Pu tsom nampan yong hta grau

　　Hpro nsam hkum tim gung gayau

　　Sama ni mung hpan hkum ai

　　Manu hpu la ai labu pan ndai

　　Wunpong mungdan shara shagu

　　Myu sha ni a hpyen ni chyu

　　Sak prat ram ai ramma yong

　　Gung sama nga ai de chyu mahkong

　　Hpaji shakut na myit go n rong

　　Gung sama marop go grai sharong

　　Hpaji chye ai masha go n tai

　　Ko chyang ko hpro a sumtso hkrai

　　Ganu gawa go hpaji chye hkra shakut ya

　　№(4) gung janmau she gup na wa

　　Wunpong shayi ni go lahpot lama

　　Maigan la ni she madu la wa

　　Wunpong shadang ni ka-ni hpe tso

　　Wunpong shayi ni gaida lo she lo

　　Amyu hpe go n shalo

　　Kawa toba chyu shachyo

　　Amyu sha lot lam go n myit

　　Ko chyang ko hpro hpe chyu marit

　　Asak ap nong let shakut na go n son

　　Galo ai magam yong hta so lason

　　Ka-ni gung sama n lu marop

　　Kun dinghku rai zing-ri shagrop

　　Du sat langai zon byin wa

　　Hkumhkrang mung chyahkro chyahkra

　　Tsi hpaji shi n sharin ra

　　Gung tsi samyit hte anyo la

　　Tsi samyit anyo ngut ai hpang

　　Ga sau tai na myi hpro gale hpang

　　Manu dan ai Wunpong shadang sha

　　Nanghpam hpyen hta hkrat sum ma wa

　　Ka-ni nanghpam machyu pala

　　Wunpong sha ni ko grau hkra

　　Hkrit hpa rong hta grau hkrit ra

　　Ka-ni nanghpam gung ndai wa

　　Manu dan ai Wunpong sha ni a lamu ga

　　Ka-ni ya ni she wundoi shara la

　　Aten ahkying lo lo shamyit lai sai

　　N mai hkro ai hpyen ndai

　　Hpyen majan byin nga ai lapran

　　Nanghpam hpyen hpe gasat da-hpran

　　Myu sha yong myit hkrum let shakut

　　Ka-ni hpyen hpe got shachyut

　　Grai hkrit ra ai gung ndai

　　Aja awa gasat shakre kau ra sai......