Maji Brang Di Hkon

　　Lai wa sai hpu wang,

　　Ninglum hte yinam ta,

　　Nyep myiprui hte gat hkai,

　　Salu salat she ayai,

　　Ru tsang kyindut hte shoi hpa chyum,

　　Ya go nmut mangai a majo aga tum.

　　Jan gahtet ko nli noihpye hpye

　　Dinghko lahpri hte hkan ahpre，

　　Ntsin hpang gara，

　　Zinglen pyen dingsa，

　　Jigrong go shinglang gyam，

　　Kan chyabung tim nam pyi ndam,

　　Jan ja ai wa kinding aga she gaprang ga，

　　Lamu de samui mu，

　　Aga de marang htu，

　　Moru gaba wan chye ai ni,

　　Baren ginsa lai sai nga，

　　Raitim hkai nmai ni gaba wa，

　　Gabu gara let hkan shu la.

　　Hkom sa manam hpe mung lu jo sha，

　　Shaman chyeju anhte hpe jo ya

　　Yi sun hkauna,

　　Mare shawa，

　　Shinggyim nau na yong a matu mara，

　　Htom hpang prat na gashu gasha，

　　Sutgan yamnga，

　　Shingnoi htingga，

　　Shat di hkawan，

　　Shingnoi tingsan，

　　Mamdum hte man sang，

　　Maihtu kailang，

　　Shanghkop shing ban.

　　Nhku gata na Nyau mut，

　　Ntot na Gui dut，

　　Urong udat na Nga wuhprang，

　　Bum hkarep na Hkanghkyi，

　　Sun na ladui si.

　　Na lok na Nga hpakyi，

　　Jon hto lu ai gumra，

　　Galau shot lang lu ai Wuloi wula.

　　Nhku sut ja bau yam nga，

　　Chyurum hpunau shada ni a nhpra，

　　Mayu hte da-ma kunghpan wa na bo，

　　Npot jong gaba，

　　Jum banau dut ai hkobat hkosa ,

　　Dai yong hpe daini anhte hkam sha mai nga ga ai lo.