Hpaudo Ma Ja

　　(Shata 7 nhtoi 29 ya na do)

　　“Ma yannau e, nan tsun ai lam mung ngai asan sha chye madat ai, raitim nannau nanwa ni ngai hpe kam ai rai yang, ga hkum mi bai tsun na, sara a ningrum jan, nannau a ganu no nga ai rai jang, atsom sha sa tsun tongban woi la mu, anhte bum ga na ga malai ‘Num ngu ai ni gade kung nna anum n wa, ala n lu ai go n mai nga ai, nat jahkrit na sha pyi go lu ra ai ’ da, ala ngu ai ni mung tinang a madu jan gade shut shai nbyin ntai tim, tinang hpe shat shadu jo ai shatdi ganu re hta n-ga, ma ni hpe bau gaba ya ai chyu jo ganu re majo, chyeju ganu re, majoi mi hkum yu roi hkum yu gaji, ra ai lam hta shada sharin shaga shadum jahprang hkat rai, bo hpro wa run, prat sak jan du ai ten hta shada da ningrum ningtau dohkrong tai madi shado hkat na ahkyak dik ai re…” Nga bai tsun sharai jahkrang dat jang, shanwa ni yong agatsi nga sumru dung mat masai.

　　Gadai ganing ngu n chye tsun matut nhtang mat, mani go nrai, yon go nrai, hkrap go nrai, pot mung n mai rai, samyit do hkrat ai nsen pyi na na daram jom mau gatsi zim ai tsomra na ai hpang she, Labang Brang Ong dingla: “Ma Kai e, nang she sara gaba rai nga ndai…” Ngu tsun dat nhtom, shanwa ni Marip Kai hpe jom bong tsun hkyem bang wa ai shaloi pyi shabrang zon re hkum, ya go rot wa tim dung lahkum matu ko jum manat let rot wa, tsomra ning n machyi sai lago du hkra laso lasa ni bai gying machyi wa ai zon, grai ku let shi a yup gok de htotrot lanyan shang mat wa nu ai.

　　Dai shana Labang yanwa ni, hpang de na kun dinghku lam hpe myit sumru chyat mat ai majo, gadai mung atsom n lu yup ai ninghtoi jahtoi kau manu ai. Marip Kai go tsun mayu ai ga ni kawa ndum na shapre ru hpa asan sha tsun shapro kau lu sai majo, myit pyo pyo hte shi a yup gok shang wa nna: “Ya hpang de ndai yanwa ni no nga shangun jang go nga, n nga shangun jang go dum nta de wa mat na re.” Ngu myit jahkon kau let yupmang pyi n mu hkra yup pyo mat nu ai.

　　Bai Labang Brang Ong go, shi a shong de na lai wa sai lam ni hpe atsom sha bai nhtang myit sumru yu yang, madu jan hpe nko nlo n gon nson rai dinghku woi de ai hpe shut ningra ai lam nga ai hpe myit dum awai la da nu ai. Hpa majo nga yang, lai wa sai ten shi go bungli hkrai ma shakut, sumtso sumra num ma tam na aten shalai kau rai, sara manang ni matut ya ai shanhte jong ko sanseng bungli galo, jongwang yu gon hkang re mu htam num sha hte dinghku gan de mat nna, hpang hkan shada yu htuk hkat ai mu tim, nta na jan gasha bai lu mat rai, sara sari sadang jahpoi, salang myiman sum hten na tsang, raitim sara gaba tai wa magang, du salang lung wa magang, mahkrum madup lo wa magang, hpaji madang n bung ai num hte sha nga mat ai hpe myit go ndik re majo, shinggan de mano manang du gyi salang ni hte rau shat sha tsa lu chyai hkom, pru lam hkom rai tim gaya dum wa rai ai kon, madu jan hpe madu hte n teng dum wa rai, galoi mung mano manang ni a man e madu jan hpe rau n woi pru hkom re hta n-ga, nta dinghku gata ko madu jan gade galo shakut tim ra ningra ai sha amu nga, shat mung shadu jo magang n mu ai chyu na, masha hpe yu magang n tsom ai hkrai mu wa rai, pot chyu pot angun, azi azep ngu dinghku jom de nga ai ten hta, galang mi na ga-lo pot hkat ai shaloi, madu jan hpe pot shachyut gamong hka gabai kau ai hte, madu jan yon myiprui hte mayu nta de wa mat ai daini du hkra rai sai.

　　Labang wa go nhtoi htoi hkra n yup ai sha myit sumru yu jin ai htom, hpang jahpot manap jau jau jahkru ahkrong let ma yannau hpe shaga sharot dat ai shaloi, gasha yan go gawa hpe yu dat yang myiman nsam sit mang nga, bo na kara grau hpro jat grau dingla mat ai hpe mu nna, myit machyi ai majo: “Wa, na myiman nsam grai n tsom nga ai, hkum n pyo ai nre i?” Ngu san dat let: “Annau tsirung de woi sa na yo wa?” Ngu jom tsun matsan dum jang, Labang dingla go abui sha bo hpe loi mada sharot dat, myiko go n sharot ai, gasha yan hpe myimyep yu let, du shong gangat gayin nhtom, hkra lata loi sharot gangat let, loi mi na n na nga ai, n-gup nten ko pyi ganoi nhkrang na zon nga ai nsen hpe n-gup shinglet ko nna matep tsun shapro dat nu ai: “Nannau lawan gan hkyem lajang yu mu, ningnu hpe sa gawan yu ga…” Nga anyem tsun shapro dat nu ai.

　　“Wa, daihpot na sinpro jan go sinna maga hku she pru wa re nga ai le?” Gasha yannau galang ta mau mahka let gawa hpe jom asang dat masai.

　　Labang Brang Ong myi myep myep ton ai myi-ko hpe grau bai gang shakyip la nna, myi nda hte gasha yannau hpe yu a- gyau a-hkyot dat let, htotrot ai pai lago la- hkong masum lang hpai hkindit ahtu pot dan dat nu ai.

　　“Mai sa, mai sa sara gaba.” Gasha yan go gabu myiprui pru let, gahpu wa go ndo de shanwa ni a modo hpo gashin shatsom bang wa sai, ganau jan go Marip Kai hpe woi lang rai, gat de ganu gawoi ni ra sha ai lu sha sha hpa ni sa mari rai kyin bu si wa masai rai.(Ngut sai)