Hpaudo Ma Ja

　　Labang Gam Ong go Mungdo lahta tsang jong ko laika sharin ai 20 jan ning du ai hpang, sara usa aya lu shok lajin la rai, jong sharin mahkrun mung kung re majo, jong up 10 ning tup gunhpai rai, asak 60 ning jan, asuya mu gun aten mung 35 ning jan sai majo, sharin shapan bungli kon hkringsa mat nu ai.

　　Labang Gam Ong hkum shan atu ahpro rai, myi ko mun galu semsem, ana go jongjong, digong ntsa ko myiset ahpro set mara tot da, hkumhkrang galu gaba, kara hpro hpro rai, lago laso lasa machyi nna hkom yang loi htotrot htotrot re wa rai nga ai.

　　Labang Gam Ong go 10 jan ning a shong e madu jan hte hka mat ai re majo, hkringsa ai hte mayu e rau hkuhkau ganon ton ai, ashong ahpang rai shi hte maren asuya magam bungli kon hkringsa sai manang ni hte matut zahpo la rai, shong de mu no gunhpai nga ai ten hta n lu du hkom ai myu gaba hkan rau chyai hkom, dakgasu hpaji janmau gup la rai, hpong shingra mu magam shang sai gasha Ma Gam hte Ma Ko yan hpe hkan gawan jahkrum, moi na dum nta buga hkan na makyin jinghku ni hpe gawan gatsan jahkrum hkom rai, nga don manang ni hte hka de nga sa don chyai, gumgai dingla bolung sa htong chyai, senghkyi to chyai rai aten shalai ai lahkong masum ning jan wa ai hpang, loi nga garen dum wa ai majo, gade nna ai gasha yan hpe hkrai chyenan gayet yu yu raitim, gasha yan go shaning nnan hte mungdan daido ninghtoi zon re hkringsa ten hta sha nrai yang, shi hpe n lu wa gawan rai nga garen dum wa ai hta n-ga, lago mung grau htotrot jat wa nu ai.

　　Dai majo gasha yan hte grupyin na htingbu htingpyen mano manang ni, shi hpe mi na madu jan hpe atsom tsun nyem nna, rau bai nga gahkyin mu, asak gaba wa jang go shada yu gon tsang hkat ra ai ngu tsun shadum jang, “La ga galang lai, chyauhpa rung galang nai, galang mi gap shapro kau sai pala hte mahtoi shapro kau sai mayen hpe ganing di bai nhtang la na re?” Nga pot angun wa rai, gasha yan go gadai mahtang ko mi rai rai, shi sha kam yang go myu gaba de hkan nga nang rit ngu tim n hkro, grau she bai angun pot wa re majo, ganing nchyum a ajum ju, chye ai manang ni hpe gade lang tam matut shangun yang she, tsom mari gahtong buga na gaida Marip Kai ngu ai hpomyi langai hpe lu matut la nna, shata mi la-hka hkying manga jo rai gawa hpe wa yu gon lajang shangun manu ai.

　　Marip Kai go shong de dum nta ding- hku yak ai majo, laika hpaji lo lo n lu sharin la kau, lawu tsang jong sha lung la ai, asak no gaji yang num wa dinghku de sha mat ai jan re. Dai re madu wa dinghku atsom n woi de, ma lahkong shangai ai htom, shinggan de gumhpro tam ai nga, maisak hpun hpaga ga rai, nta de nau n wa ai, shing rai nga brak pyo hkom ai lahkong masum ning jan a hpang, dum nta pru wa yang go aizi ana shakap la, ka-ni yahkyi gaba mung tai rai ganga pru wa ai. Dai hpang, dum nta ko lu ai rungrai ma wa lagu dut gamong sha kau, madu jan yannu ni hpe sha zingri wa-chyak sha jin, lagu sha jin, ka-ni don htong gade lang gahtap rong la la rai, asak 40 pyi n du ai jung dagrong si mat nu ai.

　　Dai htom Marip Kai go ma yannau hpe n mai garen shangun ai hta n-ga, jong hpaji n mai hpang hkrat shangun kau ai ngu, mayu nta de gawoi gatsa ni ko wa ton da let mare na jong gaji ko jong shalun da rai, shi go manang ni hte shinggan de mu tam galo hkom nna gasha yan hpe bau u ai. Marip Kai mu galo hkom ai ganoi 20 ning jan du wa ai hte, asak 50 jan mat wa sai, shing rai bungli galo shara hkan asak gaba ai ni bungli tam galo yak wa, ma yannau mung gana jan jong lung ngut pru nna mu lu tam galo sai, gaji ai jan sha jong no lung nga rai, dinghku lit nau n li sai hta n-ga, shinggan de prat tup nga hkom ai bo mung n rai, nta wa nga nga ai shaloi manang ni matut ya ai, tinang buga ginwang myu ko sha bai rai, dum nta hte ni gahtep ai hta lai nna, nta sanseng bungli sha masop galo, nta madu dingla wa hpe shat sha shadu jo let, yu gon lajang re bungli shakya rai nga ai majo hkro nna, Labang Gam Ong a nta ko bungli sa galo let gasha gaji ai jan hpe jong htu rai nga nu ai.

　　Labang Gam Ong a nta ko sa du ai hpang she, nta madu dingla wa go sara usa gaba rai nga la ai hta n-ga, salang mung galo yu sai re hpe chye ai majo, Marip Kai myit hta: “Ya ngai jong mung atsom n lu lung la, hpaji n chye ai jan mi, sara gaba ni a nta ko bungli sa galo yang go gaya gahpa wa rai na kun lo…” Ngu hkrit gaya dum mat da nu ai. Nta madu dingla wa hpe yu yang myiko mun galu samsam rai, yu hkrit na zon rai tim, atsom nga shaga matsun re majo, myit hta grai hkrit gaya hkungga let dum nta sanseng, shat gok gata bungli ra mara htep lahti kyet kyet galo rai da nu ai.

　　Marip Kai myu gata e bungli tam galo ai ten na wa sai majo, mu ai, na ai, myit ai, son ai, azai anyan, alen la apa sha, mahkrum madup lo, machye machyang hkum ai. Yu yang she buga gahtong na nu num ni hte n shai tim, krowang sung sam dik ai num langai jan rai nga ai. Hkum ngau gadun dok, lam hkom sat lawat tin shapun rai, galoi mung ngai grai kyin nga nngai nga ai zon rai, manang hte ga shaga yang chyom si mani masop shara da ai ga manong hte tsun shaga chye u ai.

　　“Daihpot udi hte nga chyu, muk ni sha u yo sara.”

　　“Mai mai, hpa sha tim mai ai, tim hpotde go hkausoi galo jo rit.”

　　“Mai ai, manap shat sha la rai, gara de pru hkom mayu ai kun? Nampan sun de sa hkom, shing nrai Tahko hka kau kawa maling de mahtang sa hkom na kun? Maio jangnyang maling de sa hkom chyai tim mai ai.”

　　“Daihpot go Manau kong lung ga ngu manang ni hpe so ton ai.”

　　Labang Brang Ong Marip Kai hpe so shaga ton ai kon, dum nta na bungli hpa n tsang ra mat nu ai. Jahpot rot ai hte man myit kau, manap shat sha la rai, hkum shakyang pru hkom mat wa nu ai. Shat sha ten du ai hte shat wa sha la, buhpun palong ni asan aseng gashin hkrut kau ai chyalu sha hta hpun, yupra hpun nba ni asan aseng re sha hpun rai, myit pyo pyo hte kam ai de shi a Japan modo sha got awui lang rai pru chyai hkom nga nu ai. Shinggan de manang ni hte hpre sha gasup chyai, htingbu nta hkan sa jahta chyai, sha ra ai lusha tam lata mari wa nhtom, Marip Kai hpe galo jo shangun rai, lauban masa hku nga pyo mat ai kon, htotrot ai lago machyi ai pyi nau n dum mat, machyi mako aput apai nga ai yom mat rai ai hta n-ga, gasha yan hpe shawoi na zon chyenan n gayet mat re majo, gasha yan go mau mau nga let, gade ya nrai gawa hpe gahti galai chyenan gayet shaga ga rai jang, gawa go: “Wa hpe nau n tsang ra ai yo, nannau a bungli myit lom lom hte shakut mu, nannau matut ya ai sanseng sa galo ai Marip Kai grai myit su kyet shop ai, dum nta ko ra mara shi grai chye tsang galo nu ai, dai majo nannau myit n lo ra ai, kyin jang go daining na go-nyen ten hkan raitim bungli ko hkan nna nta n wa tim n ra ai yo…” Nga shawoi na hte n bung ai sha myit grai pyo ai hku shaga htang htang rai jang, gasha yannau go: “Aru e, dingla ndai ganing go re wa kun? Teng teng wa nga pyo hkamja ai re kun? Shing nrai annau n wa jahkrum nna shalu ga ga ai rai kun?” Ngu myit grau bai tsang to nga ma ai.

　　Labang dingla nta ko Marip Kai n nga ai lani mi pyi shi hkrai n chye nga mat nu ai. Laning mi na go-nyen jong dat ten hta, Marip Kai gasha yan hte nta bum ga de ma yannau a gawoi dui ni hpe wa woi jahkrum nga hkom mat jang, Labang dingla go shi hkrai n chye nga si wa nu ai, madu hkrai nta sanseng n dum galo, dodap ko sumla hkrung yu dung ai maidang hte dung ganyen shatu ton ai hta lai nna, kaga dung shara hkan, saboi hkan go ninghpu hkrai puk puk rai, shat gok gata de mung shadu sha lang yu sai di mala hka wan ni manam shagram, nshu ningmu pyi tu tsit wa sai, shat simai shi hkrai shadu sha lagon rai, gat seng na hkausoi nau bai sha shalai kau rai kan mase chyum nga nu ai.

　　Shata mi a hpang, Labang Brang Ong go buhpun palong ko dingla bat hkrai waiwai nga wa sai, gahti galai buhpun palong ni to wa, labu buchyang hte palong longhpro ni hpe mung n lata ai galang ta buhpun palong gashin jak ko matsut bang nna, gayau gashin ai nga yang longhpro palong mung aka akok rai mat, labu hkindang ni mung run di mat rai jang, shinggan buhpun gram lajang ai seng de sa gram chyui shangun na go gaya dum rai, shi hkrai samyit hte chyui shakap ai, lata bai achyo bo machyi la rai chyum yak si nga nu ai.

　　“Ganam Kai, nta na mu jin jang, lau lau yu wa rit lo.”(Bai matut hti ga)