Shaman ai:Maji Lama Nan Ka lajang ai:Myitung Htang Lat

　　E, e...Ningtung daini go lo...

　　Mali wa gaja wa nang ninghtoi wa gaba nna le，

　　Ndai Ma-dau bum a shadung,

　　Jan mai tsom a hkring ngung hta e.

　　Ningtung ningba wa jahkum,

　　Atu ga mung wa sharum nna,

　　Ningtam shachyan nna lu ai,

　　Yi-ngam maden nna mu ai,

　　Nlung nnan rau la wa,

　　Nnyeng nnan rau jom sha yang e..

　　Mu re sai lo! Grai mu re sai lo!

　　Shawa dotsa ningtung ningba yong go,

　　Shaning ningtam hkap,

　　Ningsa ningnan she ganap na zon nga re sai lo！

　　Gaji hpo htun she ngang,

　　Gawoi hpo htun wa kang nna,

　　Lamun asut num,

　　Latsa agan she hkum na nga re sai lo!

　　Ningtung ningba ni wa go,

　　Ago wa grau ngang,

　　Agan wa grau kang nna，

　　Ja htu mai lau shangang,

　　Ja hkan sumgon shakang,

　　Ja chyai ginra shang lu ai hkrai rai.

　　Lamun asut shakring,

　　Latsa agan sharing lu na nga re sai lo！

　　Mu sai lo! Mu re sai lo!

　　Ningtung daini nlung nnan ndai la,

　　Tsarung ashat ndai jom sha nna,

　　Lauban launa hte gamung rum，

　　Du gyi salang hte alu hkrum na nga re sai lo！

　　Asut ningno dun,

　　Agan ningdung lun nna,

　　U dung asut she je ring,

　　Wa dung agan she grau chying na nga re sai lo！

　　Shinggan awat she wang，

　　Pungding laika wa hkrang,

　　Hkohkam dung ai tingnyang dung,

　　Asuya lung ai lakang lung lu na zon nga re sai lo！

　　Gaji hkringhtong she ngang,

　　Gawoi numshun wa kang nna，

　　Shi lam sumri wa grau kang

　　Hkun lam sumdai she grau ngang na nga re sai lo!

　　Shi lam lai chyum mayon dang

　　Hkun lam laika shabon kang nna，

　　Aju shingtung she wa shang,

　　Dinggam manau she shawang,

　　Naushong kum o tai,

　　Naupa singgo do nang ai hkrai,

　　Ajan naura de rau hkap，

　　Shata nauwang de rau dap,

　　Ajan sumri daram ngang,

　　Shata sindai daram kang nga na zon nga re sai lo！

　　Mu sai lo··oh...!

　　Grai mu re sai lo...！