung shat lohtong rap, ta hkan kap ai shat hkyep palong hkan gatsut kau rai, ganu ko hkan kagat dingding nang mat wa nu ai.

　　(Bai matut hti ga)