(Shata 6 nhtoi 15 ya na do)

　　Layang dingla pali shabon mi shit ngut ai hte, dumsu dat na jan she lo hkra rai mat, labu hkan mong kap ai pali lamun ahpu let: “Aro, duila hpe ntsin kyedok no hpai wa ya rit.” Nga let, shat dap de yu wa nu ai.

　　“Aro e, loihkring an jidui dumsu sa dat na re, nang dumsu jon u e. Chyang gam yan chyang ko, nan go ntot de sha ai bo she re, ndai ko hkum sin nga sa, pru wa masu!” Layang dingla gui yan hpe shachyut jang, gashu jan gui yan hpe hkan pon ton nna n dat hkro u ai.

　　“Duila, su jonjon, su jonjon.”

　　Ganu yan gawoi dui yi sa wa tim, gaji dui dumsu jon na re ngu tsun sai majo, n hkan ganan ai, shat sha hkru ai hte, ura pon ton rai la nga nu ai. Layang dingla wulong shingkrang sa hpo dat ai hte, dumsu ni gabu gara hte jit hpye ahkyi hpre rai pru wa masai, Ja Ro dumsu sula langai a nrung ko noi goiwat nang nga u ai, sinwa hka lam ko du jang, dumsu sula wa e Ja Ro hpe ari jahkrat kau dat sai. Ja Ro go nga punhtau e nan hkra rai di hkrat yu wa nu ai, labu palong agang mat rai, gajidui nta de woi wa nna palong galai kau ya di bai asong ai: “Aro go grai myitsu ai, jidui dumsu no sa gau sa kau da na, nang chyang gam yan chyang ko ma, ura wa ma rai nta no sin yo, duila chyahkring mi rai jang bai wa na.” Ngu jang, Ja Ro hkro sai.

　　Ja Ro labu palong galai kau rai, ndo e hkom nga ai ura hta pon dat ai hte, maihtong wahpang maling de nna ugan goi pru wa ra ai, Ja Ro ura yan u gan achye hkat ai yu masa nna gaji dui ko nhkan ganan mat ai re.

　　“Gade mung hkum sa lu, wudang shinggan de sa jang na gadoi sha ai ni nga ai, ndai ntot ko gui chyang gam yan chyang ko hte sha nga lu yo.” Gaji dui go gashu hpe galang bai atsom matsun da di ai hpang, ka-ku ko singgyin sha gun, lahpo lang rai dumsu dat mat wa sai.

　　Gaji dui dumsu dat mat wa sai, ntot ko chyang gam yan chyang ko hpum nga ai, Ja Ro ura dingla hpe pon nna, ntot ngaugum matu e nunu bokbok re lago sha goiwat, du sha shayat ton rai, ugan goi ai madat nga dangam, ura wa Ja Ro a lahpyen ko nna hkindit pru wa nhtom, ndo ya ko pyen du ai hte, singko hpunghpung nga hkra ahpup la nna goi hkrai goi gintan to nga sai.

　　Maumui hta hkai ai, maling de na ugan goi jang, nta u go: “Na bonu krau sha kau ya na!” ngu goi gintan tan re da, shaloi ugan go nang gade daram byin nna nye bonu lu krau sha na kun ngu, masin nsi let goi shanang hkrat wa let sa achye hkat hkat rai ma ai da. Ura wa go goi yang, ajan ginding dap, shata maiwang hkap na zon nga hkra pyo ai, raitim, ugan e madat yu yang “Nang a bonu krau sha kau ya na!” Sha anga nga ai hpe grai na pot pot rai u ai.

　　Shan shada da goi hkrai goi shingjong, goi jin nna achye hkat kap rai masai. Ura wa hkum grau gaba tim, ugan hpe n dang, shan lahkong du mun sha sharot marong ton rai, yuyu lunglung achye hkat jin nna, jan pyi ngai rai mat wa sai. Layang dingla dumsu sa dat kau da nna bai nhtang wa yang, Ja Ro gui chyang yan hte ntot e dung nna u achye hkat ai no yo nga mala ai.

　　Ugan yan ura wa u joban hkan u sai hkrai hkrai rai nga ai, shani shat sha ten kon shana de hpun hta ten rai sayang she, galang ta shingdu yon rai bra mat wa masai.

　　“Aro grai kyet sai, chyang gam yan hte nta nga nna, u achye hkat ai yu ai nrai i?”

　　(Bai matut hti ga)