Marip wa a gasha jong sa ai shani ko nna, nta de rai marai la wa na chye ai. Ningnan e go hkalip, kara gyit, pongtin, na-yi zon re ni. Marip wa a madu jan gajong nna Marip wa hpe tsun ai: “Ma ni no gaji yang udi lagu, gaba jang nga dumsu lagu rai wa chye ai da, atsom she sharin shaga la ga.” Marip wa ta hte mong rai madu jan hpe tsun ai: “Hpa n tsang ra ai, ma myit garai n su na rai nga ai.”

　　Marip wa a gasha shi mali ning du jang, nta de rai nkai la wa ai go n mu sai, masha jahkrung woi wa na she sharong mat nu ai, shi hte asak ganoi maren re num gasha ni hpe nta de loi n hkring woi wa nu ai. Marip wa a gasha hpe sharin ai sara mung marip wa a nta ko loi n hkring sa du ai, sara go Marip wa a man e gasha jong ko byin ai manghkang azin ayang sa tsun dan ai hte rau, htomhpang de ma gaba wa jang byin wa ai lam du hkra tsun dan sai. Marip wa go mani sum sum rai, ya ma wa jang atsom sharin shaga na nga nna, gasha wa jang go n kyet ai lam lahkun mi pyi n tsun ai, grau gabu ai zon rai gasha hpe hkap shaga la nga ai.

　　Marip wa a gasha asak shi sanit ning du ai shaning, la langai mi Marip wa a nta htim sa wa ra ai. Marip wa a gasha nbang hku mayun pru mat wa sai. La dai Marip wa a chyinghka lam ko myi-man grai ntsom hkra sa pot tsap nga sai.

　　“Ningsha wa nye gasha a kan lapau ton ya sai, nye gasha ganing di pra shakre na kun, atsom myit yu mu.” Marip wa gumhpro mun masum hte bungli dai shakre kau sai.

　　Madu jan gumhpro wa kau ai hpang tsun ai: “Gumhpro wa kau ai go manghkang gaba n re, ma ndai n kyet la ai.” Marip wa tsun ai: “Nye gasha a majo she re go, gum- hpro gade wa kau tim masin n machyi ai.”

　　Marip wa a madu jan go hkrit hkrit nga ai myit rong wa nga ai.

　　Marip wa a gasha shi jahku ning tup ai hpang, num gashun ai nhkan e, masha ni e adup sat kau sai.

　　Gasha si mat tim, gadai mung Marip wa yon hkrap ai n mu yu ma ai, shi a myi-man nsam ko yu yang, shi go gasha si mat ai zon mung n rai nga ai, nta na gui gasha si mat ai zon chyau rai nga ai.

　　“Lasa si na dingla nang rai nga ai le, ma hpe hkong chyu hkong, gade n kyet tim daru sharin shaga ai mung n na yu, ma sha n shapron ton ya yu, nang hte prat n jahtum ai.”

　　Madu jan shade pot wa nga tim, Marip wa raijang grai gabu ai zon rai mani sum sum rai to nga ai. Madu jan go Marip wa hpe yu mau mat ai hte rau, nshung si hprui nga wa sai.

　　“Nang go nang shangai ton ai gasha re majo yon nna hkrap ai re. Ngai n hkrap ai, hpa majo nga yang ma dai nye gasha n re. Ngai ma shangai na atsam n rong ai re jau ko nna chye sai. Nang pyi masha ni hte ma jom shangai na chye ai go, ngai mung ma ndai hpe sat kau na chye ai. Ma hpe hkong hkrai hkong yang, sat kau ai hte bung ai da nga ai ga nan teng ai! ”