Hpan Ja Maran Ko Shong

　　(Shta 7 pro 1 ya na do)

　　Ja Ro go gui sat kau ya ai nga nna, shani tup hkrap chyu hkrap, gui ju ai shaloi garai n si ai majo nyang pru wa jang, Ja Ro hkrap let gui lago sa gang, gaji dui go myiprui mayut kau, gui yan hpe masop let: Nan masha hpe gawa ai majo, daini ndai zon byin ai masa re, nannau myit mi apyo rai nna wa manu ngu matsun shabon kau dat nu ai.

　　Chyang gam yan chyang ko hpe sat kau ai hpang, Ja Ro machyi mat hkra garen mat sai. Shing rai, Bumnoi Ji mayu nta de u pra gasha langai wa hpyi ton nu ai. Ura dingla go u pra gasha wa ton dat ya ai shani kon, Ja Ro sa pon dat shagu lahpre pru mat wa wa rai, u pra hte ndi nhka rai, ntsa de hkrai lung jon jon re hpe mu shagu, Ja Ro gaba ai ni a man e, “U shinglim bai ahpu jat ya sai! U shinglim bai jat ya sai!” Nga nna maron dat jang, gaba ni ai go kaga de yon yon rai du krung pyi n sharot ai dung mat mat rai ma ai. Shi u shinglim jat ya ai nga nna tsun ai go, u pra hpe nnan la wa ai shana de njang, ura wa gabu gara hte u pra ko wuli lun nna lung jon dat sai, ma go hpa n chye ai majo, ura hpe maibau hpunhpyi hte hta gabai dat jang, ganu ganing n chye ngu nna: Ura u pra ko u shinglim ahpu jat ya ai re ngu tsun dan ai matsing la nna, wuli lun shagu u shinglim jat ya nga ai, nga nna hkrai tsun nga nu ai.

　　HKUMPYI HKYET NA CHYAHKYON

　　Wa la ginhtong htong wa sai, shaning yi-nam hkren marang htu ai majo, shangu galup ai ten nau na mat n na, nta hkan na shangu go gu kau ra ai hkrai rai sai. Shadan nta ni shong shangu htat aga so masai. Bumnoi Ji go madu wa rai mat wa ai mali manga ning du wa tim, lungseng ong ai shiga nna, nta galoi wa ai nga ai shiga go, laning mi hta ginhtong htong wa jang, galang lang go du tim shi n pru wa ai majo, myit do wa, kagu yan gamoi mung myit pu nna, n-gun lago grau kya mat wa, bungli gaba n dang galo wa masai. Gui yan hpe sat sha kau, u yan mung shan hkrai chyai mat, dumsu ni ko go jahpot sha lu jon chyai mat rai, Ja Ro gasup manang nan n lu mat rai, shi hpe hkrai nta e jan do mi pyi n wam ton da sai.

　　Shadan nta ni ko shangu htat ga sa ai shani, Ja Ro hpe woi sa nu ai. Gadong hkan go jinghpa hte dangkang ko mahkai nna gun, numda ai ko go hkom shangun rai woi hkom, numdu prang hkan, Ja Ro go woi gasha zon, hpun ndung hkan noi goiwat gram hkom chyai rai, grai pyo dum mat nu ai.

　　Shana de, tingsa ajan Kasan bum ko bunghkum nna gayau mat wa ai hte, shangu htat ai num ni jan du sai nga, shangu shabon shajup gun, madu gasha hpe shaga la rai, ningsin garai nsin yang Hkumpyi hkyet ko lai lu hkra nga rot mat wa masai. Dai re, Hkumpyi hkyet ko garai n lai yang, hti pyi ndang hkra re chyahkyon wunong ni Hkumpyi hkyet she mut mat hkra hkom nga mala sai. Shangu htat ai go num ni hkrai rai nna, laknak go shangu htat ai nshau hte zingret sha rai nga manu ai.

　　“Sho！Sho sho!” Nu num ni myit htum myit si, ganing n chye rai, shangu magun gun ashun let jahtau hkrai jahtau maron jahkrit nga ma ai. Chyahkyon ni go htim na n htim na nga, bo sharot ton hkyot hkrai hkyot let, chyahkyon du wa hpang de mada nga ma ai. Gaba ai ni jahtau maron ngut ai hpang, Ja Ro go grai sam ai masen, grai na pyo ai ma nsen hte:

　　“Chyahkyon, sho！Sho！Sho!” Kasan bum ting hpuntang she gasho hkra maron dat jang, chyahkyon ni agajong sha hkyum hkyum rai Hkumpyi hkyet kon nam maling de bram rai hprong mat wa masai. Shaloi shangu gun ai nu num ni Ja Ro hpe shakon let, shangu lit hte shim rai nta lam de kagat ru mat wa masai.

　　Nta du wa ai hte, Bumnoi Ji kagu yan gamoi hpe Hkumpyi hkyet e byin ai lam wa tsun dan jang, gaji dui gashu hpe hkap pon la nna: “Ma ni a bo ko sagya dung ai da, chyahkyon go shanhte hpe n shut jang, masha hpe n chye htim ai.” Nga tsun let, gashu wa na shong e daphkun ko ju ton ai naisam le ahpu la nhtom, gashu jan hpe kop jang she sha u ngu matsun let, chyinghkyi e noi ai gasha hte shanwa a dumhpau sanat, wantsi nhpye ni hpe yu nna, nhtung de yon rai dung mat nu ai.

　　SHARO MANG

　　Mare bo nhkrem de rai nga ai Layang nta na chyang gam yan chyang ko hpe sat kau ai hpang kon, Nhkre mare de malat, ahkan galang ni uhkrai sa rim sha shatsang, sharo, chyahkyon nga dumsu ni hpe zingri zingrat, wa-du wa-tsa rai ni mung nta wa hte gayau gaya nga nna, wa ninggyi shabat hkat rai, mare ting shinggan pru na pyi she n gui mat masai. Layang ni a npu na dumsu lahkong masum hpe, sharo e npu e nan sa gawa sat kau ya, Uring ni a nta na gumra hkyima lahkong mung sa gawa sat kau ya rai, mare masha ni yong go, Hpakan sengmo sa mat ai jaugong gaba Layang Gam, Hpojum Ong, Lunghpra No ni nta nga to go, hkan sharo shade n dingsa na rai nga ai nga tsun jahta jang, madu jan ni go madu wa ni hpe marit ai lam mi, nam na matse labye ni hpe gasat ra ai lam mi rai, dinghku gata hta dumdum htehte alum ala rai nga na hpe marit rit ai go, tinang hkrai sha gade lang lagu hkrap la rai, ten nhtoi hti let la gajang nga ma ai. (Bai matut hti ga)