Masha ngu nna byin tai wa ai ten hta tinang hkrai simsa ai shara ko n mai nga ai hta n-ga， masha kaga lo lo hte ganon mazum ai lam go masha a prat hta ra ahkyak ai lam langai rai nga ai. Prat madang tso hkra lam shagu hta ongdang wa na lam a madung go, ganon mazum lam ko nna npot sharot nga ai.

　　1. Manang wa a ongdang ai lam shakut sharang ai a majo lusut lusu nga mai nga ai hpe hkum manon, manon ai myit go masha shada da ganon mazum ai lam hta shingdang da ai lam pru nna masha hte hka nna nga ai prat go grai hkun hkro nga ai.

　　2. Bai langai ngai tinang gaja wa ra nna nlang nmai re ten hta sha manang wa ko hkoi shap ai， shap ai shaloi gara aten hta sa jo lu na kangka ai ga sadi jo u. Sadi jo ai hte maren hkan shatup u. Shing nrai lam amyu myu a majo dai aten hta n lu n htang jo ai shaloi tinang hta yak ai lam rai madu myit pyo hkra tsun nna ap u. Shaloi nang hpe kaga lam hta raitim kangka ai masha hku nna matsing da na ra ai.

　　3. Masha lo lo shing nrai manang ni hte tsun shaga chyai ai shaloi madat ai aten lo malong jo u. Tsun mayu ai lam pru ai shaloi manang wa tsun htum ai hpang e she tsun u. Hkuhkau kam ai masha grai lo wa na ra ai.

　　4.Tinang hte hkuhkau ai ni a nta e sa chyai ai shaloi madu n ya ai rai ni hpe ra ai hku hkum gajam. Tara ja ai ni a nta e dai lam gachyi mi mung nra nga ai. Hkuhkau ai lam hten run wa chye ai.

　　5. Nang hta n nga ai rai ni hpe hkum gumrong tsun hkom，gaja wa na a gumrong ai lam hpe manang ni chye jang nang teng ai lam tsun tim manang ni kam yak nga ai.

　　6. Makam masham hpung nbung ai ni hte ganon mazum ai shaloi，tinang a makam masham mahtang masha ni a makam masham hta grau ai ngu hkum tsun hkom,ganon mazum lam hten mat wa na ra ai.

　　7. Masha a nta e ya sha hkumsa. Nang a majo mu magam gaba dinghprut chye nga ai.

　　8. Masha langai mi hpe ndai wa go gaja ai，n gaja ai ngu ai hpe myi hte sha hkum myit dodan. Ana hte bonu hpe akyu jashon u, dai hta n-ga manang wa hten byak wa hkra myit hkum sharot ya.

　　9. Tinang a ma hte htingbu ma ga lo hkat ai shaloi，gaba ai ni hkum hkan lom，lom jang ga lo gaba byin pru nna shada da myit nram hkat mat na ra ai.

　　10. Manang shada ganon mazum ai ko jo ya jo la rap ra ra ai. Tinang go n pru manang wa ko na hkrai la lang jang，lani mi hta ganon mazum lamn nga mat na ra ai.

　　11. Ga hpe byin ai hta grau nna hkum hton tsun, ga hton tsun ai ni a ga hpe gaja ai tsun tim hton tsun ai shadu nna gaja wa ra ahkyak ai hta grai jamjau nga ai.

　　12. Manang ga dai hpe raitim ga sadi hkum jo loi，nmai byin wa ai ten hta.“Ga share” ngu tsun jahpoi hkrum ai hta n-ga,manang hpe jam jau jo nna galoi mung nang hpe nkam mat na mara ai.

　　13. Mahkon shabrang sumtso ton ai shaloi pyo chyai na matu ton ai lam hta koi gam u. Mying n gaja ai hka danhkung lawan nga ai.

　　14. Nchye nko， prat madang nyem ai ni hte lachyum n pru ai lam a majo tinang hte galo hkat wa ai shaloi asum hkam kau u. Dai shara hta gaja wa nang sum ai nre. Na myit hpe masha ni chye ya na ra ai.

　　15. Nchye nko re masha ni nchye ai lam hpe tsun wa ai shaloi，hkum asong ya，teng man ailam hpe atsom sha tsun dan jang，shi hte na a lapran hkuhkau ai lam jat wa na ra ai.

　　16. Tinang hta madang nyem ai ni hpe，hkum yu gaji dum，masha hta chye chyang ai lam langai hte langai nbung ai majo，lani mi hta na matu akyu rong na ra ai. Daihta n-ga tinang hta madang grau tso ai hte tsun shaga ai shaloi, shut shai ai lam lo lo tsun kau chye nga ai.

　　17. Grai hkuhkau ai manang ni hte shatu shala rai tsun shaga chyai ai shaloi,lachyum n pru ai ga lo lo hkum tsun shaga.Nang hpe nson nsang roi rip na hpe n ra ai hpe dum yu u,Wunpong sha ni yong ganon mazum tsun shaga ai hta ongdang wa u ga ngu tsun dat nngai lo.