Maling Hkra U

　　Kawa chyahten go toba,

　　Masha chyahten ka-ni ya.

　　Mungkan ting gasat ai majan,

　　Majan yong hta grau ai labu pan.

　　Sutgan hpe toba hte chyup,

　　Asak kre nna lupba de lup.

　　Matsan sumri lashoi shoi,

　　Gatsan ga de ahkye woi.

　　Nanghpam lu sha ai masha,

　　Dinghku hta myiprui jahkrat ra.

　　Hkrit hpa labu pan dai,

　　Lupba ko du hkra sadi dung ai.

　　Ja sa ja nan yong ma sai,

　　Jum pyi shum hkra n lu mata.

　　Ganon gawam kro gashung,

　　Sai lam gata labu pan aru jung,

　　Shat hku hku ai labau mung lu sai,

　　Labu pan balen grai nan ja.

　　Chyang ko nna chyahpro,

　　Prat dep ana lu sai go.

　　Shinggyim hkohkam mung n tai,

　　Myihtoi shingran ga yong shamat sai.

　　N-gup de go ga shaga,

　　Lago do go abyet e sha.

　　Bo kara ahpyi krin,

　　AIDS hkum ting machyin.

　　Lago lata hkum n mai shamu,

　　Bonu krok ai ka-ni labu.

　　Oi ye lo ka-ni labu pan,

　　Aka lo ngai n-ga kran.

　　Mare shingnom e nat,

　　Wanwu tai hkra nat jahkat.

　　Dai ni na ramma,

　　Hpot ni na shagong shata.

　　Nanghpam hta hkum len sa,

　　Shagan zon htoi gabrim saga.

　　Ramma ni e amyit hkum hten,

　　Hpotni ningbo tai na aten.

　　Bo sharot nna amyi hpo,

　　Nington ai ramma ni lo.

　　Myit ai shara ahkum du,

　　Shonglam nhtoi bandung du.

　　Salum sai hte kumhpa,

　　Mam zupnang masha n tai ga,

　　Shabrang shagu ramma n tai

　　Num shagu ma n shangai.

　　Hpun shagu apu n pu,

　　Masha shagu labau n mu.

　　Namsi shagu sha n mai,

　　Masha shagu hparat n hkum ai.

　　Myit su shagu hpu-on n chye,

　　Laika shagu hpaji n re.

　　Ka-ni nanghpam prat ndai,

　　Gatsi majan langai nan rai.

　　Ka-ni nanghpam a lai masa,

　　Tara lam hte nhtan shai nga.

　　HIV kap bra ai,

　　Npot rudi shi she tai.

　　Hkrit hpa ana chyam shangun ya,

　　Masha Wutsang shi n ginhka.

　　Lu ton da ai aja sutgan,

　　Wan hkut hte sha asan awan.

　　Wan hkut marop ai sha n ngut,

　　Sai lam gata htu bang na bai shadut.

　　Lu ai hte sha shi n ram,

　　Sai lam gata htu dangam.

　　Nanghpam lu sha ana,

　　Prat ban sanit sai hta hkra.

　　Nanghpam lu sha a shabrai,

　　Lupba ko nna n lai ai.

　　Mungkan asuya gadai e n ra,

　　Chyam yu na ngu hkum myit la,

　　Ka-ni nanghpam shala n mai,

　　Amyu shamyit laknak gaba nan rai.

　　Ka-ni nanghpam gasat na,

　　Amyu sha ni a lit nan rai nga.

　　Ka-ni nanghpam yong shagrot,

　　Amyu sha ni yong adot saga lo.