Maru Gong

　　Moi shong de hkohkam langai mi go num sha sanit lu ai da. Lani mi hta dai num sha ni yong hpe shaga gahkyin la nna, nannau ni gadai go hpa bo hpe grau tsora ai rai ngu langai hte langai tsun shangun u ai.

　　Ma Ko jan ngai go nu yan wa hpe tsora ai nga jang, Ma Ko hpe ganu a man ko tsap shangun sai da.

　　Ma Lu mahtang bai tsun ai go, ngai go dam lada ai nammuk dara hpe tsora ai ngu ai shaloi, Ma Lu hpe nta wang shinggan ko sa tsap shangun sai da.

　　Ma Roi go ngai tsit lali ai bumlang shagong ni hpe tsora ai ngu jang, Ma Roi hpe bum maling mala de sa kau dat sai. Shaloi dai num sha go lamu pyilan tai nna bum tso ntsa hkan pyenpyau gawam hkom u ai. Raitim, hpang e ganu yan gawa hpe ngai nta shakum shakap hkan nta galo nna ma sha go bau gaba la na ngu hpyi shon u ai da.

　　Ma Htu rai jang, ngai go nu yan wa zon mungdan hpe uphkang ai hpe tsora ai ngu ai majo, gawa go oh gaja sa ngu nna, shi a hkohkam lahkum ko wa dung nga sha- ngun nu ai da.

　　Ma Kai tsora dik ai go hkai lu hkai sha, malu masha, nto ntsang, nguipyo ai mungkan re nga nna, shi hpe go ja na-chye langai mi la ya sai da.

　　Ma Pri matut nna tsun ai, ngai go mungkan ntsa shinggyim masha raprap rara, zingri zingrat, nangshoi nangsha n nga ai mungkan hpe tsora ai ngu jang, shi hpe karai htauchyi ngu ai chyum laika jo ya sai da.

　　Ma Tom mung ngai go jum hpe tsora dik nngai ngu sai da. Shaloi gawa go grai na pot ai hte nang go ngai gawa hpe pyi tsora myit n rong ai, shani shana masha e sha kau ai jum hpe mi tsora ai go ngu nna, shi hpe tingsan ko rim bang nna, gat ya ko mohpyi hpyi sha ai mohpyi hpe sa ya kau sai da.

　　Dai shani kon mohpyi dai mohpyi n hpyi sha ai sha, ma hpe mungkan shayi ngu shingteng amying galai kau ya rai, ma hpe bau maka nna nga u ai da. Ma lani hte lani gaba myitsu wa nna, bungli gaba manu mana chye ma galo sha wa ai majo, sut su nga mai wa sai. Shingrai ma dai go jum a majo, gawa shi hpe dut sha kau ai hpe grai myit yon ai hte hkohkam ni hpe shat lu sha do jo poi hpo na myit lu nu ai. Dai kon lu sha poi a matu shi ning ngu na hkyem nu ai da, dai hpang laning mi na ginhtong hta hkohkam ni hpe shat do jo poi galo sai da. Poi shani hkohkam ni go mungkan shayi ngu ai shayi sha do sha poi galo ai da nga nna manu mana gabu ai hte du sa wa masai.

　　Num sha go shi galo shapro ai hkai ningmai ni hpe hkohkam ni sa yu na matu, madun dap ko ton da lu ai, hkohkam wa dai sutgan malu masha ni ndai zon lu sai hkrai rai yang, gade daram mai na wa ngu myit let shat sha shara de shang bang wa sai, shat sha saboi ko hkohkam wa dung ai shat saboi na si mai ni hta jum nbang ai, kaga salang ni hte mung masha ni dung ai ko go jum bang di ton jo manu ai. Dai shaloi hkohkam wa go gara si mai lakap sha yu tim jum n mu ai majo, dai num sha hpe shaga la nna, nang hpa majo jum nbang jo ai rai? Jum n mu nga ai le ngu san ai shaloi, num sha dai hkap htan ai, n mu ai hpe hpa ngu sha na? Wa hkohkam e, nang ngai no gaji ai ten hta, nang jum hpe n tsora nna, ngai hpe mohpyi hpe ya kau ndai ngu dat jang, hkohkam wa go, oh! Ngai mohpyi hpe ya kau ai ma go nang re hka i! ngu nna dai gasha hpe mungkan ntsa tsora dik ai ngai sha e, ngai ningwa grai shut sai, shinggyim masha yong tsora n sha n mai re ai jum hpe n tsora ai go nam maling na du sat hte pyi n bung nga ai ngu nna shi lawu na hkohkam salang ni hpe shaga zahpong la nna, salang ni e ngai zon re mungkan shinggyim masha yong lu sha tsora ai jum hpe n tsora ai masha go, dai nye mungdan na mung masha ni hpe n tsora ai hte bung nga ai, ngai daini kon mungdan hkohkam n galo na ni ai, hpa majo nga yang, ngai hkohkam galo na atsam n rong ai hta n-ga, nhkum tsup ai tsora myit, matsan dum myit n rong ai, daini kon jum hpe tsora ai zon mungdan mungchying sha ni hpe chye lanu lahku, chye tsora, shinggyim myit hking hkum ai hpe she hkohkam galo shangun manu ngu nna, dai shani kon hkohkam n galo mat nu ai da.