Maji Brang Seng

　　Lui mat sai hka shi hka-nu hte lai mat wa sai hkying ten ni n chye nhtang sai hte maren, masha a lai mat wa sai sak prat no chye nhtang na n rai nga ai, mai byin ai rai to moi gaji ten na zon nu yan wa a lahpyen ko galang no shingnyeng nga mayu ai. Raitim ya go madu a magam bungli, kun ding- hku, masa amyu myu a majo daido buga de chyahkring hkring n lu du wa mat sai, galang lang hkringsa ten madu hkrai myit sumru yang n myit madom moi gaji ten na lam hte buga na shingran ni hpe mu mu rai nga ai.

　　Gaji ten manang ni hte rau gasup chyai hkom ai hkauna pa, Nga rem let nga hkui sha ai hka shi, hka hpungyot gumpyau chyai ai la-ing hka-nong, ju hpun hte Wa shat la- nga kran la ai kong maron, gumhton chyai chyai re hkauna yinwa shingdu na mam bum, lagat hpun gaba na lagat ru hta n-goi goi chyai ai lam ni ya shingran hta pra pra nan mu nngai oi.

　　Bum yinwa tsan tsan ai, lam gaang pyi rai n hkom du ai nhtang mat na zon ngu ai, raitim alen nga ai yiwa machya ntsa hta, bungshi ahpyi nga bung ai pinra ko dung let bungsoi soi yang, hkying ten pyi hkring mat ai zon nga ai namchyim ni hkam sha lu ai gata e, jidui a hpang ko hkan nna tsam mari hkom du lung wa wa rai ai.

　　Ten lado lani hte lani lai mat wa sai hte maren, nye a mare buga mung lani hte lani, laning hte laning lai shai wat wa nga ai, daini rot jat sai, prat dep sai nye buga hpe mu shagu krodung salum gata hta, pyo dik tsom dik myit dik dum la ai daido buga hpe yong hpang de shachyan dan mayu ai lo.

　　Nye a daido buga go Yinkyang ginwang Nabang ninghton Nhkum ya mare hta re, wora hkran de go munghpom Myen mung na Jinghpo amyu hpunau ni nga shanu ai shara Laiza Muklum rai nga ai, mare man e myi hte chyo mu mada ai go shong de na Naura pa re, bai lahta maga ngu na go Ja htu kong mare, Gyeyang hpyen yen dabang ni rai nga ai, lawu maga de go Mungseng ya mare, Sha-it ya hpyen yen dabang, Laja yang mare ni matut mat wa sai, Laiza Muklum, Alen bum, Woichyai ni hpe asan sha mu lu ai. Jongbau nsen, laika hti nsen, Ugoi nsen, gui wau nsen, mani nsen, hkrap nsen ni mungdan lahkong jarit din hkat ai zon n nga ai na lu ai shara re. Shingdu de Nhkum bum hte Wa-tsip bum ko shamyet, mare npu e san tsom ai Munglai hka hte Gye-yang hka wa hkrum zup nna rau run rai lui gumtong mat wa nga ai, hka kau mayan nong e hkai lu hkai sha ai hkauhting hkauna hte sun wang ni jarit gumhpan tai ya, mare htumpa hku shawa lai lammo gaba hkrang, asuya a tara gaja hkam sha nna, mare lapran e pyilat ga lai lam nyep ton ai hta n-ga, htinggo shagu a nta ndo man ko di di nyep jahkrang ya ai, jan n-gun wanpu shado lam dingyang shachyo shadun ton ai majo, shana yuptung nhtoi mahka du hkra lam nan jasan ya lu nga ai. Mare ga-ang ko hkik pong ai htunghking manau htingnu galo shadun da ai, shingkang shingwang rai dingda nga ai manau shadung hpe mu shagu, galoi she manau bai lu manau na kun ngu myit ningtsing nga nga rai nngai, mare lai lam makau, shawa pyo chyai ginra, manau wang grupyin ni hta tsom la ai nwai pan, wa madai pan, pan teng, nsum pan, ura joban pan, mahko hpun, wumung hpun, chyahkya hpun, magyeng hpun, saling hpun re nampu nampan namsi namso hpun ni hkai shatut ton da ai majo, galoi na ten lado ni hta rai tim mon sumli shakya da ai shawa htingnu zon sha rai tsom dik la nga ai oi.

　　Mare shingdu na bum maron shagu hta noikrat hpun hte maisak hpun ni hkai shalat ton nna, lap run ginhtong ten hta akrin akru re hpun gata hta hkom chyai tim marit ningtsing mi alu nga ai, kaga ten lado hta go tsit lali tsom ai bum yan ni hkrai shinggrup da ai shara re. Sun wang e mung chying- hkrang, nai tung, bungsap si, saga hka si, laboi nai, nai hkru, ga rong si, jang hpan si, ngano si, ngahkyi si, hkachyu si, nai sam, hpulun, shaba si, nokyu, kahkum, sumlang, shalap, salau, hparang, yung padi si, gau jeng, gaubyen, wandu, nolep, mangai nokyu, shagrang, shanam, majap, mahko nam, hpakyi, shington, shinglim, kong kang, hkringbong, shakau, machyang, lui- hkri si re simo simai hte zolau zoban ni hkai ton ai. Langu, luidui si, wumung, samum, miwa mahko si, shaupan si, sanghpo, kyenko si, ndung si, shinggyin si, shan ju, chyok marok si, jangwom, mai hpang si, shayu si, muwun si re gahtet htingnai ga na namsi namso myu hkum hkum hkai shalat ton ai. Bungli hkringsa ai ten hta mare masha ni go namsi hpun pot hkan namsi di sha let pu tsom nga ai nampu nampan ni hpe yu mada let puba jahkoi la lu nga ai.

　　Anhte mare hta e ya go htinggo shagu ngu na noikrat hpun hkai shalat ton ai hkrai re, mare hta manam dap pyo chyai shara, rungrai dut lu dut sha seng hpo, makhpyik bom, kyenko si, langu, ndung hpun, luihkri hpun hkai, jarit lai gatro gatrai matut dut shalai, mado got manam hto sa hto wa, u wa yamnga rem re magam yi-ngam amyu myu shakut galo hkrat wa sai majo, lani hte lani sut su nga mai wa sai. Mare shawa masha ni galoi rai tim shada myit hkrum mangrum myit ra ai hte bungli lam shagu garum shingtau hkat, htunghking lam, laika hpaji lam, mare galu gaba lam, galo lu galo sha lam shagu loi nhkring ai rot jat sa wa lu sai rai nna, grai simsa nguipyo rot jat ai gahtong mare byin tai lu sai. Ndai lam go mungdan asuya ko nna garum shingtau, mare ting na nu wa hpunau ni salu salat sho let shakut shaja sa wa ai hte n lu hka nga ai rai.

　　Buga dum nta hte tsan ai shara hta nga ai rai tim, myit hta shingran hta buga na lam chyu myit dum pru wa wa rai nga ai, galang lang yup pyo nga yang, agajong sha hpu ba ni, ngai hpe “Rot u! Rot u! Sa sa nga hkui mat wa saga!” Nga wa ahprun gajong dat nna, yupmang kon dum hprang wa ai ten mung nga ai. Bai adui, nu yan wa re ni “ Ma e, shat ko si ai wa n re ni? Bai bai shat sha u.” Nga shaga ai nsen mung na pru wa wa rai nga ai. Galeng yup nga ninglen: “Ma nang e, le sun hkan, ndai nta wang makau hkan hpa galo ra ai n mu ai wa rai nni? Le le ninghpu ni pyi rot nna nam hkyen kau sai, sun shot kau sai le, nang hpa sha wa galo yu nta?” nga daru sharin ai ga na dat nna rot htaplap dung wa ai lam mung lo lo lang rai sai.

　　Goi e, buga de n du wa ai ten nau na mat nna she rai sam sai. Sak gaba sai aji adui ni hkumhkrang hkamja nga ma ai kun? Nta masha makyin jinghku ni yong hkamja ma ai kun? Hpa bungli galo nga ma ai kun? Ngai hkai ton ai namsi hpun ganing rai nga ai kun? Nta na kanoi yi de lam hkrang sai nga ai go gade daram hkom manu mat sai kun? Nta makau ko na manau wang hta galoi manau bai lu nau na kun? Daining nta na wumung hpun hta si ai wumung si go shawoi shaning na hta grau gaba ai nga ai go gade daram gaba ai kun? Kaga namsi namso ni mung grai myin song sai nga ma ai go ya yi di sha kau ma sai kun? Hkauna htumpa de mung jarit gang hpri ju yong kum shadang kau sai, jarit mayan na hkauna hkan masha n mai sa mat sai nga ai go galoi she bai hpo na kun? Myit yu nna myit ru magang rai nngai, nye a buga hpe dum shing- ran mu la sai.

　　Wo ra hkran de mung shong de go jinghku jingyu ni ko chyahkring hkring gan sa, mung shawa tsi rung de machyi mako sa yu, mano manang ni hte sa hkrum chyai chyai re wa, ya yong pat kau sai nga ai, ganing wa she di na kun, ana hkoi tsai jang she bai hkrum sai ga re, yong hpe grai myit dum shingran mu ai.

　　Masum ning ganoi du sai ten lado e, ana zinli a majo, mungdo ting shara shagu lai sa lai wa lam grau yak mat nga ai, mi ko na pyi jahkring hkring n lu du wa ai buga de, ya grau lai shang wa yak mat nga ai, dum nta masha hte makyin jinghku mano manang ni hpe mung chyenan hte sha mai htinglet hkat mat sa. Mare buga na namsi namso di gun, nampu nampan di hpai rai, Munglai hka kau hkan e ramma mano manang ni hte dung jahta chyai ai shingran go galoi mi rai tim pra pra nan sha arai nga ai lo.