Hpan Ja Maran Ko Shong

　　(Shata 6 nhtoi 29 ya na do)

　　Ja Ro go shana de tup gaji dui hpe la jin ai majo, shi hkrai sha gaji dui dumsu gau mat wa ai Sinwa hka seng lam hku nna, Lagat lungpu lam hku hkan mat wa ai, jan go shang mat wa, nsin go sin wa, gaji dui hpe shaga yang n htan rai, Lagat lungpu makau hkan sa mau dauyin hkom nga ai lapran, chyahkyi shannga ni nrung marong marang re, shi a makau hku lai sa lai wa rai hto hkom ai sa mu nu ai, shi gaji dui hpe gade shaga yu tim, htan ai mi n nga sai. Shana de she ganu shi hpe shaga ai na dat nna, aja wa htan dat ai re, nsen n pru hkro sai, mare masha ni Ja Ro Ja Ro nga shaga she shaga nga ma ai, shi gade htan yu tim nsen n pru hkro nna, hkrap let gara hku hkom yang she ganu hte hkrum na kun ngu lam no yu nga yang, chyang gam yan chyang ko hprot rai kagat du sai. Gui yan shi hpe mu ai hte, ningmai gangat n-gup ladon ton, ana hkayom kau rai “Si si” nga shara magup mata hkrai mata dat ya ai shaloi, “Chyang gam!” ngu shaga dat ai hte she nsen hkon pru wa lu nna, ganu hpe shaga hkrai shaga let, gui yan hte nta lam de hkom wa ai lam ko, ganu ni hte hkrum rai, Bumnoi Ji gasha hpe mu ai hte, masin machyi masin pot mayu ai nji n-gu nga wa ai lata, maidang ko galang sha pyi no gahpret dat ya n-ga ngu, ta shon di sharot dat ai hte, Kasan bum lago de sharo grut ai nsen bai na dat nu ai, shaloi shi go gasha hpe hkum e kap di pon kau, nta lam de kagat mat wa masai, mare na la ni go num ni a hpang ko tungtung hkan nang, num ni go shong rai, lam she n hkrup hkra hto mat wa masai.

　　ZAIBRON NUMDA

　　Ja Ro hpe tam ai shana de sharo grut ai na lu ai kon, Bumnoi Ji gasha hpe hkrai nta n kam nga shangun sai, gaji dui hte mung n kam ton da sai, shi ganang sa yang ganang woi hkom, lu hkom ai hte hkom, n lu hkom jang shingnoi singga ko hta bo gun di u ai. Bumnoi Ji yannu mare masha ni hte Ga-du gat sa nna wa ai lam ko, Ja Ro lam gadong n lu lung mat rai, ganu e shingnoi ko bang gun wa u ai. Zaibron numda ko du wa ai shaloi, Ja Ro ganu a kara njo ko gang ton: “Nu, hto yu, hto yu!” Nga tsun ai majo, ganu don rai tsap nna, nhpa wa re ta e ngu, lamdung lahta maga de mada dat u yang, hpun ko hkram nga ai ruban ru ntsa ko pu hkram gram nga ai.

　　Shaloi, dumsa gaba Uring dingla matan dat jang, lapu n chye shamu mat ai lapran ko, rau hkom ai wa-ngan la ni sa a- dup sat la manu ai, ado do di gatong do nhtom, masha hkum shagu hpra hpra garan la kau masai. Bumnoi Ji go lapu do gun ra rai, gasha hpe lam hkom jasat shangun, nta du wa pyi ndot, lapu do azat mani la nna, jum bang gayau la rai, langa hpo hte mayon la nhtom, dumsu gaba ni hpe jo kau nu ai.

　　“Aro, nbang de wura kawa wa-hpang gaba ko punui puhkram gaba nga ai, wa-hpang de hkum sa re lu.”

　　“Nu, dumsu lapu chyit chyit sha ai.” Ja Ro dumsu ganu ni lapu shan maya sha ai yu nga nna tsun u ai.

　　“Ndai go gaba ai ni sat ai she re, ma go no gaji ai, lapu ma hpe kan de chye mayu bang kau wa ai, ya hpang de lapu mu tim hkum gayat, yat yat sha hkom yen kau da ai bo re.”

　　AHKU HKU TA

　　“Aro, gui kumhtong sa hta la su!” Bumnoi Ji wa shat ko shat hkyep mu n mu di amya gayau bang rai, Ja Ro la shang wa ai gui kumhtong ko chyagot bang nna, gui sa yo shangun u ai. Chyang gam yan chyang ko wa shat hte gayau ai gui shat n sha ya ai, ladi hte sha sa manam yu ton kau kau rai, yu nga ninglen, gui yan a akan lani hte lani ahpa leplep rai hpa lasi mat wa sai.

　　Bumnoi Ji Ga-du gat de gatro gatrai gun rai, ahku tam sa wa hkyem nga ai ten, ndo de ma kyek hkrap ai na dat sai, ndo de htim pru wa yu yang, mare na Ja Ro ko sa chyai hkrat wa ai ma langai hpe chyang gam yen e hkap gawa ton manu ai.

　　“Goi lo goi lo, ma e, ya gara ko gawa ya sata? Gui matse la ai ngu yang, tsan tsan kon shaga dat na n nga ai mi!” Bumnoi Ji ma hta pon la rai nhku de woi shang wa nhtom, sai lui ai lago de yu ya u ai, magyi pot ko gui wa hka lahkong kap sai, shi gui mun bo la, shatdi na shat lawan amya la rai ningma ko achya ya di, hka bai ru hko rai, magyi na sai ngap jang she, ma dai hpe ba nna, u chyingjat na udi hkum shi hta hpai rai ganu gawa ni ko sa tongban mat wa sai.

　　Yi-nam ta marang go shani shana nsim nsa htu abya nga ai, nsi naimam ni rai n myin lu ai lapop kyek ten hta, ahku hku, shat n lu mat, masha sha na shat pyi n lu, gui masha bai gawa dat rai, Bumnoi Ji hkrap let kagu hpe: “Agu, gui sat sha kau ga lo, gui go masha sai manam hkrup jang, loi nhkring ai chye gawa ai da, ahka n dang wa na, ngai mung ahku n dang tam sai, daini jang masha so la nna, ngai n mu ai shaloi sat kau mu.” Ngu tsun kau da rai gat sa mat wa nu ai.

　　Layang dingla yan mung lago lata lapyin n rong mat wa, ganam jan hpe ahku tam lom na atsam go n lu, sengmo sa ai gasha wa go n pru wa rai, ganam jan nhpa tsun yang nhpa madat ya ra sai. Gui yan hpe gade nja let matsan dum tim, ganam jan sat kau nga sai majo, kagu mare na la wa-ngan marai mali manga hpe shaga la nna gui sat kau shangun sai.