Maji Brangdi Htu Lung

　　Ngai sak sanit ning re shaloi, ba yan ning a gasha Ma Nan hpe ba nna, nambat langai lang Htaihpyin gat hkan sa lom yu ni ai, dai go 1971 ning na nmut ta shang wa ten hta re. Lamu marang lo la ai yinam ta lai mat wa nna, nsi naisi ni kung myin tsom wa ai nmut ta de bai du wa ra ai hte maren, asan sha nga nna gatsi pyo la ai nbung nsa go anhte Mawa hka mare hpe gaup da nga sai, hpun kawa nkau mi nmut ta du wa sai re majo, alap ni htoi hkye wa ai mung rong sai. Mawa hka mare go Nambang bum a bum lahput yang ko ang rai, pa ga na Htaihpyin gat hte gade ntsan gang ai, nau rai yang go deng matsat daram sha rai nga ai. Dai majo, Mawa hka ni Htaihpyin gat sa yang, hto Nambang bum mare gaba de na ni zon rai, manap n hkon ra ai. Mawa hka ni go gat sa na rai yang jahpot nhtoi san ai hte shat rot shadu sha, shani shat makai gun rai, jahpot na hkying matsat jahku hta she gatro gatrai ni bo gun nna rot mat wa wa re.

　　Anhte nta go Mawa hka mare Seng- hkong bum maron lago do loi rui re bum la- hkyon ko re. Nta hpe ndo de nna yu dat yang, na lahkong tu abyep ai magui zon re nlung gaba langai hte yep di galo ton ai, nta madung go shangu galup chyinghkyen nyep ai ntsa nta re, nta hkra maga de rap rap re ntsa nta langai no galo da ai, nlung gaba a shingdu ko nan zut di galo ton nga ai, nta dai go mam dum hte shat gok shatai ai re. Hka lu nong gaba kon singgat gasha hte hka hpro hpro shalui ton ai, hka dai go Sharo bum de nna hka la htu shalen yu wa ai re, nta ndo na sun gumhpan hku go tsom la ai numri pan apa apat rai pu hkye tsom ai, sun de langu yi gaba rai nna, langu hpun lapran hkan e naisam ru jahkram ton ai hta lai, chyinghkrang wandu sandu re simo simai ni nto nma hkai ton da ai.

　　Anhte nta langu hpun lo lo hkai ton ai majo, jum majap sau yenan mari lang na gumhpro go langu si dut nna mari lang ai re. Kung sai langu si warong hpe kran di la nna, langu si pye hpe hka ko tsing madit la rai, langu hpo hte amung ko chyip chyip htun da nhtom, garap ntsa ko gat lapran mi garau la jang, langu si grai myin tsom ai. Anhte nta mayu e nu she gat de langu si sa gun dut dut rai u ai, galang mi nu langu si htun shamyin ton nga yang, rau gahtong Sumdu La ni nta dingshon shang hkyem nna, Dohpum gat de n-gu gun aga sa mat wa sai, Dohpum gat sa yang mali ya rai yang she nta bai du wa lu nga ai, nu ni gat hpang lahkong ya shani hkom mat wa ai, Htai hpyin gat shana she nta du wa lu na tai nna, langu si hpe ning sa gun dut ra mat sai.

　　Ngai a bungli madung go Ma Nan hpe woi ai, Ma Nan go chyu no chyu ai ma re, shingrai, gatrai la shana ning ngai hpe hpang shani ma ba nna Htaihpyin gat sa na hku tsun sai. Ngai go gat nau she sa mayu si, shawoi nu ko gat hkan sa na ngu gade tsun tim, ngai no gaji ai n mai sa ai chyu nga, n woi sa yu ai, ndai lang chyom ning ngai hpe gat woi sa na nga, ngai gabu bu ai ganing pyi n chye rai mat ai zon she ngu ni ai. Shana yup wa yang, gat ngu ai go ganing re wa rai kun ngu myit let yup malap mat wa sai.

　　Jahpot ning jau jau shat rot shadu ja- hkut ton, shani shat makai hkyem ton, ngai hpe shat woi sha la rai, shingnoi ko langu si hte shani shat makai bo gun, ngai hpe ma shaba la rai Htaihpyin gat de rot mat wa saga ai. Shawoi nu ni gat sa wa ai shaloi na ten hte shabung yang, grai no jau ang ai, ngai hkom na shong e nta ndo ko nna wora hkran de mada yu yang, Hka-lam Ma Ba ni a nta makau na gat lam gadong hku Nambang bum de nna gat sa wa ai masha langai mi lai ai pyi garai n mu ai, shawoi nu go gat sa wa na rai jang, Nambang ni pyi lai mat wa sai, n jau sai nga, tin shapun rai gat rai bo gun nna gat sa sa rai u ai.

　　Anning gat sa wa let anhte nta lawu na ni ba hpe sa shaga dat ga ai, tsa ba Latek Tong shong shani kon sun na htingke gatrai htu lajang gashin shajin ton ya sai majo, ni ba hpe sa shaga dat ai hte hkron sha rai pru wa nhtom, anning hte shanhte nta ndo ya hka lu lam numda hku rau rai mat wa saga ai.

　　Numda lam hkom htum ai hte, Seng- hkong lam ko byon rai saga ai, mayu e Myen mung hte Miwa mung lapran hpaga yumga ga gahkrang ai masha ni go lam ndai hku grai lai ma ai, shingrai, anhte nta ko hkrai wa manam nam rai, anhte hpe htingnai ga na noikrat htang hte amuk re grai wa jo jo rai ma ai. Senghkong lam lawu de go, Mawa hka ni a Walong kong rai sai, dai lam lahkong maga hkringmu lap, layang hpun, maibau hpun, lamai hpun ni tu sumpum ai, shawoi ngai ganau Dim Ja hte dai shara hkan lamai si sa di sha sha rai ga ai, lamai si myin an nga la jang, kan hkru hkintit hkra hkra di sha la nna she nta bai wa wa rai ga ai.

　　Dai jahpot mung lamai si grai bai myin hkye wa nga ta sai, gat sa wa ai hta n-ga, manap shat hkru nna, lamai si dai ni hpe mu tim sha yu na zon n nga ai. Chyahkring mi hkom yang, nga walong gaba langai sa mu sai, dinghkren chyinghka hku nna mu ai, walong tup re nga ni shanhte a wajit wahkyi ko walu hpum galui nga ma ai, nga dai ni go Mawa hka mare ni a hkrai rai nga ai. Mawa hka ni nga lo ai majo, Hka-lam Ma Ba hte Nhpau Gam yan hpe hozoshe ko nna nga rem na matu laksan hprai ton ai, nga walong makau hku lai mat wa ai shaloi, lam dung lahta ko makok hpun ginsa langai hta makok si grai si tingru nga ai. (Bai matut hti ga)