Sumrai Ka ai: Lahto Brang Ja

　　Doi Ling nta buga de ningnan du wa yang, mare na shabrang ni kadipa pan ko Gui lagat nampan sa chyu ai zon, langai hte langai pyang pyang rai sa hkrau gayin bu ma ai.

　　Doi Ling hpe wa-tai sha no tai hkom yang, ganu yan gawa Htingnai ga de hpaji sa sharin na matu ganyi gatsa ni ko sa sa kau sai, shi nta buga de bai nhtang wa yang go lamyi laman manu mana preng tsom ai hta n-ga, bong ra ai ko go bong nhtom, nbong na ko go ashan asau gade htom sha tim n bong nu ai. Dai hta n-ga Htingnai ga na jong gaba lung yu sai majo, dinghku hpaji garai chye ai.

　　Shabrang ni go Doi Ling a gahtok mata dat tim dui la na zon re hkum gong sha- yan hpe yu marit nga ma ai hte rau, shanhte hpe ako alo n-go n-wai nga nna hkap shaga ai ko myit sham sha to nga masai, yupra bunghkum machyu bang wa tim, Doi Ling hpe yu tsom dum ai lam no shong jom jahta hpo la nna, yup n yup nga let nhtoi jahtoi nga ma ai. Shanhte tsun ai hku nga yang, Doi Ling namdum de shang wa ai sat lago hpe sha pyi lamu shayi ni lam lai ang ai she shadu nga ai. Doi Ling ko sa ai shabrang nau lo nna, Doi Ling hpe atsom nlu shaga ai shabrang nkau go shat pyi n sha hkra shalu mat ma ai da.

　　Ong Ba yan Tu Mai go htingbu rai nhtom, shada grai hkuhkau ganon ma ai. Ong Ba mung shabrang kaga ni hte maren, Doi Ling hpe yu saku ai lam go, Yu n lu hkui sha ai Lanyau garap ntsa ko noi ton ai shan mu mada ai zon, shana shanang Doi Ling a nta jahpung shachyang hkan hkrai sa gasung to nga sai. Tu Mai chyu she sha- brang ni ko n hkan gasu nang u ai, shana shanang masa hpun ndung ko rong ai Utu zon rai, ningsin sin wa ai hte nba htinggrum hprui rai yup to nga sai. Ong Ba go Tu Mai hpe: “Hkau Tu nang mung shabrang wa n re ni? Hpa rai mahkon n sa gyem hkom n ta? Doi Ling nau tsom nna, anhte mare na shabrang ni pyi hkumbai gatsut na hpajet hkyem gun ai hkrai rai mat sai, nang na sailen nten mung sa shakya dan yu su le, Gui ju ai ko na Wa hkali hkru mi she ang na mi re.” ngu jang, Tu Mai Htan ai： “E, hkau Ong nanhte daram zet kung ai la ni pyi nhkap ko hpun lit gun let ahkyi ni dung nga ai daram jamjau hkra shakut tim, Doi Ling nanhte manang ni langai mi hpe ga woi jahten sai da nga mi n na nngai, dai hkan num laban sa gasui hkom na rai yang go, yup shat shagrung la tim rai sai.” Ong Mai go Tu Mai hpe shabrang pyi n shadu mat nu ai, shi myit ai go: La ndai hpe mau nngai, mahkon shabrang ni a matu san da ya ai ginhtong lado hpe wa yupku ko shalai kau na nga ai go, ndai zon nga ai myit rong nna she gawa shi hpe “Gui lagat pyi nampan no chye chyu ai, nang nsan ai ma yau go……” nga nna matsa nga a hka.

　　Gade yang, mare na shabrang ni Doi Ling ko nsa mat ai hta n-ga, shi hpe mu mada jang koi mat ai hkrai rai ma ai. Npot n hpang gon yu yang, Doi Ling mare ningbo wa hte achya sha ai da, mahkon jan wa mi dinghku la ni hte hpa rai nna achya sha ai kun ngu nna bai sagon yu yang, mare ningbo wa shi ra sharong ai hku n hkro ya jang mare masha jahpan ko n shalom na ngu ai da. Hpang e bai tsun tsun rai jang, Doi Ling ahpyi mung lu ai da bai nga wa sai, shaloi shabrang ni go Doi Ling hpe mu jang, ma- ling gata ko masha hte hkrum ai Dumsu nhprang zon, gara de lahkyon nga yang gara de hto mat wa masai.

　　Lani mi na nhtoi hta, Doi Ling go Ong Ba a nta de sa wa nna sa hkrap dung nga sai. “Agu Ong e, mare na shabrang ni ngai hpe mare ningbo wa hte achya sha ai, ahpyi lu ai nga nna shapo ma ai, nang yi kam nni?” Ong Ba go jahkring sha za-kyau shat tong mayu shut ai zon nga nna, ga n lu htan mat nu ai, Doi Ling bai tsun ai: “Ngai go shabrang ni yong hpe tsora hkungga ai majo, mahku mara lam grai galo nngai le, gadai myit n pyo na bungli mung n galo dum nngai, ngai mung sari sadang hte hkrai hkom sa na matu hpaji sharin la sangai, Agu Ong nang nkam a dong?”Doi Ling galang bai san dat jang, Ong Ba ganing n chye di nna: “Hka……Manang ni yong shing nga jang go……” Doi Ling go Ong Ba shing nga jang: “Agu Ong nang hpe grai myit su shadu yang wa, nang mung shabrang kaga ni hte hpok she rai nga ndai, n kam tsun shakre sangai……” Doi Ling go ntot ko nyep shabong di gabai kau da nna wa mat sai.

　　Hpang shana Doi Ling Tu Mai a nta ko bai sa hkrap ashut nga ai sai. Ong Ba a nta hte Tu Mai a nta go sun gachyi lo ai sha din ai majo, shan shaga ai ga yong na nga ai. Doi Ling tsun ai ga Ong Ba hpe tsun dan ai hte ganoi bung ai, rai tim Tu Mai tsun ai go: “Hkri Ling, myit hkum gaji, nang daram kyet ai shayi sha hpe wa shing nga nna jom shapo ma ai go, ngai gate mi pyi n kam ai, hkum hkrap sa, ya na nang hpe rai marai nga nna shapo hkom ai na jang, ngai ningtsa Lum gasat share ya na.” Tu Mai shing nga jang shan jahta ai nsen mung not hte not mani hte brang nga wa sai. Ong Ba go shi a manang wa hpe manu mana lagu shakon kau nu ai.

　　Gade nna yang, Tu Mai, Doi Ling hkungran poi shang masai. Dinghku jom de ai hpang ga-li ga-lo nga ai nhtoi mung nga ma ai. Lani mi Tu Mai go Ong Ba ko sa wa nna, grai pot mayu ai myi-man madun let tsun ai: “Ngai Doi Ling hte hka nan hka ra sai, kaga la ni hte achya sha hkom ai da.” Ong Ba shi hpe hkap nyem ai ga go: “Myit hpe shagrit shanyem ra ai, nang no shabrang yang pyi Doi Ling dinghku la ni hte achya ai da, ahpyi lu ai da nga tim hkungran la nna mi, ya dinghku jom de nna ma mung jom shangai ton rai sai wa, num ni galang numrang shut ai sha go sharang kau u le.” “Shaloi na Doi Ling hpe dunghku la ni hte achya ai, ahpyi lu ai nga nna tsun gajai ai ga ni go ngai shapo ai she re, ndai lang go nan ten ai.” Tu Mai tsun dat ai ga hpe Ong Ba na gajong nna, shi dung ai lahkum pyi ganoi sha dung galau kau nu ai.

　　Gade nna yang, Tu Mai Ong Ba hte hka ja lam ko hkrum ai shaloi mani sai sai rai tsun ai:“Doi Ling la kaga ni hte achya sha hkom ai da nga ai shiga nteng ai, manang ni shapo ai she re da.” nga u ai.

　　Lani mi Ong Ba bum hkauna de gumra wa tam ngu nna shinggan pru wa yang, ndo ya ko gui la wa ganu hte makrai hkat nga ta sai ngu jang, hkauna yi wa ko Doi Ling la langai mi hte yup nga la ai wa mu kau nu ai.

　　Doi Ling go hkrit gaya nna Ong Ba hpe tsun ai：“Agu Ong, Tu Lum hpe hkum tsun dan ya lu yo.”

　　Ong Ba go Tu Mai hpe n tsun dan na kun ngu grai myit wung-ang jin ai hpang, ngai Tu Mai nde nlo ning ganon sai wa, ndai zon re bungli shi hpe ntsun dan yang go manang pyi n mai son sai ngu myit la nna, Tu Mai hpe sa tsun dan sai, Tu Mai shiga dai na ai hpang Ong Ba hpe myi grai gaba hkra hpo shachyen lang nna yu shati ton let tsun ai: “Hkau Ong, ngai nkam ai, moi ya mung shing nga nna shapo ma ai. Hkau Ong nang go myit su sai masha re, nteng ai lam hkum shapo hkom……”