Shata 6 pro 10 ya na do

　　Bumnoi Ji namsong kok na shat hpe lohtong ko mala bang nna, ka-ni si nohpu gachyi mi lahkat bang ya rai sha shangun u ai. Ja Ro go grai mu la ai zon, aman rai magra sha dung nga sai. Bumnoi Ji lagum hpo ko shat hte ka-ni si nohpu lawan wan gumjup sha la rai, ndo de da da mat wa sai. Shi go lani mi da n lu da, maka langai sha pyi n lu ka bang yang hkum machyi ai she na wa wa re majo, da da mu hpe gadai wa du e nhtu mara ton ya tim galo ra ai bungli rai nga nu ai. Shi tom re hte gasha jan mung shat lohtong rap, ta hkan kap ai shat hkyep palong hkan gatsut kau rai, ganu ko hkan kagat dingding nang mat wa nu ai.

　　“Nbya hkalung nang, hto ningji yan ningwoi hte shat lawan wa sha jahkru la su!” Bumnoi Ji lakang bo ko tsap nna nhtang ahkre dat nu ai. Raitim gasha madat ai nrai, ganu a labu matu ko magra ton, lakang htik mi yu nu ai. Ntot e hpum ai gui chyang gam go ma a ka-ni si nohpu bat waiwai nga ai shat hkyep kap ai lata hte longta hkan mata ya nga ai.

　　“Moi, chyaba lap bai ashin ra sindai kun lu, ngai e bai abai hkyem mut nga ai.” Bumnoi Ji myiman nhku de yin rai tsun dat nu ai. Shaloi gamoi shat lanap do mi no ngam ai galo makai kau da nhtom, lahpo gatsu na chyaba lap sha sho lang rai hkan nang mat wa nu ai. Teng sha, ganu da-lang ko da sa dun dat ai hte, Ja Ro bai hkan shachyat dung jang, gawoi dui hkan nyem asong la nna, salat hte chyi, chyaba lap ashin la rai, ganam jan dung ai panyep do ko hkan shadun nhtom, gashu a lago ko hpun dingshan gachyi lo ai mi la ban ya in, da sing ya nu ai. Dai jahpot go shanmoi ma la-yong lu hkan ya sai majo, ma hkrap nsen garai n na nga masai.

　　U LA MAJAN

　　Jahpot manap jan loi mi pram rai wa ai hte, Ja Ro go ndo ya hkan hpum ahpra nga ai dumsu ni a hkum ntsa hkan langai ko bai htot jon jon rai gasup nga nu ai, dumsu ni n ri nna garin jahkrat dat dat rai jang, dabu ko chyit chyit noi hkom nga ai shaloi, ura wa shachyang lam de nna ndo ya e le rai jang, Ja Ro dumsu shingma kon gumshut yu nhtom, ura wa hpang de kagat hkrat wa nu ai.

　　Ura ndai go Ja Ro ladu hkrum ai shaning kro ai, shingjat mi ko na uhkai shi jan ting kro ai rai yang, no gaji ai ten e nkau hpe galang e hta sha, nkau hpe ahkan e dun sha kau rai, ndai chyu sha Ja Ro hkrai pon hkom ai majo, galang hte ahkan a n-gup ko nna lot ai ura shingtai rai nga ai. Ura ndai hpe go ganu Ja Ro hpe hta shalen ai shani kon, ma mung gasup manang shatai nna shani shana manat lang, nhpye gasha hkan bo gun, shi gaba ai ni a shingma ko ba jang, u hpe go shingma e woi matep rai, grai nyi ai, Ja Ro ganing di shala tim hkro, shana yup jang go dap dun e shingnoi singga hte dagup ton, u goi wa jang shi mung hkan goi nang rai, nhku de prupru shangshang, gui chyang yan hte mung manang zon hkau ai.

　　Ura hkum tsotso raprap rai, u joban grai hkye tsom ai ko ningma hkrai ashin asha rai tim, shi a nsam go grai hkye tsom ai, joban singkung mung pasi zon hka tsom nna, nhko matu zon pai maga de loi ye rai, u du mun go soi palong hpun ton ai zon rai, hkum ting na u mun go wan lap zon rai hkye gabrim, u kan hku na mun achyang nana rai, u ningmai go donggong zon rai hkra mago tsom ai, ahkye akang re joban duwai go n-gu latup tup mai bang na zon rai hkra noi abya, u na go atsit in dindin rai, myi tum go mut hkye rai, Ja Ro tsun ai ga grai chye madat ai ura rai nga ai.

　　Nhku de ganu shat sha shaga jang, Ja Ro npan de nna ura dingla hpe singko maga mi ko dun nna shang wa nu ai. Ura wa mung hkum nhkyeng mi rai hkan shang wa nga ai.

　　“Ama nang a gasup kam kam wa, ura wa a singko pyi nhten gang gashin kau ya na lo, dat kau u.” Gawoi dui jahka dap e lahpo ko gashu hpe jo na shat gumyon let tsun dat u ai.

　　“Adui, ura mammam.” Nga let dap kop ko shatsap ton nu ai. Shaloi u ra wa shat dun e u hkyi pya di dat sai, ganu pot pot ngu let: “Nbya nang e, masha ra yang dihkro baila, u ra yang masha jela ai da yo, u hpe mi nhku de chyu dun shang wa ai go!”

　　Bumnoi Ji hkarang yi de ahkran som sa na son nna, gamoi hpe: “Moi, nanwoi dui nta nga mu lo, yi de ahkran som sa yang, ma ndai hpe ba de go nrai jahkom de go nrai, abai na tai nga ai.” Ngu u ai.

　　“Ahkran som ai de anmoi lahkong nsa yang yi-ngam nsa na rai nga ai, duhkra lado shachyut ra ai, hto ninggu hpe ton da ya ga, shi dumsu dat ai hkan woi hkom nu ga.” Gamoi jan grai son ton chyalu re ai hku tsun u ai.

　　Dodap ko pali shit dung nga ai gaji dui shanmoi tsun ai ga na nna: “Ton da mu, ton da mu, ngai woi na, dumsu dat ai hkan woi hkom na.”Ngu hkam la nu ai.

　　(Bai matut hti ga)