(Shta 8 nhtoi 24 ya na do)

　　Hka gaba langai lui ai ko sa du sai, mahkrai gaba hkrai ton ai ntsa hku nna ahka de yu dat yang, hka grai gaba to nga ai, dai go Hkalung hka re nga ning tsun ai. Hkalung hka nga ai na dat jang, nye masin hta sheng nga sai hte maren, ahka dai hpe yu nna bai yu yu rai, grai na hkra yu kau ni ai, hpa majo nga yang, ndai shara hta go ngai a shangai shaprat shara re majo rai nga ai. Nu tsun yang, ngai hpe go Hkalung hka kau ko sa shangai la ai re nga ai. 1964 ning na yinam ta hta, nu a hkritung hkriwang na ma ngai shata gu, shangai nhtoi du wa sai majo, nu go ya ma shangai shinggyim rong mat jang, sun na mahkri tsing lim jong nna, ma shangai wa nington mahkri tsing ninghpong gaba hpe bo gabai, bo gabai rai, hkritung gata na ngai go nu a kan ko nda hku rong mat sai. Nu masum ya masum na ma shangai machyi kau tim, ma n mai shangai la lu mat nna, wa agyau galo la rai, nu hpe Htaihpyin tsirung de hpai hkrat wa sai da, dai go 1964 ning na asuya shata 6 nhtoi 28 ya shani re, agyau hpai ai masha go wa, ba, Laje La, Nhpau Gam shanhte mali, marai lahkong hkong gahti galai rai hpai ma ai da, rai yang, ba hte Nhpau Gam hpai ai shaloi, ruru sha nga nna nu agyau ko grai galeng pyo ai, wa hte Laje La bai hpai jang go, nhkyeng nhkang ganyi ganga ngu hpai goiwat ma ai, wa yan Laje La e ari aran di hpai goiwat nna mi re, hkritung ma ngai go gaungui sha shangai lam de bai yong wa nna, Hkalung hka rap re hte ngai hpe lu shangai shaprat la sai re nga nu atsun tsun rai u ai. Dai ten hta Hkalung hka mahkrai gaba ndai garai n nga ai, gat sa gat wa rai tim Hkalung hka rap lai ra ai, lama yinam ta hka gaba jang, grai lai yak ai nga ai. Dai shaloi, ngai hpe lu shangai la sai rai tim, Htaihpyin tsirung ko laban bat mi sa rong la rai, nta bai wa sai. Shingrai ngai a shingteng amying hpe nu go Hkalung hka a mying hpe ningkap nna Htu Lung ngu shamying ya sai.

　　Gumra leng lam hku hkom yang, lam makau hkan na lung sha lung ja hkan gabye hkra hkrup kau dat jang, lago grai machyi la ai, ngai dum wa ko nna, zauhkai n hkai yu ai, nu a samyit yep ko ma chyangai zauhkai atsit re azum mi rong ai hpe sho shala chyai chyai re sha dum ai, dai go ngai chyangai ma re shaloi na zauhkai rai nga ai.

　　Grai chyang dum tim, ahkap hpai ai Sam num ni she grau chyang nga ma ai, anhte a shong de maidang go angat, hpai ai hkap akyik nga hkom lai mat wa masai.

　　Gumra leng lam makau hku na lagat hpun gaba tsomra lai kau da ai hpang, hkra maga lam makau de grai dam ai tsingdu pa langai hpe sa mu dat ni ai, tsingdu pa na ga ni bong shajang nga ai, shara ra na ga loi tso, shara ra na ga go nyem rai, shara ra go nlung loi loi jung ton re hpe yu mau nna, loi hkom lanyan wa jang, ni ba ngai hpe: “Dai ko hpa yu nga ai re ta, dai go Sam lupba re, n mai yu ai, lau hkom u.” Nga jang, ngai nshung si hprui nga let, ma lago hte lap rai shong de kagat mat wa ni ai, ngai ma no rai tim, lupba ko masha chyasi lup ai re nga nu tsun dan nna chye sai re.

　　Loi bai hkom ai hte, nohpu bat manam pru wa ra ai. Nohpu bat dai go gara de nna manam pru wa ai rai kun ngu, hkom let yu hkrai yu yang, gumra leng lam pai maga de na nta gaba ndo ya hku sumhpya hkan achkyang chyang re rai grai lam ton ai hpe mu dat sai, ni ba hpe san yang, Htaihpyin gat nohpu galo rung re, anhte gat shani sa mari wa wa re nohpu go wora nohpu galo rung ko mari la la re re nga tsun dan sai. Nu gat sa jang, nohpu pye chyahkro hte nohpu pa ni mari wa nna anhte hpe woi sha sha re, dai grai grai mu ai nohpu go ndai ko na sa mari la la re rai nga hka yi ngu nye myit hta myit dum nngai.

　　Htaihpyin gat du wa sai. Grai no tsan ai gat bo kon masha mut jong ai hpe mu sai, ngai galoi n na yu ai nsen ngoi wu gadu ai hpe na ni ai, gat de ni wa magang nsen dai ni grau gaba wa magang rai nga ai, gat gaang de du jang go, ngoi gadu ai nsen bai lai mat sai, dai shaloi na nsen go ra ra ra nga ai re. Ngai nta ko nga yang, jahpot jan pru wa ai hkring re hte, anhte nta chyahpung na lahkyik hpun gaba hta u numji numchyoi ni lahkyik si sa jom di sha nna, chyi e chya e nga ngoi shaga garu ai sha na yu ai, ya dai gat ko na masha garu nsen go u ni shaga ai hte gachyi mi mung n bung nga ai, gat nau ngoi garu nna, bo pyi sin mat ni ai.

　　Gat yang ko lagat hpun gaba tu shajang ai, ngai ning langu si dut ai makau ko ma ba nna tsap tik tik rai, gat masha yu to nga ni ai. Gatrai dut ma jang, ning ngai hpe lenghpun byep langai ko shani shat sa woi sha sai, shat go jahpot ning shadu makai gun ai shat makai hpyan sha ga ai, marai mi lenghpun hka wan wan mari la nna woi gayau sha ai, lenghpun dut ai mahkon jan go hkumhkrang galu gaba rai, kara samban gaba lo ai hkri ton, kara matu ko grai hkye tsom ai maka ri hte bai gyit ton, myiman shan atu ahpro rai mana maka tsom la ai Miwa num mahkon rai nga ai, Miwa mahkon dai go, ning lenghpun ra ai nga jang, punhtau ko lenghpun pa hkra di nna, hka pung na hka ko nhtu bai tsing madit la hkra di, gaja lawan grai grai hpa nna mot gayau dut jo sai, lenghpun dai mung mana maka mu ai she rai nga ai, shingrai, ya na lang ning ko bai hkan nang nang rai, lenghpun sa sha na ngu grai myit saku kau yu ni ai.

　　Nhtang wa ai shana de nta masha yong shat sha ai ko, ning go ngai gat ko shara mi mau tsap mat mat re nga nna tsun shapro dat jang, myi shup rai hkra na pot mayu mat nngai, ma ba nna ba ai hpe gaba ai ni gadai mung n chye myit htai la ya ai majo pot mayu nga ni ai. (Ngut sai)