Maji Brangdi Htu Lung

　　(Shata 8 nhtoi 19 ya na do)

　　Zaibron numda lai wa ai hpang, nye shingma ko yup pyo nga ai Ma Nan grau nna majun wa sai, sat lahkam htot pyi yak wa sai, raitim shakut sharang let chyang chyang hkom akang nga ni ai. Ma Nan hpe shani shana ba rem ai re majo, ma ba na n hkrit ai, ba hkom yang amanu sha rai nga ai, bai ngai kru ning re shaloi, ngainau ma Tom hpe shata tup ai ko nna ba ai ladu hkrum hkra ba rem, matut nna, Ma Nan hpe ba ai re nga yang, ma ba ai lam hta grai man, grai kung mat sai hku re, rai yang, ma ba nna lam galu garai n hkom yu ai, shingrai lam hkom magang ba la ai sha na mat sai, hkum shingma mung tsu machyi mat sai, zauhkai n hkai ai lago lahpan aga hkan gasot wa sai. Raitim ngai go sharang let agatsi in ngu nna, hkom tiktik rai nga yang, Zaibron numda lai mat wa ai hte Walu hkyet ko byon rai saga ai.

　　Lam nau hkom ba nna, ngai a lago lahpan aga ko gasot wa ai zon nga nna, shingma na ma a dangkang de mung nlung mi gyit noi jat ai zon nga majun rai, ngai grai shakut let hkom nga ai ngu tim, hpang hkrat wa jang, ni ba go lam makau ko hkring tsap la hkra rai ngai hpe shong de jahkom nna tsun ai: “Ma Htu e, shong de hkom u, ma ni go hpang de n mai hkom ai, hpang de hkom jang, ma-di ni ma-di ma-di nga nna hkan nang wa ai da.” Nga nna, ngai mung ma-di hkan nang na tsang ai hte rai, shong lam de chyu hkom akang nga ni ai.

　　Walu hkyet hpe Walu kong mung ngu ai, lam pai maga de ndung hpun lahkong tu nga ai, moi shong de dai shara hta yi galo sha yu ai, hkra maga de galoi mung n chye hkyet ai walu la-ing langai nga ai, jan ja jang nga waloi ni shang hkalui hpum la la re shara re nga ni ba tsun dan ai.

　　Walu kong lai re hte, pai maga de lam gaba langai nga ai, dai lam go Manghtang bum hku gala yu wa ai gat lam rai sai. Anhte hkra maga lam hku hkan mat wa saga ai, gade n na yang, Sengchyai gadong re nga ai shara ko du sai, matut hkom mat wa hte lam makau ga gata de nna kra pru wa ai nlung langai hpe mu sai, nlung dai amanyen apri rai, lama mi hte garang manyen ton ai zon re, sa masop chyai na zon rai nga ai. Sengchyai chyai nna chyai shapro manyen kau ai re nga ni ba tsun ai. Dai Sengchyai gadong go tsomra nhkap ai lam re majo, lago lahkap pyi yo yang yo yang rai hkom yu wa saga ai, gadong yu ai shaloi, shingma na ma gade majun ai zon bai n nga mat sai.

　　Gadong yu htum ai hte pa layang ko bak rai sai, gadong htum ai shara hta na gahtong go Sidui mare ai sai, lam dung lahta de na Ma Ran ni nta hpe sa mu ai, Ma Ran ni a nta lawu ko na lam makau hta hka htu gasha langai nga nga ai, jahpot tup hkom kau sai re nga yang, hpang grai gara mat sai, ngai hka lu mayu ai ngu jang, ning go hka htu grupyin ko yu yu nna: “Sa-wa Sidui ni ni mung nge, hka gamai lu na ka-mai sha pyi n kam hkyem ton ai go yi ye.” nga, ngai hpe htong shangun ai achyang re jong hte, hka htu na hka chyagot jo ni ai, hka lu lu la jang, zet zet tsang tsang sha bai nga wa sai.

　　Sidui mare hpe lai kau da nna, Manghtang bum lago hku garet ai numda lam hkan mat wa sai, lam makau hkan atsip atsap rai tu ai wugat kawa ni hpe grai mu kau da sai, hkra maga de yu dat yang, dam lada re hkauna pa ni hta hkai shajong ton ai mam singkang grai ngui to nga ai.

　　Numda lam htum jang, mare gaba langai sa mu ai, dai go anhte a pa ga na mare Sandui rai sai, anhte nta go Mawa hka hkran de rai nna, hkaro gasha langai din ai, wora hkran de go Nambang hkran rai nga ai.

　　Ning chyu kang si wa sai nga, lit shayu kau ndot, Ma Nan hpe shayu la jit shadan kau rai, chyu shachyu dung nga sai, ma shayu la kau ya tim, ngai go shingma tsu machyi ai hte lago rop ai sha no ana nga ni ai, raitim, gat lu sa na re majo, gabu ong ong sha nga, ba tim hpa zon nnon ai, ning hpe lau lau sa wa saga ngu shadut na zon she nga wa sai. Ning go apa ko hkauna galo nga ai ba hpe chyinghkrang simai ni sho ton da ya rai, ngai hpe ma bai shaba la nna, rot mat wa saga ai, ni ba mung shi gasha Ji Chyang pa ko bungli galo nna, simo simai sa da ya na matu, anning hte rau apa na nta de sa shang ai rai nga ai.

　　Manghtang ya hkauna ko du ai shaloi, Zhilin ku ngu ai hka-la gaba langai nda pat rai nga nga la sai, hka-la ntsa na hpun mahkrai hku lai mat wa saga ai, hka shalen ai kadung hpun singgat ko kadung ningnon gasha rot nna, singgat pyi galo kau sai kadung hpun hpa rai n hkro si mat ai, alap no lap ai kun ngu grai yu mau kau da sai.

　　(Bai matut hti ga)