(Shata 7 nhtoi 20 ya na do)

　　Sara usa wa zon nrai hkra nga yak chyum si wa ai Labang dingla go, Marip Kai hpe hkrai chyenan gayat htet shakyin da nu ai.

　　Labang dingla hpang hkan na go- nyen ten ko Marip Kai hpe nta n-gui wa kau shangun sai. Ma Kai a gasha yan hpe shaga la shangun rai, shi a nta ko alum ala shannu wa ni zon rai hkra woi pyo nyen nyen rai da nu ai. Dai majo dingla wa a htingbu htingpyen ni hte rau manang ni shi hpe shatu shakra ga tsun nga masai.

　　“Ya la nang chyom Jinghpo ga malai ‘Jandu mahka na janja, dingla matu na num ra’ nga ai go nang ko nan rai sai.”

　　“Rau gaba wa, ya rau bai dingla wa ai nde nlo ning ganon hkuhkau tim, la nang go dai zon re ahkyak bungli gaja n kam garan gachyan e? Madu hkrai mayun ma-ut nna dang si na nhkrit a ni?”

　　“Dingla nang Ma Kai hpe myisai jinghkyen to nga sai.”

　　“Ma Kai mung shi hkrai nga ai she rai, rau jom nga mat mu go e.”

　　“Awoi nanhte go dingla angok wa run bo hpro mat ma tim, manya ga no shaga, ganing rai n gaba hkro mata? Masha ga shaga mu lo…” Ngu pot ndang kau u ai. Raitim, shana shi hkrai bai wa sumru yu yang, manang ni tsun ai ga jo na zon zon, ya asak mung laning hte laning gaba wa, hkum- hkrang nkung nkang n gaja wa, gasha yannau tsan ai de she nga rai, ngai hpe yu tsang na masha go n tam n mai rai nga sai ngu myit jahkon la nna, gasha yan hte hkrum shaga yu, ma yan myit hkrum lom jang, daining na go-nyen ten nta ko jom zum ai shaloi, tsun jahkrup yu na hku myit dodan ton nu ai.

　　Shanwa ni myit ai go, Marip Kai bum masha, dinghku kaga n nga ai, shi a gasha yan mung gaba ai hkrai, hpa myit dun jen rai na shara n nga sai re majo, tsun ai hte gara hku tim hkro chyalu re nga jom myit gabu jahkut ton let, gasha yan ahkang jau jau hpyi la rai, go-nyen garai n du ai ko na wa jom zup nga masai. Lana mi na aten hta Marip Kai hpe shaga shadun ton rai, shanwa ni myit lu ai lam jom tsun shapro dan manu ai.

　　“Ya atung e, nang anwa ni a nta ko sa nga ai ten lahkong ning jan wa sai, ra nrong hkra wa hpe yu gon lajang rai, anwa ni grai gabu chyeju dum ai, dai majo ya ko nna hpang de prat tup rau jom nga na matu annau a ganu tai, wa a ningrum tai rai alum ala jom nga ga ngu tsun mayu ai.” Labang Gam Ong a gasha Ma Gam shong ga tsun hpo dat sai.

　　“Ba annau go tsan ai de nga, wa hpe dingyang ta tut n lu yu lajang, nang hte rau nga jang annau myit pyo ai hta n-ga, wa mung grai myit gabu na re.”

　　“Nang ndai nta na dinghku ganu tai jang go, ma yannau shinggan de nga tim ngai hpe myit n tsang ra, myit n garan ai sha bungli atsom lu galo na rai nga ma ai.” Nga jom tsun shapro ngut ai hpang, shanwa ni nlang mani sumsai hte rau, gara hku tim hkro chyalu re ngu, Marip Kai sha wom hkro dat ai hte gabu ta hpok dum na jin jin rai let jom la mada mahka si nga ma ai.

　　Marip Kai mung mani sumsai hte sha shanwa ni hpe galang ren yu mada ngut ai hpang, nwam ai kumla lachyum hku nna du gayin dan dat jang, Labang yanwa ni mau mahka let shong hpang: “Ya atung rang gara hku? Wa hte nga jang go lu ai sha ai, bu na hpun na nang hpa n tsang ra sai le.”

　　“Na gasha jong no lung ai jan hpe mung anwa ni jom madi shado la na rai nga ai le, hpa wa myit tsang a ta?”

　　“Dum nta no gap galo ra ai nrai, modo ni lu sai le, ngai rai tim nrai tim asuya masha re hta n-ga, jong up salang mung tai yu rai hkringsa byinsin sha ai wa she rai, nang nhpa no myit nhkon nga nni Ma Kai? ” Labang Brang Ong mau nma let ga shaga n madat ai jongma hpe shadum sharin ai zon nga nsen hte Ma Kai hpe yu shati ton tsun nga ai.

　　(Shata 7 nhoi 27 ya na do)

　　Marip Kai shanwa ni hpe yu shara dat nhtom: “Sara gaba e, ma yannau e, ngai nhpa no myit ndik ai n re, bungli galo ba dum na n re, nga n pyo dum na mung n re ai, dum nta, modo lu n lu hte n seng ai, ngai myit nhkon ai lam go ngai sara wa hte rau dinghku de, nannau a hpang ganu wa tai, bai hpang de gawoi gahkai bai tai wa re hpang go, dum nta ko ra mara, lu ai sha ai, dum nta htungwung htingwai sanseng, prupru shangshang, htingbu htingpyen makyin jinghku ganon mazum magup sumhpa ngai gade galo ba tim, nanwa nannau ni n mu mada mat sai, gade galo tim galo n du ai, galo n pot n du ai sha mu mat sai hta n-ga, grau nna nanhte ngai hpe shata shagu jo ai la-hka gumhpro mung n lu mat sai, grai rai yang go simai simong jum majap gumhpro gaji gajo hte go-nyen zon re hkan tsora myit hku loili jo re ko jan nna, nanhte jo na nrai, ngaisha yan hpe gumhpro jo mayu jang, ngai jo mayu ai daram n lu jo sai, hpyi lo wa rai ai shaloi nanwa ni myit n pyo wa sai, ngai ma yannau hpe gumhpro dang lu ai made jahkyin kyem ton ya na mung shata shagu n lu mahkong ton ya sai, ngai machyi mako rai tsirung sa, tsi ni mari sha tim nanwa ni myit n pyo wa na sha re, ma yan hpe jahkrum mayu, shing nrai makyin jinghku ni hpe kumhpo kumhpa gaji gajo jo mayu rai yang mung, nanwa ni ko ahkang no hpyi ra na rai nga ai, rau dinghku de jang go madu jan madu wa gadai mung tinang madu gade galo dum tim, shada yi-ngam n mu hkat mat wa sai, manu nmai tsun mat sai, grai yak ai, grai myit ru ai. Dai majo, sara gaba e, ma yannau e, ngai mala la myit n su nna n re, nko nna grau n re, ngai bum ga na jan dinggai mahka e ning re myit su ai sara nta ko bungli sa lu galo ai go arong gaba re, ngai mung grai myit dik ai. Raitim rau dinghku jom de na go ngai gara hku tim n myit hkon lu nngai, mara ro ya marit.” Ngu nshang ko lawai ton ai sumpan matu abrut let, shi myit lu ai lam tsun shapro dat nu ai.

　　Marip Kai dai hku hko tsun yan dan dat jang, Labang gasha yannau go bum ga na num hpomyi wa mi ndan nga ga lasa lom ai lachyum ram ram sung ai chye tsun shapro wa nna shannau shada jom yu mau mahka mat, ganing ngu n chye tsun htang mat rai, shannau atsom bai tsun shagui yu nga ma ai.

　　“Tung e, nang tsun ai ga go shara n rong grai jo nga ai, dinghku gata nta masha shada hpaji grai la hkat mai ai lachyum rai nga ai, raitim anwa ni a dinghku masa go nang mu ai hte maren, rau n nga nna yak ai lam mung nang mu chye ninglen rai nga ai, dai majo hpa mi nga tim atsom she no myit yu u, nang ra ai hku mung anwa annau ni mai byin ai hku myit tau ya na, nta masha hkrai rai jang go gara hku mung mai jom jahkrup la na re.”

　　“Nu yan wa mung galang mi myit n pyo myittsu hkat mat nna n nga rum mat sai re majo, n mai nga gahkyin mat rai annau lahkong maga tau yu yak si nga ai, ya atung nang hpe mu tam ai kon nta ko ra n rong hkra chye lajang ya rai, wa a matu hpa ntsang ra sai ngu ba hte annau mung grai myit gabu ai re le tung!”Labang Ma Ko go ma ni ganu hpe shanyen ai zon rai Marip Kai a ta lahpum ko sa noi gasot nga hkra tsun nga nu ai. (Bai matut hti ga)