Hpan Ja Maran Ko Shong

　　(Shata 6 nhtoi 22 ya na do)

　　Shani shat sha ngut kau tim. jan n du hkro, dumsu sa dat ai gaji dui lawan n wa rai jang, u joban hkan sai hkrai hpyahpya re ura hpe pon lang, gui yan hpe shaga woi rai, Uring ni a nta de sa chyai mat wa sai.

　　Gaji dui dumsu gau nna, nga sumron mi hkui lang rai nta du wa yang, gui da, u da, ma da, wa da n nga nga la ai majo, masin lok nga ai ja, gashu hpe shaga maron let, npan nbang tam dauyin si wa nu ai. Lahpo sanat la lang rai pru wa yang, jahpot shi pru wa ai shaloi, wulong adum sha la da sai, ya hpo hka hka ai go, ma shi hpo pru mat wa ai rai kun ngu, wulong ko tot pru wa nna, gashu hpe shaga hkrai shaga jang she, ura sha pon kau rai, gui chyang yan hte nta lam de angat rai hkom lung wa mara ai, shaloi she Layang dingla nsa hpoi ngu myit pyo mat nna:

　　“Aro, jidui nang hpe shinggan de hkum sa she ngu sayang me, hpa rai pru wa ai rai?”

　　“Ngai shong ni ko sa ai.” Ja Ro nyep hkyi machyit la nna ura hpe jo let, gabu gabu ngu tsun dan u ai.

　　Shanji dui nta ndo ko sha no du bang wa yang, wa ganu gasha ni hpe woi nna, nsa ashu nga nta de htim jinghkyen bang wa mara ai.

　　“Mo mo, wa hkon, nhpa rai kagat te ai rai?” Layang dingla wa yannu ni hpe hkap shaga yang, wa ni npu de kagat bang wa nna, wa tsip ko hkyom rai hpum mat masai. Layang dingla wa hkon wa hkon ngu shaga hkrai shaga tim, anyut nga sha htan let, abo pyi aga ko pyet di wa wup mat jang she, shan jidui hkan mada yu yang, wa ganu a mayat lam achyen mi ting n kap mat sai.

　　“Aro, dai yu, daini nang hpe wa sin ngu jang htingbu nta de lam mat nna, chyahkyon wa hkon hpe ganoi sha gawa sha kau sai rai nga ai le.”

　　“Duila, ngai htingbu nta n lam sai. Duila, ngai ma wa hkon hte yup sana.” Ja Ro wa ganu a sai hkrai hkrai re dangkang hpe yu nna, grai yu matsan dum ai hku, wa tsip de hkan shang wa u ai.

　　“Aro yup mayu jang nhku de she wa yup ga, wa hkon ko yup nang jang wa hkali gawa ai.”

　　“Ngai yup na, ngai yup na!” Ja Ro shani gaji ganu ni lawan n wa jang, wa hkon yannu ni hte yup yup re masa nna, ya mung hkan yup nang na hkyem nga nu ai.

　　NAMDU HKA

　　Htingra ta bai du wa sai. Layang dingla yan gu ni yi som sa wa na re majo, ma hpe hkrai nta ton da na myit n hkon rai no myit ru mau ung-ang nga ma ai.

　　“Aro, daini nang hkrai nta nga jang nhpa galo na rai?” Bumnoi Ji gasha hpe ga wo wo yu u ai.

　　“Ngai chyang gam ma, chyang ko ma, ura ma rai sun de sa na, nokyu pu pu ai sa yu na.” Nga jang she, ganu gasha hpe ahpum la hkra:

　　“Nu a gasha go grai myit su ai, nta ko sha nga, shinggan de hkum sa lu yo, shinggan de sa jang na gadoi sha ai ni nga ai, ma a na grai tsom ai, lama nang shinggan hkan sa jang, masha ni na sa gadoi di sha kau ya jang n tsom mat na ra ai. Dai yu, nu shat makai ko chyitchyit mung ju bang sai, jan sanyeng hpun ndung e du wa jang she sha lu yo.” Bumnoi Ji shat makai hpe raphkop ko mara ton ya let tsun u ai.

　　Ganu ni rai mat wa ai hpang, Ja Ro ura hpe rim pon rai, gui chyang yan hte shachya lakang hku yu wa nna, sun e wandu pu pu tsom ai ko, gatnen ni nampan shadung sa ahkyen shakap ai yu, lagat ni magyi ko nampan shadung bubu rai hkra shakap la rai pyen mat wa ai sha hkan yu chyai nga yang, mare shingnom de ugan bai goi hkrat wa sai. Shaloi shi hte rau hkom nga ai ura wa mung goi hkrai goi to gya nna, sun nhpan hku pyen pru mat wa jang, chyinghkrang hkrang chyang hkan pyen gaboi ai palam la rim yu rai, ura wa ugan hte gasat ai bai wa yu mayu wa rai, nhku de bai wa mat nu ai. Ndo de pru wa na hkyem ai re, chyinghka shinggan de nna shajup la kau da sai majo, n lu pru wa rai, nbang de bai sa wa yu yang mung chyinghka tingting hkanghkang, kawa tong hpe sumri ko shingla manai dang la kau da sai. (Bai matut hti ga)