Hpan Ja Maran Ko Shong

　　(Shata 7 pro 6 ya na do)

　　Sharo gade daram masha nga n mu ai go, Uring nta ni a gumra hkyima lahkong ting, shong hpang rai sa gawa sat kau ya ai kon, Uring wa masin nsi si ai, sharo hpe mu to nhtu hte aga hte gayau gaya rai hkra azat mani kau na zon ngu let, Tahpyin gat de sa nna, sharo hkam chyinghtep gaba langai sa mari wa nhtom, Namlai hkyet ko sa hkam ton jang, lapa noi rongba lahkong hpe shong hpang di lu hkam sat kau nu ai.

　　Sharo lu hkam shagu, Uring wa go Woi mangan hkyet na lungbyen ko sharo mang wa sharon ton, mare na du gasha Htu Ro hpe shaga la rai, shi a shalo labu sharo hkum ko sa jahpun ton nna masop let, shali hkrai shali hkrap shangun ngun rai, sut mayut la ngut, hkrap ngut ai hpang she sharo hpya hpya rai ma ai.

　　Ma ni sharo mang makau hkan gasup nga ma ai, hkrap ngut jang, gaba ai ni pyi rai n jin yang, Ja Ro go nhkrit nkang rai da labu gata na sharo wa galap yu u ai, shaloi gaba ai ni go sharo hpya na she malap kau hkra Ja Ro hpe hkrai shagrau jahta let dung nga ma ai.

　　Rongba lahkong ting sat kau sai nga hpomi num ni, ya chyom Lasui hkyet de wahpum si, wa shagreng si, n-gai kong si grai si ai, dai ko woi la-gang ni hte namsi sa gashun di sha na matu hpa n tsang ra sai nga, myit pyo mat manu ai.

　　LUNGPA

　　Jahpot manap jau jau, mare na jongma ni masa da-lang ko lai mat wa wa re hkan mu ai Ja Ro go, ganu hpe shi mung jong lung mayu ai ngu tsun jang, ganu go jong grai lung yak ai, nang no gaji ai, ya gaba jang lung na re ngu hkrai masu kau kau di u ai. Ma jong lung nau tsun jang, yup gok na shi jong no lung yang lang ai lungpa hte gamgu wa sho la nna, gasha hpe ABCD hti sharin, ka sharin rai, ma ga shangap ngap di u ai.

　　Bumnoi Ji no gaji yang, htingnai ga jong lung nga dangam ko, Layang ni e jong sa lam ko na lagu hpron abrut sha mat wa nna, jahpan kumba shang kau, hkungran jaiwa sha wa kau di la kau ai hpe grai n ra u ai, shing rai shi jong lung yang lang ai lungpa hte gamgu hpe sumpu e nan bang makoi ton ai re, gasha jan jong lung chyu gazik ai majo, shi zon ngu lung mayu ai she nrai nga dong ngu myit htai la let, nja nja sha ngu sho shapro nna, gasha jan hpe laika sharin ya u ai.

　　Laika chye hti wa magang, Ja Ro jong de n sa n lot nga hkrap shatsang ai majo, shi mahkon prat e da ai ka pong myi nhpye ko lungpa sha bang shagun nna, jong de dat dat nu ai. Jong sa shangun ai jahpot nan nan, nta wa lam ko lungpa noi ai sumri tsam mat sai majo, lang nga dangam ko sumri di mat, lungpa aga de pya rai lungdin ko hkra nna lahkong hkrong rai mat sai. Ja Ro ga mat ai lungpa masom hpai rai nta du wa ra ai, ganu go lungpa hpai ai mu dat nna, mahkoi shado kau sai kun ngu myit du ai hte hkap yu dat yang, gaja sha shado kau ai mu dat ai hte, shatdun e ru ton ai hpun chye langai hta la nna gasha hpe abung ngu gayat galau ton nu ai. Dai hpang e, sara ma Wa-shut Ko go ma chyu shachyu let, htang ko yu nna bai hta shachyo bang ton ya nu ai.

　　Lungpa do mat tim ganu shi hpe laika sharin ai lam go dingyang n shingdang ai, gasha hpa pyi n chye ai ma hpe hkrai gayat yat re lam shut dum nna, shana shat sha ngut ai hpang, wan wut ton, dap hkun hkan ka shangun, nta hpunpyen hkan ka shangun rai u ai. Dai ten hta jong gok langai mi ko jongma hpung lahkong sharin ai, Nhkum Gam go ma gaji ni hpe sharin, Wa-shut Ko go jongma gaba ni hpe sharin rai, Ja Ro go nta ko ganu e sharin yu sai re majo, jong ko laika grau chye ai jongma rai nna, sara e shani shagu shakon hkrum hkrum ai, jong lung kam kam ai, yup na pyi n shai mat hkra rai sai.

　　Ja Ro jahpot jau jau rot nna, ganu ko chyu sha hpyi chyu la rai, jong de sa sa rai u ai. Dai re, laika ganu sha no sharin ai, nsen ganu pyi rai n sharin lu yang, sara yan hpe la-hka n lu jo mat ai majo, ma ni jong n lu lung mat sai.

　　Bumnoi Ji dinghku gun ai mahkyit mahkat nga let, da go da mayu rai, jau jau rot nna ndo ko da sa da dung nga jang, Ja Ro hkrai hkan abai bai rai nga ai. Shi hkan abai jang, gawoi dui e shi hpe chyaba lap, wa-hpyet ru, wubong ru ni hte da da sharin ai, lasut lalap ni chye mat sai.

　　Lani mi, Bumnoi Ji shi da ai labu la-0 ngai da ngut nna, gasha hpe ri mahtong garan ya rai, mahtong matut shangun, ri matut ma jang, da sing ya nna, kahkum tum maka ka sharin u ai, gasha jan kahkum tum maka n chye ka nna, ya sha shut shut rai jang, Bumnoi Ji shi a da na shingnat sho la nhtom gasha jan hpe: “Htui！Ma yau mung, ndan re maka sha pyi n chye hkro ai mi, da da na chyu gazik ai, hkum da sa!” Nga, shabyi ko mayen shong mahtoi bun, shingnat hte agying bai gayat dat di nu ai.

　　Shaloi gawoi dui go: “Ngainam e, da nnan sha no da sharin ai, chyu pyi rai n hka ai ma hpe, dingsa dingla di gayat ai, ma hpe da da sharin ai go ngai she re, gayat mayu jang ngai hpe gayat rit!” Gamoi go ganam jan ma gayat jang, shi hpe pot ai re ngu htai la nna, ma sa nyem la let:

　　“Ngaishu go n hkrap lo, n hkrap lo, dui sharin na, kahkum tum sha kun, chyahkan lago, ka-ni pu, shalip lakang, kawang, singgo ma hkra sharin na!” Nga tsun let, myiprui si sha lagu gatsut la la rai, gashu hpe dun la nna, chyahpung maga ko chyahtai langai shapyan nyep ton rai, da-lang jung ton hkra rai, dahpran dit ton di, da da sharin bang wa masai rai.

　　SHINGKYIT

　　Ja Ro da nnan chye da wa ai hte, gawoi dui go gashu hpe gawa a matu shingkyit la- ngai woi da sharin u ai. Teng sha Ja Ro ntai nmai re shingkyit da ngut ai gade nna yang, Layang Gam sengmo ga kon nta du wa ra ai. Shi du wa ai shana, gasha go asak manga ning jan rai mat, kara go lim lim rai gawoi dui a shingdu de makoi let gawa hpe lagu yu to nga nu ai.

　　“Ma e, gai, wa hpang de wa yu rit, wa nang hpe kumhpa jo na.” Layang Gam gasha hpang de ta ladon nna shaga u ai.

　　Gawa rai ndu wa yang go shani shana “Wa wa jang...” nga nna lahka tsun ai, ya mu ai shaloi go gaya mat nu ai.

　　“Aro, nang ningwa hpe jo na nga nna da ai shingkyit wa la ya su le.” Gawoi dui tsun shadum dat jang, Ja Ro shanwoi dui a yup gok de kagat dingding shang wa nhtom, shi da ai shingkyit la pru wa ra ai. Shi go pai ta hte myiman shingga ton rai, hkra ta hte gawa hpe shingkyit ladon ya nu ai.

　　Gawa go ma chyangai e nau hkrap nna ton kau da ai ma, ya shingkyit pyi chye da wa hkra rai mat sahka ngu, gasha hpe shing kyit hte galang ta chyit di pon la nna, gabu myiprui pru let: “Ngaisha go kyet sai!” Ngu shakon dat nu ai rai. (Ngut sai)