Sumlut Ton

　　Anhte Wunpong amyu ni hkai hkrat wa ai hte maren, Hpunggam Chyanun hte Majan Woishun yan go, wan nhprang hpe sha- ngai shaprat da sai. Dai wan nhprang hpe bu yau shadai kau, buhprep shadai rep nna, ningsin htingbu wan lang lungpu ngu ai shara hta, hpri sumsing nbat pai, lungja mazep sumdo wai, di nhtom, Wunlang Makam Htingwan Magam ngu ai wa hpe rem sin na matu ap da sai.

　　Mungkan ningtsa gaang masha ni nga pra sai raitim, “Wan” ngu ai hpe n chye lang ai shaning lo lo nga pra hkrat wa sai. Lani mi hta gaang masha ni go, shana ten e tu gagrim, shani ten e sim re ai rai lama mi hpe mu ma ai.

　　Dai tu gabrim ai rai hpe gaang masha ni ra sharong ma ai majo, Kumhtoi wa Kumhtan ngu ai masha langai hte Basi Ri boi Ri pyen ngu ai numsha hpe dat nna, Wunlang Makam Htinggan Magam hpang de sa hpyi lajin shangun ma ai.

　　Gaang masha yan du ai shaloi, wan rem ai wa go, “To nan go ganang na pra, ganing ngu sa myit a ta?” ngu nna san u ai. Shaloi wan sa hpyi ai yan go, “An go gaang ga na pra, shingra ga ko nna sa ga ai” ngu htan ma ai. Dai shaloi wan rem ai wa go, “Reng, nan a shingteng amying go ganing ngu, amying wunchyen go gara hku?”ngu bai san u ai.

　　Gaang masha yan go,“An a shingteng amying wunchyen amying go, Kumhtoi wa Kumhtan, Basi Ri boi Ri pyen ngu ai yan rai ga ai” ngu htan ya ma ai. Dai shaloi wan rem ai wa go,“Amying wunchyen mung rum, lachyum shingteng mung hkrum re sai, hpa hpe ra sharong nna sa myit ta?” ngu san yu yang, gaang masha yan go, shani e go ningsin lungpu e sim, shana e go wan lang lungpu e tu gabrim ai hpe mu ga ai, dai hpe ra sharong nna sa ga ai ngu htan ma ai.

　　Dai ga hpe na jang wan rem ai wa go,“Dai tu gabrim ai rai go wan nhprang ngu ai re. Wan nhprang hpe gaang masha ni n mai lang ai. Gaang masha ni lang na wan hpe gaang ga e up da sai. Ngai rem ai nhprang wan go mahku wunli ntai, mara wandung ngu n mai ai, gaang ga shingra masha ni lang na wan ra ai, rai yang, sumhtang mabai no ba, ahkang zin-ya no hta masu, shingrai gaang ga du wa jang amying wunchyen rum, shingteng magyep hkrum ai shadang la sha hte shayi numsha yan hpe lata la nhtom, lahkru wan sut sut, laja wan gut gut she wa sut masu, shaloi mahku wunli mu, mara wan dung shaloi lu na myit dai.” ngu matsun dat mu ai.

　　Gaang masha shingra ma ni go, wan rem wa matsun dat ai hte maren, shingra Tu Mai Magam ngu ai la sha hte Gaang Ma Htu Lum Na jan ngu ai masha hpe lata la nna, lahkru wan sut sut, laja wan gut gut ma ai. Dai shaloi ko nna mahku wandung mu, mara wunli lu masai. Wan gut gut nna lu ai wan mung, shana e tu gabrim, shani e wan ningsam zim ai hpe mu lu ma ai.

　　Dai shani ko nna, gaang masha ni wan lu hpang wa sai, wan rem ai wa a numhtet numra ga hpe hkan nna, wan si wan n lu mat ai shaloi, lahkru, laja hpun kawa ni hte wan gang gang, wan gut gut ai lam hpe Wunpong myu sha ni lang hkrat wa nga ga ai rai.